مدرب تنمية بشرية بدرجة طبيب أسنان ؟!

ممكن اعرف انت جاي هنا ليه ؟!
- عشان انا تعبت حضرتك وكذا واحد من زمايلي قالولي أن دكتور حسين احسن واحد في مصر في التنميه البشريه والعلاج بالقوه الروحيه
اه فعلا دي حقيقه !! مشكلتك ايه !
-انا دكتور أسنان شاب في مقتبل العمر...بشتغل في وزارة الصحه... وفي أماكن لو استاندرد عشان اتمرمط واشتغل كتير وابقي متميز... كل مشكلتي هي التعامل مع الناس... انا بحب الأسنان...بس بكره التعامل مع البشريه اللي بشوفها
ممممممممم... طبعا بتشتكي أن الناس بتفاصل معاك وبتقرفك وبتحسسك انك بياع تين شوكي سارح بعربيه ؟!
-بالظبط كده حضرتك
وان بيجيلك عيانين بيضربوا ترامادول ويقولك زودلي البنج عشان مبيأثرش معايا ؟!
-اه فعلا ده بيحصل
وتجيلك ام تقولك والنبي اخلع لأبني من غير بنج عشان البنج مبيخليش السنان تطلع ؟!
ايوووووووووووووووه
أو أول ماتدخل العياده تغطي وشها بالطرحه عشان... ريحه البنج !! اللي مالوش ريحه اصلا
-ايه ده...بيحصل كده بالظبط
أو تقولك ونبي حطله" جيلي" قبل ماتديله الحقنه !! اللي هي فاكره نفسها في لابوار
- واكيد وانت بتعمل حشو عصب لو حس بوجع وانت شغال بيقولك هو لسه العصب مامتش !!
تقوله لأ مات...
- RIP
و فيه ناس تقولك على اللثه... لسته !!... والا يفيه المشهور بتاع ايه ده !! هخلع ضرس العقل وابقي من غير عقل نياهاهاها (ايموشن أحمد ادم )
اه بالظبط
وممكن عيان يقفش عليك ويسبلك 100 مله عشان...انت قولتله مش محتاج مضاد حيوي...اللي هو احا بجد ازاي مفيش دوا !! امال انا جاي ليه ودافع كشف ليه !!
- أو تجيلك حاجه كبيره تقولك أن بنتها اللي في البيت عندها التهابات وخراج وعاوزه مضاد حيوي....بناءً على تشخيصها هي طبعا...أو تقولك اكتبلي شريط مضاد حلوي -بكسر الميم-...عشان بجرشه على العلف للفراخ عشان متسهلش... وطبعا قاطعه تذكره بجنيه وهتذل اهلك بيها
اه حصصصصصصصصصصصصل
أو يجيلك واحد ومراته وعياله....ويدخلوا من غير كشف ويقولولك هنسأل بس مش هنكشف...وتلاقي نفسك بتعملهم كل حاجه... وبتغير للعيل الصغير كمان
-وبيجيلك اللي يقولك ممكن تغسلي سناني عشان انا عمري ماغسلتها !!
-ايوه ايوه كل ده بيحصل !!! بس انت عرفت كل ده منين !!!!!!!!!!
انا دكتور حسين محمد.... طب أسنان القاهره دفعه 2006...بس مقدرتش استحمل واكمل ومعرفتش اعالج الكلام ده..فلجأت للتنميه البشريه واهو أي سبوبه والسلام !!
- ايه !! طب انا عاوز حل عاوز علااااج !! امال انا دافع 100 جنيه كشف ليه !!
حالتك ملهاش علاج...والا كنت حليتها لنفسي ومسبتش المهنه
طب ايه خلاص كده !!! طب اكتبلي مضاد حيوي طيب...أي حاجه