قال الشاعر الغنائي مرسي جميل عزيز في إحدى لقاءاته الإذاعية عن علاقته بأم كلثوم: «كان أول لقاء بيننا عجيب أوي، أول ما ظهر لي أغاني لقيتها بعتالي واتفقنا لكن لم نتعاون، حتى جاء محمد الموجي وقال لها عايزاني أشتغل معاكي هاتي مرسي جميل عزيز، قعدنا واشتغلنا مطلع ولحنه الموجي». ويضيف مرسي جميل عزيز: «تملكتني فكرة شريرة وهي أنني طالما لوحدي بوصل ناس أو بوصل للناس مع مطربين، ليه أتشعبط في أم كلثوم ويقولوا إنها سبب شهرتي، فهربت، اتصلت بي أم كلثوم وقالت لي أنا عايزاك.. عايزة أقعد معاك مش مسألة أغاني». ويتابع: «أم كلثوم قالت لي إنت عيان، عايزين نوديك لدكتور أمراض نفسية، يعني إيه تقعد معايا وبعدين تهرب، فرحت حكيت لها خوفي من الشغل معاها وإني بعتز بنفسي ومش عايز يتقال إنك سبب شهرتي، قالت لي لأ جايز ده كان ممكن يحصل من 10 سنين لكن دلوقتي بقى اسمك كبير، قول ده في تاريخك محدش هيقدر يقولك حاجة، قلت لها طيب أدي ثلاثة مطالع عندي اختاري واحد منهم، قالت لي الثلاثة حلوين أغنيهم كلهم، وكانت الثلاثية الشهيرة سيرة الحب، فات الميعاد، ألف ليلة وليلة» https://www.youtube.com/watch?v=1RcNVRfOn4c