«الرقاصة» اتعملت مليون مرة في السينما.. مي عمر ترد علي انتقادات «إش إش»

خلال الساعات القليلة الماضية ردت النجمة مي عمر على الانتقادات الموجهة لمسلسلها الأخير "إش إش" بسبب احتوائه على مشاهد رقص.
وقالت مي عمر خلال حوارها مع الاعلامي عمرو أديب الرقاصة اتعملت مليون مرة في السينما وفي الدراما، المهم التناول معمول ازاي، هل في "إش إش" أي مشهد يخليك إيه دا مكسوف وازاي دا مش المفروض بيتعرض في رمضان، بالعكس، دا كان من الحاجات الصعب تحقيقها، وعشان نحققها خدت مجهود مننا، إن أوصل فكرة إن هي رقاصة بس بلبس مش مكشوف.
وأضافت مي عمر "ماخوفتش إني أقدم راقصة في رمضان لإني عارفة التناول اللي واخدين منه الموضوع عامل ازاي، في ناس كتير كانت فاكرة قبل رمضان لما شافوا البوستر وسمعوا إن هي رقاصة، فقالوا قصة حياة راقصة وصعودها، احنا مش كدة خالص، إحنا قصة اجتماعية لكن الإطار بتاعها في عالم مختلف".
اقرأ أيضا|مي عمر تكشف سبب حب الجمهور لشخصية رجب الجريتلي في «إش إش»
وأكدت مي عمر: عالم الرقاصة عمل لغة مختلفة ولغة جسد مختلفة وعمل شكل مختلف ودا اللي احنا كنا عايزين نوصل له ودا اللي استغليناه، عشان هي رقاصة، فطريقة كلامها مش زي شخص عادي، طريقة لبسها مش زي شخص عادي، وحتى الحيل بتاعتها مش زي واحدة محامية، دا اللي كنا عايزينه، الهدف مكنش الرقص، والمسلسل كله 30 حلقة فيه 3 أو 4 رقصات، ولا يتعدوا ال8 دقائق، الرقص مش هو الموضوع هو العالم.
وقالت مي عمر عن حقيقة استعانتها براقصة محترفة "الدور كان محتاج رقاصة، كان لازم اتمرن كتير جدا، وكان فيه مشاهد فيها راقصة بديلة (دوبلير)، لأن كان في حركات عايزنها احترافية، عشان كنا عايزين نطلع الموضوع مش هاوية، هي رقاصة متعودة ترقص في أفراح الشوارع، وكان لازم دا يظهر في بعض الأوقات".
مسلسل "إش إش"
مسلسل "إش إش" من بطولة مي عمر، ماجد المصري، انتصار، إدوارد، هالة صدقي، دينا، شيماء سيف، طارق النهري، عصام السقا، علاء مرسي، محمد الشرنوبي، ندى موسى، إيهاب فهمي، حمدي هيكل، أحمد عبدالله، وعدد من ضيوف الشرف وهم: محمد ممدوح، خالد الصاوي، كريم فهمي، محمد عبدالرحمن، أحمد زاهر، والعمل من تأليف وإخراج محمد سامي.
أحداث مسلسل "إش إش"
تدور أحداث مسلسل "إش إش" حول فتاة ترث من والدتها الجمال والفقر تدعى "إش إش"، وتجد نفسها مضطرة أن تعمل كراقصة، وتدخل إلى عائلة الجريتلي عن طريق الصدفة، لتكتشف أن ما تمر به ما هو إلا امتداد لأسرار مدفونة داخل هذه العائلة.