أنا ممنوعة من السينما ومن الخروج لوحدي أو مع أصحابي ومن الحب لأنه عيب

ممنوعة من إختيار شريك حياتي لأن أهلي هُمَّه اللي عارفين مصلحتي.. إذن.. أنا بنت مصرية!
عزيزتي البنت المصرية اللي لسه حبر شهادة ميلادها منشفش أهلاً ومرحبًا بيكي في عالم اسمه مصر.. في هذا العالم ستقابلين ناس بيعيشو بطريقة ويتكلمو بطريقة تانية.. معندناش بنات تروح سينما.. بابا طب ما أخويا بيروح.. اخوكي راجل لكن انتي بنت ونخاف عليكي.. طب ما انا كل يوم بروح المدرسة لوحدي وبرجع برضه لوحدي ومش بيحصلي حاجة.. هي كلمة واحدة قلتها و مش هتتكرر.. الاسطوانة التانية.. بابا عايزة أخرج مع أصحابي بكرة ونقضي اليوم كله سوا.. لا.. ليه.. هتخرجي ليه أصلا.. أنا كل يوم في البيت مش بعمل حاجة زهقت وبعدين أصحابي بقالي كتير ماشفتهمش.. معندناش بنات تتسرمح في الشوارع هو انتي سايبة ولا ملكيش أهل؟؟؟
ساعة ما تكون ماما فاضية أبقي أخرجي معاها.. طب ما ماما مشغولة في البيت وأخويا والشغل.. خلاص.. ساعديها في البيت.. إنما ساعة ما تكون في ضرورة تخرجي أبقي أخرجي مع مامتك.. هيعاتبوكي علي كل درجة نقصتيها عشان مدخلتيش الكلية الفلانية.. مع انهم مقتنعين أن ربنا عايز كده من ساعة ما اخوكي مدخلش الكلية اللي هما كانو عايزينها.. لن تفهمي ما هو ذلك (التوب) اللي انتي منه لكن العريس اللي موافقة عليه مش منه.. لن تفهمي أبدًا أمك ساعة ما تقولك إن مطبخ شقة ابن أم عادل واسع وهتعرفي تحطي فيه التلاجة والغسالتين والميكروويف.. مع إن أمك نفسها مااتجوزتش بالحاجات دي كلها.. وشايفة إن الميكروويف بيجيب سرطان.. لن تفهمي ليه أبوكي مش موافق عليه عشان شقته100 متر برغم أن هو نفسه اتجوز في شقة 80 متر ولسه عايشين فيها انتي وأخواتك..
عزيزتي.. لن تفهمي لكن عافري عافري عشان حقيقتك بانك بنت مش مجرد كائن بيطبخ وينضف ويغسل ويتجوز ويخلف.. لأ عافري عشان نفسك عشان تكوني بنت بتحلم وبتعافر عشان حلمها.. عافري لحد أخر نفس!