تخيل لو الامتحانات بقت أون لاين في مصر؟!

النهارده وانا في محاضره في الكليه...في نهايه المحاضره قالوا هيعملوا امتحان أون لاين...عشان يشوفوا استفادتنا من المحاضرات وهيبقي عليه 5 درجات من اصل 50 درجة..
فجأه الدكتوره قالت...يلا كله يطلع اللاب توب بتاعه أو الاي باد أو الموبايل ويفتح ايميله عشان يحل الامتحان !!!
بغض النظر عن أن 90% من اللي قاعدين مش فاكرين ايه ايميلاتهم....ولا عارفين اصلا شغال ولا لأ
بس جه في بالي حاجه مهمه... لو الورقه والقلم اتلغوا من الامتحانات المصريه وجه بدالهم التاب أو الموبايل... هيبقي ايه تصرفنا كمصريين مع حاجه زي دي !
الام المصريه وابنها نازل الامتحان:
حبيبي...شحنت الموبايل كويس ؟!.... متقعدش تدخل على الفيس أو تكلم حد عشان ميفصلش منك في نص الامتحان..
اقفل الموبايل ومتفتحوش غير في اللجنه
نزل ابليكيشن ربي اشرحلي صدري
جددت باقه الموبايل ؟!...خد خلي معاك كارت 50 عشان لو لاقدر الله الباقه خلصت أو حصل حاجه
معاك خط موبينيل وفودافون عشان لو قاعد في حته مفيهاش شبكه اتصالات ؟!
خلي معاك موبايل اختك عشان لو لاقدر الله موبايلك هنج أو السوفت وقع...تلاقي حاجه تحل منها
ربنا معاك ويوفقك وتبقي الشبكه H+ أو 3G على الأقل
المراقب في الامتحان:
كله يقلل البرايتنس.... عشان محدش يغش من زميله.... هيعدوا عليكوا يوزعوا اسكرين بروتكتور اللي مبتخليش اللي جنبك يشوف انت بتكتب ايه وهتسلمها وانت خارج
اللي هشوفه فاتح واتس اب أو فايبر أو بيعمل بوست على الفيس هسحب التاب منه وامضيله على الشريحه بقلم أحمر.
الطالب في الامتحان:
=دكتور دكتور بعد اذنك ممكن ابدل مع زينهم ؟!
-ليه !!
=انا اتصالات وهنا مفيش شبكه اتصالات وهو فودافون وهنا فودافون كويسه !!
- وانت يابني مبتحلش ليه
+ انا موبينيل حضرتك.. مفيش شبكه في الكليه كلها
.........................................................................................
وليد..السؤال التالت...بسرعه يلا الموبايل هيفصل الله يخربيتك هسقط
.........................................................................................
يا جماعه حد معاه شاحن اندرويد زياده..الموبايل مش باقي فيه غير 4 % !!
..........................................................................................
اكتبلي ال MCQ على ظهر الشاحن...لحسن هسقط يا عمده
...................................................................................................
قفشتك بتبعت لمين على الواتس اب !!
-ياباشا والله مبعت لحد
افتح الباترن بتاع الموبايل ووريني
-نسيته اوكسيم بالله
.............................................................................................
هيجي العيال الدحيحه اللي كانت بتخلص ورقه الاجابه وتطلب ورقه تانيه....هتلاقيه بيغير البطاريه في نص الامتحان عشان خلص شحن الأولانيه
.............................................................................................
الناس اللي بتدخل بمايه تشرب الطلبه:
معايا كارت شحن فودافون موبينيل اتصالات...أي كارت عشره بعشره....جدد الباقه ياستاذ..جددي يا ابله..