المخرفاتي

ليلة السبت اللي فات كنت سهران قدام التليفزيون وعمال اقلب بين القنوات الفضائية اللي تخصصت في نشر الاخبار اللي تعكنن علينا.. مرة يجيبولنا طفل بريء محتاج لعملية لانقاذ حياته..
ومرة يجيبولنا عيلة راجل عجوز ساكن وعايش في البحر.. ومرة يجيبولنا طفلة امورة الكلاب اكلت وشها انما ليلتها التلت قنوات عرضوا حكاية الام اللي باعت ابنها من فقرها.. الحقيقة ليلتها أنا اتغميت.. وكانت ليلة مقندلة كلها كوابيس.. الصبح لقيت المخرفاتي جايبلي جواب وبيقوللي أنا عايزك ياأبو خليل تبعت الجواب ده للريس.. قلتله بدهشة جواب منك انت يا مخرفاتي للريس.. قاللي ايوه ياأخي وماابعتلوش ليه قلتله طب ليه.. قاللي يعني عجبك الغم اللي نمت فيه والكوابيس اللي جتلك بعد اللي شفته الليلة اللي فاتت.. قلتله طيب انت عايز تقول ايه للريس في الجواب ده.. قاللي اقراه وبعدين ابعته للريس.. أنا قلت اقراهو لكم معايا ونشوف سوا المخرفاتي عايز يقول للريس ايه.. اسمعوا معايا "سيادة الريس.. وافر التحية والاحترام وبعد.. ياريس انا متضايق ومكتوم.. قلت افتحلك قلبي يمكن استريح وافش.. ياريس الحقنا.. ياريس غيتنا.. ياريس انقذنا.. ياريس حوشهم عنا ياريس دول فقرونا.. ياريس دول حيشحتونا.. لا دول حقيقي شحتونا.. ياريس دول بياخدوا فلوسنا وفلوس بلدنا.. بلدنا اللي انت تعبان فيها وعمال تحاول تصلح اللي افسدوه فيها.. ياريس حالتنا بقت بؤس وبيوتنا دخل فيها الكرب وولادنا صابهم الاكتئاب.. ياريس اقتصاد البلد اللي انت بتحاول تصلحه هما بيخربوا فيه.. ياريس انت بتصلح من هنا وبتجيب لنا من هنا ومن هناك وهما نازلين هف في اللي بتجيبه ويروحوا مرجعينه تاني هناك.. ياريس حرام عليك تعبك ده يروح هدر.. انت بتعمل كتير عشان الغلابة لانك بتحبهم.. بس الغلابة مازالوا غلابة.. وغلبهم زاد عليه غلب علي غلبهم.. الغلابة ياريس باعوا كل حاجة عندهم وبدأوا يبيعوا في فلذات كبدهم.. ياريس حوش اللي بيبوظوا كل اللي أنت بتعمله.. ياريس انت بتفكر في عمل مشاريع كبيرة عشان الغلابة يعيشوا بس برضه الغلابة مش عارفين يعيشوا.. بيروح مش عارف ازاي لجيوب اللي مش محتاجين واللي متنغنغين.. ياريس عشان خاطر النبي تلحقنا وتلحق نفسك ما أنت كمان غلبان زينا.. ما انت ياريس برضه موظف زي كتير مننا.. يعني دخلك ثابت زي كل الغلابة وبياخدوا منك ضرايب زينا.. ويمكن الصافي مبيكفيش مصاريفك ياريس.. ما أنت ياريس مصاريفك كتير.. والتزاماتك اكتر.. ياريس الحرامية الكبار سارقينك وسرقينا وعايشين عيشة احسن من عيشتك.. ياريس الكتير اللي عندهم بيكتر اكتر.. والقليل اللي عندنا وعندك بيخلص قبل ما بنوفي احتياجاتنا.. ياريس البلد افتقرت وهما اغتنوا.. ياريس دا احنا لوحسبنا الاموال اللي اتسرقت واللي اعلن عنها حنلاقيها تتعد بالمليارات فما بالك باللي ما اكتشفش.. ياريس سايق عليك النبي تبص علي الحرامية اللي محدش قادر عليهم لغاية دلوقتي.. انما ان شاء الله انت حتقدر لانك لما بتحط في دماغك حاجة بتنفذها.. والنبي ياريس بحلفك بأعز عزيز عندك وهي مصر انك تلحقها وتلحقنا من الغلب والفقر والكساد والركود اللي بقينا فيه.. أنا بأه حقيقي ياريس مش قادر اكمل اكتر من كده اصل عبرة العياط مسكتني.. بس لازم قبل ما انهي جوابي ادعيلك ياريس بان ربنا يوفقك ويقدرك علي القضاء علي عصابات الحرامية اللي سارقينك وسرقينا.. واللي ربنا يورينا فيهم يوم.. واليوم ده حيكون علي ايدك ان شاء الله.. والسلام ختام ياريس.