أنا مش فاهمة ايه حكاية الانبوبة دى بتخلص بسرعة كده ليه مش بتكمل معاية إسبوع .. الله صوت بتاع الأنابيب أما أروح أنده عليه .. يا بتاع الأنابيب .. أيوه .. أنبوبة هنا من فضلك ...شويه وبعد ربع ساعة لاقيت الباب بيخبط .. أيوووه ورحت فتحت الباب .. انتى اللى عاوزة انبوبة .. ايوه انت لسة فاكر .. آمال هى فين .. تحت وأنا جاى أسألك عاوزة نوعها إيه ؟.. ازاى يعنى نوعها ايه ؟.. عادى ولا لوكس ولا سوبر لوكس. ايه ايه ايه وهى السوبر لوكس دى فيها جاكوزى يعنى .. ( بص لى بصه وقعت قلبى فى رجليه .. بصه تجمع بين البلاهة والغضب ) وقام مشاور لى بمفتاح الأنبوبة وقال لى : بصى يامدام :العادى بتبقى مليانة نص نص واللوكس بتبقى مليانة 3/4 والسوبر لوكس مليانة على أخرها .. اه والله كويس واسعارهم ايه بقى. بدأ الشرر يطق من عينيه ..اففففف العادى 35 واللوكس 50 والسوبر لوكس 75 عاوزة انهى فيهم .. لا شكرا مش عاوزة انا اقول لتوتى يجيب لنا من المستودع احسن .. زباين ..... نعم ؟ طب ايدك على عشرة جنيه .. بتوع إيه ؟ ..رسوم طلوع ونزول السلم ده انتى ساكنة فى السابع وماعندكيش اسانسير . ودفعت وامرى لله. وأول ما جه توتى من الشغل أخد الأنبوبة ونزل يغيرها من المستودع وللأسف كنا فاكرين إنه هيروح يجيبها وييجى فى ساعة بس عدى اليوم واليوم اللى بعده وبعد 3 أيام رجع توتى بالسلامة من المستودع وشايل الأنبوبة على كتفه وأنا ما اتوصتش وقعدت ازغرد أنا وأم كريم جارتى اللى قدامى أصلها كانت مستنية توتى هى كمان علشان تسخن أكلها عندنا .. توتى : بتزغردى على إيه .. على الأنبوبة .. ههههه دى فاضية يا حبيبتى .. نعم آمال كنت بتعمل إيه ده كله .. كنت مرابط قدام المستودع مستنى دورى وبعد كده لاقيت قدامى فى الطابور حوالى 1353 واحد قلت أما أرجع أخد بطانية وترمس شاى وأنزل تانى! لاااااا رجلنا على رجلك واخدنا بعضنا ونزلنا كلنا وقلت اقف فى طابور السيدات ما كانش فيه غير 3 بس ويا ريتنى ما وقفت لما جه على الدور بعد ساعتين تقريبا ولسه هادفع الفلوس لاقيت هجوم جماعى من ييجى 50 واحدة وقعدت كل واحدة فيهم تقول ده دورى وضربوا فى بعض حاولت اخد الانبوبة بتاعتى ماعرفتش .. اه يا نا يا امه وراحت الانبوبة كمان .. بس لا وألف لا أنا ماسكتش على الموقف ده. طبعا أنتو عارفنى عمرى ما أستسلم أبدا أخدت توتى والعيال ورحت إشتريت بوتجاز بالكهرباء 2 بلاطة إنما إيه زى الفل ومعه وابور جاز احتياطى علشان لو الكهرباء قطعت .