نزلنا السيدة زينب واتكلمنا مع الناس ودخلنا وسطيهم وفتحولنا قلوبهم بجد انهاردة كان ليه طعم غير عادي على قد ما كنا فرحانين على ما قلوبنا اتحرقت على مصر اكتر واكتر وزاد ايماننا بالقضية اكتر وقد ايه حسينا بجد احنا بنعمل عمل عظيم
رحنا مكان اسمه :"الربع" لقينا عشة فيها ست عندها 75 سنة ومعاها 10 ولاده وعيالهم اتكلمنا معاها وهي لما صدقت تتكلم مع حد وكانت بتعيط من كتر ما صعبت عليها نفسها بجد قد ايه قطعت قلبي وحسيت اني ما ينفعش اسكت على ده المهم اول سؤال سالناه ليهم ايه هي مشاكلكم في الحياة ردو وقالو الغلاااااااااااااء اللي احنا عايشين فيه بتقول من سنييين فاتت كانت الفلوس قليلة بس كانت الدنيا رخيصة دلوقتي الفلوس زادت والدنيا غليت ولا عارفة تجيب علاجها ولا عارفة تاكل ولا عارفة تاكل عيالها ونفسها في سقف يحميها بتقول هما نسيو طعم اللحمة و الفراخ والسمك بس بقول الحمدلله بس عايزة اتعالج او امووت والموت احسن بالنسبة لي عشان اريح ولادي من خدمتي وشيلهم همي شفتو وصلت لحد ايه؟؟؟؟ معاهاش حق علاجها بتتمنى تمووت عشان توفر على ولادها الهم والتعب !!!!!!!!! بس تخيلو ست عندها 75 سنة وقالتلي كلمة .... انا كنت معاكم في اضراب 6 ابريل وهبقى معاكم في اي حاجة تانية كلموني قلولي وانا معاكم لحد ما اموت وابنها نجار وايده اتقطعت في حادثة وبردو بيشتغل على قد ما يقدر عشان ياكل ونفسه في معاش من الحكومة او علاج
تاني بييت دخلنا قصدي العشة التانية خافو يتكلمو وقاالو الحمدلله احنا معندناش مشاكل!!!! عايزة اوريكم صورة العشة عندهم حصان صغير عشان راجل البيت شغال عربجي هما والحصان عايشين في مكان واحد وقالو الحمدلله احنا معندناش مشاكل لما طمناهم شوية وحاولو يفتحو قلبهم لينا قالو السكن هو مشكلتنا ...مقسمين العشة لكذة اودة كل اتنين متجوزين في اودة سالتهم انتو عددكم قد ايه ردو وقالو كتييييييير واصلا المكان صغير وكان في ست بترضع ابنها الصغير وفجاة لقيتها بتنيمو في قفص طفل ينام في قفص بدل ما ينام في سرير وبتقول انا معنديش مشاكل ياعيني خايفة حتى تشكي
الناس دي كلها بتعمل ايه في الشتاء؟؟؟؟؟ المهم وتاني حاجة قالوها الغلااااء والدنيا غالية طب المرتب بيكفيكو كل الشهر؟ قالو احنا ملناش مرتب احنا على حسب اليوم بما ان جوزها عربجي فا يوم يلاقي حد يقوله شيل فايشيل وكده جاب فلوس يوم تاني ملقاش حد يقوله شيل يحسو بوجع بطنهم من الجوع ولما سالناهم مين السبب في اللي انتو فيه بان الخوف على وشوشهم !!!!!!!!!!!!!!!
البيت الثالث
دخلنا بيت لقينا عيلة مكونة من اب وام وبنت وولدين عايشين في اودة واحدة والحمام والمطبخ مشترك بينهم وبين الجيران الاودة ضيقة جدااااااااا فيها سرير واخد نص الاودة ومعلقين فوقيه سرير تاني الراجل ده على المعاش وبنته في الجامعة والولدين في مدارس مراته مريضة بالسكر الراجل معاشه بيخلص يوم 15 في الشهر طيب يا عم الحج ايه هي مشاكلكم؟ عم الحج: معندناش مشاكل الحمدلله احنا مستورين وماشين جمب الحيطة الحمدلله بنشكر ربنا على اللي احنا فيه
ياعم الحج مرتبك بيخلص يوم 15 في الشهر ومش عندك مشاكل ازاي؟ عم الحج: ربنا مش بينسا حد طب بنتك بتروح الجامعة ازاي وبتجيب كتب وبتاكل ازاي عم الحج: انا بديها 100 ج في الشهر ء100 دي بتكفيها؟؟؟ عم الحج: لا بس هعمل ايه واجيبلها منيين ده حتى الرئيس الله يعمر بيته زودنا 100 جنيه يعني هيعمل ايه اكتر من كده؟؟ وكمان الوزير طلع في التليفزيون وقال انه هيعمل وهيسوي واحنا مستنين طب مين السبب في ده؟ عم الحج: الشعب هو السبب يعني الحكومة هتعمل ايه يعني ونيجي نسال مراته ترد وتقول انا بشكي لربنا وبدعي ربنا وانا ست بيت ومعرفش مين السبب وربنا مش بينسا حد !!!!!!!!!!!!!!!!!!!!!!!!!!!
واتكلمنا مع الناس في الشارع وسالناهم عن مشاكلهم .. كلهم بيتكلمو عن الاسعار وشايلين هم بكرة كمان لما الاسعار تزيد كمان وكمان
