بيقولوا عنه في الوسط إنه بتاع الناس، قعدته معاهم بيتكلم زيهم، وعلي حسب كلامه في حياته العادية برة المزيكا والغُنا هو ما بيعملش حاجه زيادة عنهم، بإختصار وتحت شعار "خلي البساط أحمدي" ده كان حوارنا مع فوكال بلاك تيما أحمد بحر .. ناس كتير عرفت أحمد بحر من بلاك تيما لكن إنت قبلها كنت بتعمل إيه؟ كنت بشتغل في بنك، بس كنت بحب المزيكا، وكنتش عايز أغني علي فكرة، كنت عايز ألعب يا كي بورد يا إيقاعات، وكنت أعرف رامي يحيي صاحبي الشاعر، وعبد الفتاح وأسامه الله يرحمه صاحبنا برضه، وكنا وقتها عايزين نعمل فرقة، فأسامة قالي خد كلام من رامي ولحنه، وفعلاً لحنت الكلام وسمتعهولهم وانا بدندن اللحن كده، فعجبهم وساعتها زنوا عليا إني أغني وخاصة أسامه قالي وقتها "إنت اللي هتغني يا منعم".. سمعت الكلام و طلعته وقتها من الودن التانية، بعدها بقي كنا بنجهز لفرقة اسمها "جواز سفر" كنت أنا فيها أنا ومريم صالح، عملنا حفلة واحدة في ساقية الصاوي ومكملناش. اتعرفت علي أمير وعبده إزاي؟ كنا في حفلة للأيتام تبع دار الأورمان سنة 2003، وساعتها أمير وعبده كانوا بيغنوا في الحفلة، وأنا كنت بغني لوحدي، ووقتها كنت أعرفهم عن طريق أصحابنا بتوع المسرح، وبعد ما كلنا غنينا جم عرضوا عليا انضم لهم وقالولي "ماتيجي تغني معانا إحنا عايزين حد تالت"، وكان وقتها لسه اسمهم "كاريزما" مكنش في بلاك تيما لسه، ولما عرضوا عليا وقتها حسيت براحة فقولتلهم "أنا معاكم".
أول حفلة ل بلاك تيما لها قصة مش كده؟ أه دي كانت المفروض حفلة ليا أنا في ساقية الصاوي يوم 7 أغسطس 2004، كنت بغني وقتها مع واحد اسمه "مودو"، بس غيرنا بعد تكوين "بلاك تيما" أيم الحفلة وقتها من حفلة بحر ل حفلة بلاك تيما.
بتحب التلحين انت ياتري كام أغنية لحنتها ل بلاك تيما؟ أممم لحنت (افلت زمام – مجنون – النيل تابوت – خليك مستني – يت بيبان يا عالية – زحمة المترو – بننجرح نسكت) وحاجات تانية كتير ..
لحنت لفرق تانية غير بلاك تيما؟ لحنت ل "بشير" أغاني في ألبومه الجاي، ول "دينا الوديدي" أغنية حين كنا"، والفترة الجاية هلحن لمطربين تانيين.. هل ممكن تكمل في موضوع التلحين؟ أنا بحبه بس خايف ياخدني بعيد عن بلاك تيما، لأن كل أولوياتي هي الفرقة.
ليه بلاك تيما بعد 10 سنين من المعافرة والنجاح ما غنوش برة مصر؟ لأن الناس اللي عايزه تودينا نغني بره بيلووا دراعنا، وبيدونا فلوس أقل من اللي بناخدها هنا، يعني باختصار عايزين يمصوا دمنا، وهما اللي يكسبوا، وإحنا مش هنعمل كده طبعاً، طب وليه ما تضحوش عشان تكسبوا جمهور أكبر وتغنوا في مكان جديد؟ ممكن نضحي لو في مهرجان كبير، لكن مقدرش أروح مكان معرفهوش وأغني فيه، ولا ينفع أعمل حفلة أصرف فلوسها ع الأكل هناك.
الألبوم الثاني ليه اتأخر كل ده؟ لا والله إن شاء الله في 2014، التأخير سببه إن كل شوية الأوضاع بتتغير، وإحنا مركزين أوي في الألبوم ده ومش عايزين مجهودنا يروح ع الفاضي، ده غير إن في أحداث كتير بتحصل، فمش لاقيين توقيت مناسب، وفي العيد مطربين كتير نزلوا ولسه في ألبومات جايه أكتر، فعايزين ننزل والناس تركز معانا، لأننا خط مختلف وعاملين سكة تانية غير الحاصل، في التوزيعات والألحان.
ناس كتير انتقدت الألبوم الأول في الألحان والتوزيعات مش خايفين تنتقدوا تاني؟ ليه بس ده الأول كان فيه 9 ألحان بتوعنا، والكلام كان للشعرا أصحابنا، هما 3 أغاني بس اللي مش بتوعنا، والتوزيع؟ إحنا كان لازم نمسك العصايا من النص أقصد الكوميرشال والفن المسقتل، لأننا كفرقة لو اللي بيسمعونا 5 آلاف عايزينهم يبقوا 50 ألف، عايز أجيب الناس تسمعني فلما يحضروا الحفلات اللايف يعرفوا إن في فرق كبير بين الألبوم واللايف، باختصار مينفعش أفضل أغني ل 1000 واحد بس إحنا عايزين جمهورنا يكبر.
