«ضهري اتكسر».. ألفت عمر تكشف اللحظات الأخيرة لوالدها قبل رحيله

وجهت الفنانة ألفت عمر رسالة شكر لكل من وقف بجانبها وتحدثت عن لحظة معرفتها بوفاته، وذلك خلال ظهورها الأول فى برنامجها "مع ألفت" الذي يعرض على قناة هى، وقالت «ألفت عمر»: " ضهري اتكسر بعد وفاة أبويا .. جريت على المستشفى أوريله نجاحي بعد ما عملت برنامج لقيته متوفي من 3 دقايق .. «حتى أنا اللي سبلتله عينه».
إقرا ايضا: اليوم .. عزاء والد الفنانة ألفت عمر بمسجد عمر مكرم
وأضافت ألفت عمر: "أهلا بيكم مشاهدينا من جديد مع حلقة جديدة مباشرة على الهواء، "مع ألفت" برنامجي اسمه مع ألفت والحقيقة النهاردة من أصعب مواقف أمر بيها في حياتي قدام الكاميرا علشان أن أنا أقدر اتكلم عن موضوع البرنامج النهارة وهو "الفقد"، الحقيقة أن الإنسان لما يفقد أبوه بيحس أن ضهره اتكسر، هو مصدر الأمان والحياة بتبقى تقريبا معتمدة بنسبة كبيرة جدا على الأب وأنا بدل ما أطلع ابتسم في وشكم وأضحكم، النهاردة عايزة أشاركوا أحزاني".
وتابعت ألفت عمر: "مع الأسف هشاركوا غصب عني أحزاني في بابا، بشكر كل الناس اللي دعيت له، كان موقف صعب عليا أوي بس كل الناس وقفت جنبي ودعيت له بس ربنا أراد أنه ياخده معاه جنبه في حته أفضل أعذروني النهاردة لو أنا مكنتش كويسة كفاية قدام الكاميرا بس إن شاء الله هكون أحسن وبابا في مكان أحسن ومسألة الوجع دا إن شاء الله هقدر أعديه بدعواتكوا وحضركوا معايا وإن شاء الله روح بابا حواليا فرحانه، المرة اللي فاتت بعد ما خلصت الحلقة الأولى جريت جري على المستشفى عشان أوريه عشان هو كان بيفرح جدا لما بيشوفني في أي حاجة من نجاحاتي فكنت عايزة أرفع من معنوياته وخدت الصور والفيديوهات وجريت عليه عشان أوريهاله بس لقيته متوفي بقاله 3 دقايق وحتى أنا اللي سبلتله عينه، مش عايزة اضايقكوا خالص والله بس اعذروني لو حصل النهاردة مبقاش قد الحدث".
وخلال الحلقة تلقت مداخلة هاتفية من الفنان أشرف زكي قال لها:"شيدي حيلك يا حبيبتي كلنا معاكي وزي ما قلتي هو في مكان أحسن بكتير وأنا عايز أقولك إني بشكرك لأنك أديتي واجبك كبنت باره بأبوها وأديتي رسالتك وأنا عارف أنتي عملتي إيه وربنا يصبركوا، وبشكرك مرة أخرى لأنك جيتي تؤدي عملك وتقابلي جمهورك لأن دا دورنا هو دا الفنان، كانوا بيحكولنا دايما الفنانين الكبار، الفنان محمد رضا بنته توفت وطلع يومها بالليل على المسرح وأستاذ عادل إمام دفن والده وراح المسرح والنهاردة أنتي بعد أيام قليلة جدا جدا بتيجي تؤدي دورك لأن أنتي جندي في الميدان جايه تؤدي دورك اللي أنتي مؤمنة بيه وأكيد هو فرحان بيكي".