ضحك عليّ وخايفة يفضحني

عندي مشكلة ومش عارفة أعمل إيه، كل اللي حواليّ بيقولوا لي ماتخافيش بس أنا طبعا قلقانة جدا، لأن أول مرة أتحط في موقف زي ده، أنا عارفة إني غلطانة من البداية لأني باثق في أشخاص ماعرفهمش لمجرد إني ارتحت لهم.
المهم أنا اتعرفت على شاب من حوالي 9 شهور، وهو مسافر وشفنا صور بعض على الإيميل وعجبته جدا وقرر إنه يتجوزني أول ما ينزل، أنا ماكنتش بحبه بس كنت مرتاحة له وعلاقتنا كانت مستقرة، اتعرفنا على بعض وعرفت بيشتغل إيه وهو طبعا سألني الأسئلة العادية، يعني اسمك إيه؟ بابا بيشتغل إيه؟ عندك إخوات قد إيه؟ في كليه إيه؟
وطبعا جاوبته عادي، في الأول ماقلتلهوش على اسمي الحقيقي وفي مرة كنت باتكلم معاه على الموبايل وبيكلمني عن صوري اللي شافها وكان عمال يقول لي إنتي عجباني أوي، وكنت فاتحة صوري على الموبايل عشان كنا بنتكلم عليها، وفيه صورة بعتها غصب عني وأنا باكلمه بس هو الصراحة كان كويس معايا فماخفتش منه.
ومرة قال لي هبعت لك فلوس عشان تشتري موبايل عشان يبقى له هو بس، أحط فيه الشريحة اللي هو بعتها لي من هناك، وطبعا عرف اسمي رباعي.
المهم أثناء كلامنا كان كل ما يتخانق معايا وأنا أزعل منه في حاجة ماكنتش بارد عليه عشان مش عايزة أكلمه شوية، لأني زعلانة وكان يفضل يتصل كتير ويتنرفز بسبب كده، وكان يشتم ويغلط وأنا مش بحب الأسلوب ده قلت له وماكلمتوش واعتذر واتأسف.
وهو قال لي إنه نازل قريب يعني الشهر ده ممكن يكون زمانه نزل، الله أعلم، المهم إحنا كنا كل ما نقعد كام يوم مانتكلمش آجي أرن عليه ألقاه "ويتنيج" ويقول لي ده أهلي أو واحد صاحبي، فحسيت إنه بيضحك عليّ وإنه مرتّب لجوازة تانية لما ينزل، وكل اللي عايزه مني إنه يقضي معايا وقت لطيف قبل ما يتجوز، فقررت أنهي علاقتي بيه.
راح باعت لي رسالة بيهددني فيها وقال لي إيه رأيك في ظرف يروح لباباكي على شغله؟ وقال لي أنا كنت مسجل رقمك على موقع فودافون ومعايا الأرقام اللي كانت بتكلمك.
ومن ساعتها وأنا مرعوبة، أنا عارفة إنه صعب جدا يوصل لي بس خايفة يحاول ويوصل، واللي مخوفني إن الصورة دي تكون لسه عنده، ومش عارفه أعمل إيه.

gege


صديقتي لا تفعلي أي شيء سوى أن تصمتي وتطلبي من الله المغفرة والستر، ولا تحاولي الاتصال بهذا الشخص مرة ثانية لأن هذا هو ما يريده، من الآخر ابتزازك، ولا تخافي فهو لن يرسل أي شيء إلى والدك إلا لو استفزتيه ليقوم بذلك، أما صمتك وبعدك ورفضك لمحاولات ابتزازه فسيكون ردها أن يهددك مرة ثانية وثالثة، وينتظر أن تضعفي وتعودي إليه لطلب صورك حتى يمل وييأس منك، وقتها سيبدأ في اللعب على واحدة أخرى.
إن من يريد أن ينهي موضوعا فليتوقف عن الكلام فيه، فلتتوقفي عن التحدث عن هذا الموضوع وحتى عن التفكير فيه، فالمشكلات من هذا النوع تصبح مثل الصداع المزمن والمشكلة أنها ليس لها علاج، ولا يمكنك سوى احتماله بالمسكّنات، والمسكنات هنا هي قربك من الله وطلب المغفرة.
الارتباط من خلال الإنترنت بقى ظاهرة منتشرة جدا، بس مش معناها إنه صح، العلاقة الصح لازم تكون علاقة شرعية وحقيقية زي الخطوبة أو الزواج، فخدي بالك لأن ساعات بنتخدع بفكرة الإعجاب والارتياح لشخص، وبنبدأ نديه حقوق مش له بحجة الحب والارتباط، ومش بنكتشف أن كل دي كانت أوهام غير لما بنصطدم بالمشاكل.
حلك الوحيد إنك تبعدي عنه تماما، امسحي تليفوناته وكل إيميلاته واقفلي كل باب ممكن يخش لك منه، وفكري في المستقبل إنك لازم تحافظي على نفسك، وخليكي غالية واستني الحب اللي بجد، اللي مافيهوش حوارات ومافيهوش مشاكل ولا فضايح، اللي بيتبني على أساس صح بيفضل صح للآخر، صدقيني.

لو عايز تفضفض لنا دوس هنا