من هز .. وجد

اعجبتنى كلمات. للست سما المصرى. صاحبة المواهب اللولبية من هز الوسط. لتقديم البرامج. للغناء للاستعراض. وما خفى كان اعظم واعظم. وخلى وحياة ابوك.. الطابق مستور
والذى اعجبنى فى كلام الست.. عندما سألوها :أازاى يعنى أنتى رقاصة. وعاوزة تدخلى أسمه ايه ده. اللى بيقولوا عليه. اسم النبى حارسه وصاينه: البرلمان ؟
وكان الست لدغها عقرب. او مشى على قفاها. ولا مؤاخذة صرصار. قامت واتنفضت. وقالت لك : ياعم قول يا باسط.. هى جات عليا. ماهو كتير من السياسيين.. بيرقصوا برده
صدقتى والله ياست. ولو كان كل تاريخك ومواهبك. يتلخص فى الكلمة دى. يبقى حلال عليكى البرلمان. وانتى ياست اولى. من ولاد الايه دولم. اللى رقصوا شرقى وغربى. وبكل وعلى كل الحبال ومعندهمش.. ولا خشا ولا دم. ومع كل هزة: كده دولارات. وكده استرلينى. وما يخسرش برده. انه يكون كده ريالات. وكده دراهم وروبل كمان. ودول ومن غير لا مؤاخذة. ما بيرقصوش فى ملهى ليلى درجة عاشرة. ولا فى الموالد. ولاحتى فى غرزة. دول وحياتك ياست ياطاهرة. بيرقصوا على جثة وطن. عمال بيقول. ومع كل هزة: كفاية حرام. انتو ما بتشبعوش. ومفيش مانع كمان. انهم يهزوا شوية حلوانى. ويعملوا نفسهم ضحايا. وشهدا فدا الوطن والمواطن. وزغردى يا اللى انتى مش غرمانة. بس والشهادة لله ياست سما. انتى واختك صافى بنت ناز. دول بيرقصوا باحتراف مش زى امثالك. من اللى بيرقصوا بابتذال. وقلة قيمة.. وهدوم كمان. ودول بيهزوا على كل الاوتار والالوان. ايشى مرة ليبرالى وايشى ما ابصر ايه: يسارى. واحيانا اسلامى. بس ده سوقه مش ماشى اليومين دولم. وايشى مرة مع ليبيا القذافى. ولا مع عراق صدام. وما يضرش برده.. مرة مع ماما امريكا. ومرة يلعنوا فى سلسفيل ابو.. اللى جابوا امريكا. ومرة مع روسيا. والمعلم بوتين وغالبا مع دول الخليج.. حكم دول فلوسهم.. زى الرز
عاوزة الحق. ولا ابن عمه. ياست سما. سيبك من السياسة. واللى بيرقصوا سياسة. وسيبك من هز الاعلاميين. حكم ده كار.. انتى مش اده
بس خليكى.. فى الرقص. وهز الوسط. وما يهمكيش من اللى حيقولك : بلا قلة قيمة. وحيا؟ دول بيتفرجوا عليكى. وبالساعات فى قنوات: البيلى دانس. ويا اه يا اه. واحلى من البيلى دانس مفيش
وزى ما انتى عارفة. ومتودكة : من هز وجد. ومن زرع حصد. ويا بخت من كانت خالته.. ولا عمته: سما.. ولا صافى بنت ناز
المشهد .. لاسقف للحرية
المشهد .. لاسقف للحرية