بلدنا.. وبلد ولادنا

كنّا عارفين ان السيسي هينجح وباكتساح في الانتخابات الرئاسية بس كنّا خايفين ان الشعب يتكاسل ويعتمد علي ان الرجل ناجح ناجح..الرسالة إللي بعتها الرئيس لأمهات مصر في الاحتفال بعيد الام كان مضمونها ان البلد لسه في خطر.. وان احنا محتاجين نثبت للعالم اننا إيد واحدة وبننزل ونشارك في الانتخابات.. مضمون الرسالة ماكنش مهم تنتخب مين بس كان الأهم انك لازم تشارك وتنزل..الملحمة الوطنية إللي قدمها شعب مصر للعالم تؤكد اننا شعب عظيم بجد وبيفهم وما بيتضحكش عليه..انا بس كل إللي عاوز اقوله ان نغمة اننا هنعيش في رخاء وان الدنيا هتبقي تمام ده مش هيحصل ولا عمره هيحصل الا لو كملنا المشوار مع بعض واستحملنا شوية كمان.. واشتغلنا بجد وحافظنا علي كل إللي اتحقق.. ما ينفعش نصرف مليارات علي محطات تحلية المياه وفي الآخر نرشها في الشوارع.. ما ينفعش نعمل محطات كهرباء بمليارات الدولارات وبعد كده نسيب أعمدة الانارة منورة ليلا ونهارا.. ولا كمان ينفع نبهدل شبكة الطرق ولا المستشفيات والمدارس إللي اتجددت..المرحلة إللي جاية بقت محتاجة اننا نصدق بجد ان البلد دي بلدنا وبلد ولادنا.. احنا دفعنا كتير اوي علشان نحافظ عليها وعلشان كده لازم نتفق اننا هنكمل المشوار..بلاش جشع واستغلال..وبلاش سرقة ورشاوي.. خلونا نصدق ان كل إللي أتعمل في السنيين إللي فاتت كان بايدي المصريين.. ونصدق كمان ان السيسي راجل وطني وصادق وتعب معانا اوي علشان يوصل بينا لبر الأمان.. الانتخابات قالت ان إللي اتعمل من الشعب والفرحة والرقص كلها كانت مظاهر تعبير عن الفرح بعد ما نجحت مصر بفضل شعبها العظيم في اجهاض المخططات الدولية.. اوعوا تنسوا ان لولا الجيش والشرطة في ضهرنا ما كناش نقدر نعمل كل ده.. الخونة مش هيسكتوا ولا هيعجبهم نجاحنا.. علشان كده لازم نكمل المشوار وايدنا في أيد الراجل المحترم إللي ما بخلش علي مصر باي حاجة.. جهد وعمل واخلاص ووطنية وإحساس بالناس.. كل إللي اتعمل في مصر ما جاش لا بالصدفة ولا بالدعاء.. لا ده بجهد وعرق ودم.. لو هنشكر حد بجد نشكر كل أم مصرية أصيلة تصدرت المشهد في معركة البناء وايضاً في معركة الحرب علي الاٍرهاب.. الام المصرية قدمت للوطن الشهيد من الجيش والشرطة.. الام المصرية قادت السفينة لانجاح اصعب برنامج إصلاح اقتصادي.. الام المصرية نزلت في الانتخابات وفرحت ورقصت لانها حسّت ان تار ولادها جه.. وأنها بتجني ثمار الصبر والكفاح.. مصر يا سادة فيها شعب عبقري بالفطرة.. ما لوش كتالوج.. يتحرك لوحده وبيتحمل لوحده ويعرف يحمي بلده من الخرفان كويس اوي.. بس كمان الشعب ده بقي محتاج يحس انه هياكل سمك من المزارع الجديدة بأسعار عادلة.. زي ما حس انه بقي يمشي علي طرق محترمة وأكثر أمانا.. دعونا نبدأ المرحلة الثانية مع السيسي بكثير من التفاؤل والعمل.. شكرا لكل من ساهم في إنجاح العملية الانتخابية من الجيش والشرطة والقضاة والإعلام المحترم.. وكل الشكر لكل مواطن شريف ساهم في إظهار مصر امام العالم بالصورة التي تستحقها.. وتحيا مصر.