مش عاوزة أعمل ريجيم في رمضان!

المهم في الريجيم البحث عن حافز لإنقاص الوزن.. لكن لو بدأنا الريجيم في رمضان، وبدأنا نشعر إننا مش قادرين نكمّل وخايفين جدًّا نضيّع تعب الشهور اللي فاتت، وخاصة لو كنا بدأنا ريجيم قبل رمضان وخسرنا عدد كبير من الكيلو جرامات...
حتى لو لم نبدأ ريجيم وقررنا نأجّل الريجيم لبعد رمضان والعيد، لكن في نفس الوقت مش عايزين نتخن ومش عارفين نعمل ريجيم!
* يا ترى نعمل إيه؟
باقول لكل واحد مش قادر يخس أو مش عاوز يخس، ممكن نثبت الوزن، وأعتقد إنه الشيء المنطقي في رمضان، وخاصة إن البعض بيشعر إنه من الصعب أن يلزم نفسه بشيء في الصيام...
وعلشان نحافظ على وزننا ناكل على قد ما الجسم بيحرق سعرات حرارية... يعني لو بنت هتكون محتاجة إلى 1800 سعر حراري، ولو ولد هيكون محتاج إلى 2200 سعر نقسم السعرات على مجموع الأكل اللي بناكله طول اليوم؛ يعني لو حبينا ناكل قطايف لازم نبقى عارفين إن واحدة من القطايف الصغيرة تحتوي على 300 سعر حراري...
وبما أننا لا نعرف عدد السعرات الحرارية لأغلب الأكل ففيه طريقة أسهل، وهي إني أحرص على الوزن كل أسبوع؛ علشان أعرف وزني قد إيه، وآكل عادي بس نصف الكمية اللي أنا متعوّد عليها؛ يعني لو متعود آكل طبق أرز أكتفي بنص الطبق.. يعني كل الأكل مسموح به بس نص الكمية...
والحلو يوم قطايف وأكتفي بواحدة وأكمل الحلو بالفاكهة وتكون تفاحة أو كمثرى، أو يوم كنافة أو أي حاجة حلوة، واليوم التاني يبقى الحلو فاكهة مع الحفاظ على أن يكون بين كل وجبة والتانية مش أقل من خمس ساعات مع الانتظام في ممارسة الرياضة.. وفي نهاية الأسبوع أوزن نفسي، لقيت الوزن زايد معناه إني تجاوزت السعرات الحرارية المقررة في اليوم، وأبدأ أقلل في الكمية، وأزود في الفاكهة شوية بدل الحلويات، وأمارس رياضة أكتر.
* لو كان الوزن أقل.. نعمل إيه؟
في الحالة دي أزوّد من الحلويات شوية أو أزوّد في كمية الوجبة، والميزان دائماً هو ما يُوجّهني إلى تقليل أو زيادة الأكل.
* ممكن تقول لنا بعض النصايح اللي المفروض نتّبعها على الفطار تساعد على تثبيت الوزن؟
مهم نعرف مكوّنات الأكل اللي هنتناوله علشان نقدر نحدد مدى تأثيره علينا..
- نبدأ بالشوربة وهي طبق رئيسي على الفطار، وعلشان نشربها وإحنا بنثبت الوزن ممكن نشرب شوربة الفراخ بعد وضعها في الثلاجة، ونشيل الوش أو الطبقة الدسمة اللي على الوش، أو نشرب شوربة طماطم أو شوربة خضار؛ وفيه بعض الناس في الحر ممكن يستغنوا عن الشوربة.
- التمر من أساسيات الإفطار والبعض بيتناوله لأنه سنّة، وطبعاً التمر بيحتوي على قيمة غذائية كبيرة، ولكنه يحتوي على سعرات حرارية عالية جدًّا جدًّا.. في الريجيم العادي غير مسموح به أبداً وهو من الفاكهة الممنوعة؛ لكن في التثبيت أو في الريجيم الخفيف هو مسموح، لكن بكمية قليلة جدًّا يعني تكفي واحدة أو اثنين بالكتير... يبقى أنا كده عملت السنّة بدون إسراف أو تفريط.
