يوميات دكتور متعذب.. بلاها تعليم!

امبارح كانت حفله تخرج دفعه 2013 طب أسنان القاهره.شوفت ازاي هما مبسوطين... واقفين لابسين الروب... وماسكين الكاب في ايديهم مبتسمين...متفائلين... فرحانين بالإنجاز اللي عملوه...اتخرجوا وبقوا دكاترة.
رجعت فلاش باك كده من سنتين... افتكرت انا كنت عامل ازاي.... كنت زيكم...مبسوط وعندي امل وتفاؤل ونشوه وكل حاجه حلوة اتخرجت..قعدت في البيت... لأنه كان قدامي حل من اتنين...
يا اما اققف جنب دكتور أكبر مني اساعده في العيادة اناوله الادوات...اعقمله الادوات... وامسكله الفوطة
وطبعا انت مبستفدش حاجه... هو بيرتاح اكتر وبيكسب اكتر... وانت بتبقي عرضة اكتر للإصابة بخطر الدوالي بأنواعها لو كنت ذكر يعني
أو اني انزل اشتغل في مستوصف عند واحد حج هيبقي اكيد تخين...ومربي دقنه وعنده كرش...ومسمي المستوصف باسم امه وفي آخر الاسم كلمه " الخيري " وهيديني فيكسد 20 جنيه -على ايامنا دلوقتي بقي 25 مثلا-... أو نسبه 40%
وبعد كده هيعلنوا عن فتح باب التقديم للتكليف... امك هتصحيك وتقولك قوم يابني قدم... أخيرا هتشتغل يابن الفقرية تروح تغسل وشك وتفتح اللاب... وتفتح موقع الوزارة اللي نقريبا مبيفتحش اصلا...ولو ربنا كرمك وفتح...هيفكرك بذكريات نت الدايل اب "زيرو تلات سبعات 55555555555555555555555
المهم هتفتح الموقع...وتبدأ تبص على الرغبات... هتتنح في الأول... هتجري على امك تعيط... هتقولك مالك يا ابني...هتقولها ايه ده !!! انا مش عارف حاجه.. الأماكن دي في مصر ؟ أي كانت بيليف ماي ايز هي مش مصر المهندسين ومدينه نصر وكاير فيستيفال وكايرو مول وهتبقي محتار هل تختار جنوب العياط الأول...ولا الشيخ زويد شمال سينا ؟! جنب الكمين هل طاميه الفيوم اقرب...ولا اطسا ولا سنورس ولا ابشواي
المهم انت هتقعد تختار 190 رغبة وفي الاخر هيجيلك الفيوم برضه .
انت هتتخرج فاكر انك هتقف في عياده وتلبس البالطو...هيجيلك بيشنت عاوز يعمل سيمبل كلاس وان....عاوز يعمل بليتشنج...يعمل لامينيت...يركب كراون زيركونيا...
متخيل هيجيلك عيان وهتبتدي تحطله التريتمنت بلان بتاعتك.... عشان تبدأ تعالجه ؟!
احب اقولك أن العيان المصري هو اللي بيحط التريتمنت بلان بتاعته...أو لو له ابن خاله كان عنده نفس المشكله هيقولك اعملي زيه..
هتقدي سنتين تكليف أو تستقيل وات ايفر يعني... وتيجي تقدم ماجستير... بعد ماتدفع ال 5 آلاف...هتعرف انك ارتكبت أكبر غلطة في حياتك... ورجعت للفامبيرز برجلك تاني..ومش بعيد تتحول لنجلاء فتحي في فيلم غدا سأنتقم..وتجمع صور الدكاتره وتغتالهم واحد ورا التاني زي مانا هعمل قريب
بص يا ابني... انت لو بتحب الأسنان ؟! قدامك طريقين
هتقعد في مصر وتستني الكادر وتفتح عياده ومتشتغلش ؟! وتسب وتلعن في البلد وتاخد ذنوب...وممكن تتجنن أو اعملك بورد أمريكي أو حتى روسي أو زماله أو صداقه أو أي زفت...وسافر
مبتحبهاش ؟! يبقي افتحلك أي بزنس صغير... روح جيم..احزق..اعمل سيكس باكس... طول دقنك... البس شورت... خلي ابوك يدفعلك مقدم عربيه جديده...وخليه يدفعلك الاقساط عادي خالص برده اصلك هتجيب منين يعني
وانتي يا بنتي... بتحبي الأسنان ؟! هاتيلك ارتيكيلتور وسنان بلاستيك واشتغلي في البيت عليهم...على الأقل مش هتشمي ريحه بق واحد ضارب فحل بصل ونص كيلو توم...وخلع ودم وطرطشه وقرف...وفي الاخر هتتجوزي وتقعدي في البيت
مبتحبيهاش ؟! يبقي ممكن تربي قطه... اصبغي شعرك... ربي قطه تاني ويبقي عندك قطتين...اتجوزي واقعدي في البيت...بس لما تتجوزي...ماتتجوزيش دكتور أسنان ولا دكتور بشري ولا دكتور صيدلي...شوفلك محاسب أو مهندس في شركه أو صاحب مسمط حتى..المهم متكرريش غلطه اجدادك
اه على فكره الكلام ده ينطبق على دكاترة الأسنان والبشري والصيادلة واي خريج.