الشعب اللى ورا مصنع الكراسى

أيوه أحنا شعب غلبان غلب الأبل . ومضحوك علينا شافعى ومالكى وأبوحنيفة وأم حنيفة كمان . أيوه احنا شعب أكل منه الزمن وشرب . وداق الأمرين من حكام الله ما يسامحهم من كل لون وصنف . أيشى فرعنة على هكسوس على رومان ويونان . ومفيش مانع برده : شوية فرنساوية على أنكليس . وخد عندك كمان مماليك وانكشارية وعثمانلية . على أسر مالكة وعسكر وبتوع الأنغلاق وعصابة الأنفتاح . ومحدثى النعمة وأهل الجماعة واللى بيحترموهم . وكلهم خدوا خير البلاد والعباد . أيوه احنا شعب عانى ولسه هيعانى من الأب والأم والواد وأخوه . ورجالة الحاشية . ورجال الأعمال لغاية ماتفرج . وكله على حساب صاحب المخل !! أيوه أحنا شعب لسه عنده رغم ده كله أمل . ومتشعلق فى الدنيا . زى ما بيتشعلق فى أتوبيس ولا مترو ولا ميكروباص . أيوه أحنا شعب متبهل أخر حاجة . ولسه دافن راسه فى مشاكل العيال وأم العيال والطلبات اللى مابتنتهيش أبدا . ولسه بيفكر فى أنبوبة البوتاجاز والغاز والميه والنور . أيوه أحنا شعب عايش على أد اللى فاضل من اللى سرقوه !! ولغاية دلوقتى مش لاقى يا حرام اللى يحنو عليه . رغم السبسبة ورمى الرمش والسهوكة !! أيوه أحنا شعب مضحوك عليه . وأل يقولك : ده فرق سرعات ! يعنى ريسك 67 حصان . وأنت ياشعب بجلالة قدرك . يا دوبك حصان واحد بس ؟
أيوه أنا وأنت والسامعين . مطابنا وطموحاتنا . متواضعة للغاية . مش عاوزين : عربية ولا عاصمة جديدة ولا قناة سويس . نتباهى بيها وسط العالم . ولا مليون ونص فدان . مش عارفين حنجيب فلوسهم منين .
أيوه أحنا شعب فقرى للركب . أحلامنا على أدنا . يعنى مواصلات أدمية ومعاملة أنسانية . واللى بناخده بالتيلة باليمين . ما يتاخدش منا بالشمال .
أى والله . أحنا شعب متواضع أخر حاجة . وعاوز ريسه يبقى معاه ومش من كوكب تانى !
ويرجع لقواعده سالما .من غير أسلحة فتاكة ولاغواصات ولا حاملات طائرات ولا رافال ولا ميسترال ؟!
ولا حتى : حتدفعوا .. حتدفعوا !
ده حتى المثل بيقولك : أيش تاخد الريح من البلاط ؟!
المشهد .. لاسقف للحرية
المشهد .. لاسقف للحرية