- من الحاجات المهمة شرب المية وخاصة للبنات والستات؛ لأنهم بينسوا المية خالص، والمية مهمة قبل الأكل ووسط الأكل وما بتعملش كرش أبداً.
* إزاي نتعامل مع الفطار صح؟
أولاً ناكل تمرة أو نشرب الشوربة، ونصلي المغرب خلال ربع ساعة تكون المعدة اشتغلت، بعد كده نبدأ في وجبتنا الرئيسية، ويكون فيها كل حاجة: نشويات أربع ملاعق أرز أو مكرونة أو عيش بلدي، وطبعا أُفضّل لو استخدمنا الأرز البني والبسمتي والمكرونة السن، ويكون على الفطار طبق خضار ني في ني، وعلى فكرة أغلب الناس النهارده بيحبوه، ممكن نحط عليه سمنة أو زيت لكن كمية قليلة جدًّا... والبروتين ربع فرخة منزوعة الجلد أو قطعة لحمة مشوية أو على حسب الرغبة.
وطبعاً السلطة والفاكهة نهتم بهم جدًّا؛ لأنهم بيساعدوا على انتظام الجهاز الهضمي اللي بيضطرب في رمضان؛ بسبب اختلاف مواعيد الأكل، وبعد التراويح ناخد قطايف أو فاكهة.
وفي السحور زبادي أو فول أو جبنة قليلة الدسم أو جبنة قريش بكميات قليلة ونقلل الملح... ونقلل المخللات ونكتفي بحاجة بسيطة منها على الفطار لو الضغط منخفض؛ لأن الحر والصيام بيخفضوا الضغط.
* هل فيه عصاير ممنوعة؟
ممكن نشرب عصير مانجو لكن بكمية قليلة، ويكون أفضل لو كان عصير برتقال لإن سعراته الحرارية أقل... كمان من العصاير المفيدة في رمضان العرقسوس والكركديه، وممكن نحليه بالسكر الدايت أو بالكندريل، أو أي بديل للسكر علشان نقدر نشرب براحتنا أي كمية من العصير.
* طب وقمر الدين والخشاف؟
أنا ضد فكرة المنع، لو أنا مش عامل ريجيم كلنا متربيين على الخشاف والقمر الدين... ودي من الحاجات الجميلة المرتبطة برمضان من زمان، وكل البيوت المصرية لا تخلو موائدها من الخشاف؛ لكن أهلنا كانوا بيتحرّكوا أكتر مننا، النهارده إحنا عايشين في زمن الريموت كنترول ونادراً ما نتحرّك، ممكن ناخد قمر الدين والخشاف لكن بكميه قليلة جدًّا؛ لأن سعراتهم عالية جدًّا.
* في السعودية بيتعاملوا مع الفطار بشكل مختلف؛ بعد المغرب بياكلوا تمر وحاجة خفيفة، والوجبة الرئيسية بعد صلاة التراويح... هل النظام ده بيساهم في تثبيت الوزن وممكن إننا نطبَّقه؟
لما بنسافر للعمرة التمر بعد المغرب بيدينا طاقة كبيرة علشان نصلي لمدة طويلة، وبيدينا نشاط، وبدون أن نشعر بالجوع أو العطش، وفي الثانية عشرة بعد صلاة القيام نأكل الوجبة الرئيسية، بالإضافة إلى المجهود الذي نبذله في الصلاة، وفعلاً وزننا بيقل كتير... وممكن نطبّق نفس الأسلوب هنا، وممكن يساعدنا في التثبيت... لكن على شرط ألا تكون الوجبة الرئيسية قبل صلاة الفجر أو قبل النوم مباشرة.
اقرأ أيضاً:
* ريجيم معقول 2 - 3 كيلو
* ريجيم عادي 5 - 6 كيلو