اعمل ثورة

هو إحنا ينفع نتغير ؟
أيوة يا سيدى مصر بتتغير ورايحة لمستقبل أفضل بإذن الله.. وربنا كرمنا برئيس وطنى.مخلص. جرىء.. ولة رؤية ويمتلك طموح وآمال ويرى أن مصرَ يجب أن تكون فى المكانة، التى تستحقها بالفعل ويعمل مُنذ اليوم الأول لتولية الحكم على ذلك. طيب كويس ربنا يسهل ويتمم على خير.
النهاردة أنا رايح أخلص شويه أوراق فى مصلحة حكومية ومعايا واسطة وظبط الدنيا.... وفى واحد هناك هيخلصلى كل حاجة !
إية يا عم هو مش الكلام ده انتهى وهنبتدى شغل على نضيف ومفيش وسايط ؟
معلش يا عم الناس معذورة ما هى المعايش والحياة صعبة. ولازم الراجل يربى عياله يعنى هو مرتبه هيكفى تعليم ولا اكل ولا علاج ولا سكن....لازم يمشى حاله علشان يعرف يعيش !!!
بس مش هو... لوحده اللى بيعمل كده ده فيه ناس كتير فى أيدها مصالح الناس.. بتعمل ده وتوقف المراكب السايرة لحد لما تراعيها.
طيب واحنا كده هنعرف نجذب مستثمرين سواء مصريين أو أجانب فى ظل وجود الناس ديه ؟؟
يا سيدى فى أغلب المصالح بلا استثناء..استحالة تخلص مصلحة أو ورقة من غير من تفتح دماغك وتدلع الناس علشان أمورك تمشى...و‘لا لو عندك مشروع...من أول كشك السجاير لغاية أكبر مصنع وشركة فى مصر هيتعمله كل يوم قضية وكله جاهز ومترتب ومتستف بالقانون.
أيوة من أول إشغال الطريق وعدم مراعاة الحماية المدنية والتفتيش الصحى والتموين والحى..................... الخ
والشارع بقى فوضى خالص وبلطجة وتسيب وإهمال.واللى عايز يعمل أى حاجة بيعملها ومحدش بيتكلم ولا يعترض
إزاى يعنى ؟؟؟.................. أقولك أنا يا سيدى
اللى عايز يحجز مكان تحت بيته أو شركته أو محله.. هما خازوقين حديد وسلسلة وقفل وخلص نفسك... آه زى مابقولك كده...والأفندى ماشى عكس الاتجاه فى شارع عمومى ! والبيه سايق العربية بنمر عاملها عند عم عبده الخطاط أو منتهية من 6 سنين على الأقل أو من غير نمر خال ويكسر عليك فجأة ويوقف قدامك فجأة..وجرب تعاتب حد أو تمشى صح هتتبهدل وتتشتم وتتهزق كمان وممكن تضرب لو حبيت أما الاستاذ المحترم ده ( مفيم العربية ) واستحالة تشوف اللى جواها... معقول لسه بيحصل كدة !!!
أيوة لسه بيحصل كل يوم وفى كل شارع
أما الأسعار"فحدث ولا حرج ".....كل واحد يسعر بمزاجه أصل سوق مفتوح والغاوى ينقط بطاقيته واللى مش عاجبه ميشتريش.
طيب والتعليم عملنا لجنة وسوف يتم تطويره بإذن الله وبالنسبة للإسكان فى لجان وهنعمل مشاريع ومدن سكنية إن شاء الله.
يا عم أنا مش مكدبك خالص بس لما يعملوا مدن سكنية يعملوها بتخطيط متوازى مع الاستثمار.. مش اسكن فى عين شمس واشتغل فى أكتوبر أو العكس أو العبور واسكن فى فيصل أو المعادى وهيقدر وقت كتير فى مواصلات وبنزين وزحمة وتكدس شوارع على الفاضى
وغيره كتير وكتير من المشاكل. دية مجرد عينة منها
للأسف فى أغلب المصالح لسه ( عويجة افندى ) بتاع فيلم أرض النفاق للراحل المبدع فؤاد المهندس موجود ومربع فى كل مصلحة وهيئة ووزارة فى مصر نفس العقليات نفس التفكير نفس الآليات.
طيب والحل أيه
الحل سهل جدا وبسيط.... الحل....... طبعا نعمل ثورة
نعم أنت بتقول ثورة تانى أنت بتهزر ولا بتتريق إحنا تعبنا وزهقنا وجبنا آخر أخرنا كفاية بقى ..
نعيش كدة وخلاص ده نصيبنا إحنا هنقضيها ثورات
لالا أنت فهمتنى غلط.... أنا قصدى ثورة مع الرئيس مش ضده. ثورة مع أى مواطن مصرى محترم.. ضد كل مظاهر الفساد والإهمال والبلطجة..لازم نأخد مواقف بجد مش نقعد ننتقد ونتفرج وخلاص زى ما عملناها قبل كدة وحققنا المستحيل فى سنتين ونص لازم نكمل اللى ابتدينا.
كفاية سلبية وتراخى وتردد زى ما كان عندك إيمان بوطنك وبلدك وفضلت تنزل من نوفمبر 2012 لحد يوليه 2013 لحد لما رجعت بلدك من العصابة الإخوانية وأعوانها فى الداخل والخارج... والأهم إنك رجعت هويتك. رجعت المصرى اللى بصحيح. جدع. شهم. يقف جنب أخوة كتف فى كتف. فى كل ميادين مصر ينام... قدام وزارة الدفاع... ويطلب منها تنفذه وتنقذ بكرة بتاعة وبتاع أولاده وأحفاده.
ليه ضعفت فى نص السكو. ليه مش عايز تكمل المشوار. لسه البلد محتاجة كتير محتاجة نحارب التعليم الفاشل والمرض اللى معشعش فى قلب الوطن محتاجين تقاوم فساد سنين طويلة اوى.... مش هيخلص فى يوم وليلة محتاجين
ثورة على ثقافات مجتمعية باليه.. تفرق ولا تُجمع تهدم ولا تبنى
وفكر متسلف وهابى فى مصر من 50 سنة
ده كان حديث بين شابين مصريين ممكن يتكرر على الاقل 1000 مرة كل يوم والنتيجة
النتيجة إننا مش بنتعلم شغالين على "أبو قديمة" نفس الفكر ونفس الآليات ونفس الجمود.. مش بالرئيس وحدة ومش بالحكومة وبس.
مش بعبده روتين وعويجة أفندى وفوت علينا بكرة يا سيد
الكرة لسه فى منتصف الملعب والهجوم علينا شديد.. بس حائط الصد المصرى... قادر يكمل مشواره