بالخطوات.. إزاي تنزل أربعين كيلو من غير تعب؟

كريم جودة من ألمع المصممين الفنيين بين جيله يحكى فى تلك السطور تجربته مع إنقاص وزنه والفرق بين الصورتين سنة ونصف أنقص وزنه فيهما حوالى أريعين كيلو جراما.. أولاً أنا مش عامل دايت، أنا من كتر ما الحمد لله اتعودت أنى أصحى من النوم أفطر فطار معين، وبتغدى غدا معين وعشا معين وبغير فيهم كل مرة ومرة، مش شرط أكون بعيش عالتونة والفراخ المشوية وكده، بس أنا مقاطع شبه تماماً أى حاجة بتحتوى على الأربع حاجات دول:
1- الأكل المقلي 2- الأكل المعمول بالسمنة 3- ملح 4- سكر
وفى فرق شاسع بين دايت وريچيم، الريچيم ده اللى معظم الناس بتتبعه مع الدكتور، الدايت بيكون عبارة عن أسلوب حياة يعنى، ممكن فى ناس تكون عاملة دايت فواكه، مش بياكلوا غير فاكهة، وفى كذا نوع من أنواع الدايت.
الموضوع ممكن يكون مش مشجع أنى بصحى الصبح أفطر شوفان مع موزة وتفاحة على عكس ما كنت متعود على الفول والطعمية والبطاطس المقلية، بس برضه فى طرق أحسن للمعدة وبيكون برضه طعمهم حلو.
الcheat meal بتاعتى بتكون مرة فى الشهر، أيوة مرة واحدة فى الشهر.. ليه؟ وإزاي؟ عادى، من كتر التعود على الفاكهة والمشويات والأسماك وتقريباً كل الأكل اللى مافيهوش الأربع حاجات اللى قلتهم فوق، تمام.
If it was easy- everybody would do it.
مياة كتير، عصاير فريش، فاكهة، كلها حاجات مفيدة للجسم، وبتفرق جداً، الخضار، اللحمة، الفراخ، السمك، الكارفس، والبيض. جسمك لما يتعود على الحاجات دى، واللى ممكن تعملها بكذا طريقة، إزاي؟ الاإنترنت لو كتبت بس على جوجل healthy food recipes هيطلعلك 500 لينك تقدر تستعملهم، لما تلاقى حاجة المفروض تستعملها، دور على البديل بتاعها.
التمارين:
الحمد لله بتمرن كل يوم، كل يوم ساعة، هى ساعة فى اليوم وخلاص، جرى، سويدى، كروسفيت، كورة، بوكس، هى ساعة فى اليوم.
جسمك هيبدأ يتعود على كده، بس فى حاجة، عشان أنا أصلاً كنت رياضى من وأنا صغير، عشان بس ميطلعش واحد يقول أنى شجعته ويرفع عليا قضية !
أبدأ بالراحة وبشويش، ولا مش بجيب حاجة من حد، ومش بروح أسأل غير جوجل وساعات المدرب بتاعى فى الكروس فيت أو البوكس غير كده، بحب أعتمد على نفسى.
كل حاجة فى إيدك إنك تبنيها من أول وجديد، من الناحية الصحية والجسدية، منها تبطيل السجاير، والبيرة، والحمد لله يعنى بحاول أبطل خمور خالص وداخل أهوه على شهرين من غير خمور وسنتين من غير سجاير.
مابقيتش مهتم أنى أعرف وزنى بقى قد إيه، أو نسبة الدهون، الأهم دلوقتى أنى أشد الجلد الزايد عندى فى الفترة دى وأركز على نفسى نفسياً برضه.