بتضايقوا من كلمة "أندرجراوند"؟ لا بنتضايق من المعني اللي وراها، لأن الناس بتاخد المعني الحرفي للكلمة فتلاقي اللي يقولك "ياعم دي فرقة محدش يعرفها" وبيفتكروا إننا فرقة تحت الأرض وده مش حقيقي، أنا بالنسبة لي الكلمة وصف للفرق اللي بتغني كل اللي مينفعش يتغني في إطار المسموح به، بمعني؟ يعني مايبقاش في ألفاظ خارجة، لكن لو عايز تنتقد الحكومة انتقدها طبعاً، عايز تنقد سلوكيات في الشارع أنقد، مثلاً أغنية "طاطي طاطي" ل رامي عصام حلوة جداً، ده غير إن الأندرجراوند اللي التعب فيه أكتر، ليه؟ لأننا بندور علي شعراء – آلات – عازفين – ألحان وتوزيع مختلف عشان نقدمهم للناس.
كتير بيقولوا إن بلاك تيما وغيرها من الفرق ما بقوش أندرجراوند بقوا كوميرشال ردك إيه علي ده؟ إحنا مش هينفع نتصنف أندرجراوند أو كوميرشال، إحنا فرقة مزيكا وبس، إحنا نوع مزيكا موجود في كل حتة.
كلمنا عن تجربتك مع "مشروع النيل" في الموسم التاني منه.. عرضت علي الناس في المشروع إني أشارك في الموسم التاني، لأني بحب النوع ده من المزيكا والغُنا، وكنت عايز أتعلم حاجة جديدة، ولأني كمان في الموسم الأول وأنا بسمعهم كنت حاسس إني معاهم ع المسرح، وده مش سهل إنه يحصلي إني أغير أنا شخص معندوش الغيرة الفنية دي بس حصلت وقتها.. شاركت قبل ما يبدأ المشروع بيومين، وكنت متضايق إني ما شاركتش م الأول، كنت بغني أغنية واحدة، بس أنا كنت عايز أغني معاهم، ولما قولت لمها منيب صاحبتي أنا همشي قالتلي أقعد وسمعت كلامها وفضلت أكتب كلمات الأغاني بتاعتهم زي ما بيقولوها بس بالعربي واحفظها، وتاني يوم جيت حافظ ولما "مايلز" مدير المشروع لاقاني مركز أداني الأغاني كلها علي فلاشة روحت البيت قعدت أغنيها وحفظتها كلها، وده كان بالنسبة لهم غريب لأنهم بيعملوا دع من 4 شهور وأنا أنجزته في يومين! بس هما فعلاً ساعدوني كتير واتعلمت منهم، واتمني أشارك في الموسم الجاي.
إنت الوحيد اللي ما ممثلتش في بلاك تيما مفكرتش تجرب؟ اتعرض عليا قبل كده أمثل في مسلسل بس رديت بإني ما بعرفش أمثل، وكانت الناس ترد عليا "ومين قالك إنك ما بتعرفش تمثل مش أنت بتأدي في كليباتكم ما هو ده زي ده"، فقررت أخد كورسات وأنا حالياً باخد فعلاً كورس تمثيل، عشان لو اتعرضت عليا حاجه أعملها بشكل محترم.
بيقال إن جمهور بلاك تيما "الجمهور الأسمر" تركيبته اتغيرت في الكام سنة اللي فاتت وإن ده ممكن يهدد الفرقة هل ده حقيقي؟ الموضوع مش في بلاك تيما بس، ده حاصل مع فرق كتير، وحرام يقولوا ده ع الجمهور الأسمر بس، الحدوتة بدأت في بلاك تيما لأن مكنش في ألتراس للفرق غير لنا بعد منير طبعاً، وكان الألتراس في الأول بيولوعوا شماريخ ، لكن لما اتكلمنا معاهم فهموا الدنيا وبقوا دلوقتي يجيبوا بانرات عليها كلمات الأغاني، ده غير إن محدش بينقي جمهوره من ع القهوة، دي ناس بتروح تجيب تذكرة عشان تسمعنا، "وأنا شغلتي أغني"، بس ارجع وأقول إن مينفعش واحد يبقي أناني ويتسبسط لوحده بس، الكل لازم يتبسط.
هو بلاك تيما غنت مع منير قبل كده؟ غنينا قبل كده في حفلة قبله، والمفروض كان لنا حفلة معاه في السودان بس الثورة قامت بقي ساعتها فالموضوع ما تمش، بس نتمني كبلاك تيما نشارك معاه طبعاً في أغنية، محمد منير أصله بالنسبة لنا أب إحنا بنحبه علي طريقتنا، هو الملك، بيقال إنكم هتكملوا من بعده.. لا هو منير بس مفيش حد بداله هو الملك وإحنا أولياء عهد الملك.
لما بتشوف فرق الفن المستقل هي اللي ع الشاشات وفي الإعلانات ع الطرق بتحس بإيه؟ بحس بأمل وإن مبقاش في إحتكار لنوع مزيكا بعينه، ولا لمطربين بعينهم، وإن ده باب لنوع مزيكا تانية تشتغل، ونفسي يبقي في أضواء أكتر علي الفن النوبي، لأنه من الفنون المصرية الأصيلة، وإن وزارة الثقافة والتليفزيون يهتموا به ويدوروا ويسجلوا أغاني التراث النوبي لأنه فن عالمي. لينك فيديو أحمد بحر فى مشروع النيل
