أمي بتقول لي: هتعنّسي وماحدش هيبص لك!!

أنا رحت مع أهلي في يوم للنادي، وأخويا قال إن فيه واحد صاحبه جاي عشان يتكلموا معاه على موضوع الشقة اللي أخويا عايز ياخدها في عمارة أبو صاحبه.. المهم ماما فضلت تقول لي قبل ما ننزل من البيت: "حُطّي مكياج"، وأنا باقول لها: "لأ"، فبتقول لي: "شكلك عيانة.. حُطّي حاجة في وشك".. وأنا أصلا مرتبطة بشخص كويس جدا جدا، ومتفقين على الجواز والخطوبة قريب جدا، وهو قال لي إني ماحطش مكياج، وأنا اقتنعت بكده، وقال لي: "زينتك تبقى أدام جوزك اللي هو أنا إن شاء الله"، وبيتقي ربنا فيّ وعمره ما جرحني.
بس أنا ماقلتش لماما على الشخص ده؛ عشان قبل كده وأنا في الجامعة حكيت لها على حد معجب بي وحبيته، وفضلت تعايرني بيه كل شوية؛ يعني بتحب تشمت فيّ والله العظيم، وبتحب تقوم بابا عليّ وضربني كذا مرة وهي بتكون السبب.
المهم نرجع للموضوع.. بتقول لي وإحنا قاعدين في النادي: "صوريه بالموبايل -على صاحب أخويا- من غير ما ياخد باله"، قلت لها: "طلب مايصحش يتعمل، وأعمله ليه؟!" تقول لي: "طب سيبي الشات في الموبيل، وخليكي معانا"، وهو أصلا بيتكلم مع بابا وأخويا على الشقة.
جت تاني يوم تقول لي: "صاحب أخوكي كلم أخوكي بعد ما مشينا قال له إنك عجبتيه"، قلت لها: "أنا أصلا مابصتلوش ولا كلمته"، وهي بتحاول تقنع فيّ إنها مش عايزاني اتجوزه عشان فلوس الشقة تقل من على أخويا.
المهم رفضت الموضوع؛ لأني بجد عايزة اشتغل الأول بعدين اتجوز، وباقول لها إن حلمي من أيام الجامعة إني اشتغل الأول، وأحقق أحلامي، وأثبت نفسي في الشغل، وإني مش اتعلمت عشان أقعد في البيت في الآخر.
المهم قالت لبابا على الموضوع، وقالت له إني أكيد رفضاه عشان أعرف حد أو فيّ حاجة غلط خايفة منها، وبابا فضل يزعق لي، وهي بقت مسودة عيشتي، وتقول لي كلام جارح جدا وشتايم وحشة، وفي الآخر تقول لي: "أنا موافقة عليه هتتجوزيه غصب عنك، وبطلي تمثلي وتعيطي مش باخد من الكلام ده".
ولما قلت للي مرتبطة به كان موقفه إنه قال لي: "هاجيب أهلي وآجي أخطبك"، بس أنا قلت له: "لأ"؛ عشان أكيد هيرفضوه، ماما عايزه الشخص ده عشان فلوس الشقة تقل من على أخويا؛ لأنها هي بتعامل أخويا أحسن مني بكتييير، وبتدعي له وتدعي عليّ، وأنا عشان مليانة شوية تقول لي: "خليكي لما تبقي زي المرتبة وتعنسي وماحدش هيبص لك ولا هيعبرك، هما هيجوا لك على إيه يعني؟!"-وأنا أصلا عندي 22 سنة- ووتفضل بقى تقول لي شتايم وحشة، وكلام مقرف زي: "فيكي علة وحاجة غلط.. وخايفة تتكشفي".
أنا دلوقتي منهارة جدا حلمي بيضيع وأنا باضيع، مش عارفة أعمل إيه؟!! باصلي وبادعي ربنا وباستغفره، بس هي بتقول لي: "أنا وراكي لحد لما تكرهي نفسك وعيشتك"!! وهو جاي كمان كام يوم البيت، أعمل إيه؟! ماحدش في البيت بيسمعني أو بيتفاهم، كله بيزعق وبيتخانق، أنا أجيب أم منين تقف جنبي وتفهمني، وماتجريش ورا مصلحة ابنها.
H.A

لو عايز تفضفض لنا دوس هنا