خالد عليش: 'انا خصيم لأي حد ساعد اني مشوفتش بنتي'

أعرب المذيع خالد عليش، عن سعادته بحكم القضاء الذي حصل عليه بخصوص رؤية ابنته 11 ساعة اسبوعيا.

وكتب خالد، عبر حسابه الرسمي على موقع التواصل الاجتماعي فيسبوك: "النهاردة انا خدت حكم تاريخي يارب يتنفذ على خير وتاريخي لأنه احسن حكم ممكن اخده في ظل ظروف قانون الأسرة السيئ لحين تعديله
و اللي طلع الحكم قاضي مش واحد صاحبنا ف ده معناه أن الراجل قره وفهم وبيدي لكل واحد حقه".
واستكمل عليش، حديثه ب،:" لكن جه الوقت اللي اقول فيه اللي جوايا حسبي الله ونعم الوكيل أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر أني ما اشوفش بنتي بطريقة إنسانية كل حد كبير أو صغير جريت وراه بالمكالمات عشان أشوف أي حلول ودية حتى الحركات والجروبات النسوية اللي بيدافعو عن الست وخلاص".
واستكمل قائلًا،:" أي حد بيكتب تعليق وهو مش فاهم حاجة فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم وأنا ملتزم بكافة الالتزامات المادية ناحيتها من أول يوم كاملة وزيادة كمان عن المستوي المادي والاجتماعي اللي عايشين فيه ومع ذلك استحملت كتير ومردتش، أنا لا حول لي ولا قوة حاولت مع كل الحلول الرسمية والغير الرسمية تعبت من اللف في دوائر مغلقة، تعبت من نظرة والدي ووالدتي المريضة اللي نفسهم يشوفو حفيدتهم ومش قادر أعملهم ده.
وأضاف،:"أنا أوحش رجل في العالم ولكن ما استحقش اني ما يكونش عندي فرصة اتكلم واخرج معاها وافسحها عشان علاقتي بيها تبقي كويسة
محدش يقولي أنت السبب عشان سيبت ماماتها
أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية وكل شئ نصيب والانفصال كان برغبتها قبل رغبتي، محدش يقولي ما انتا كنت زوج وحش و.. و..
انا يمكن مكنتش أحسن زوج برغم اني عملت اللي عليا كتير واجتهدت كتير عشان أسعد الطرف التاني ولكن ده مش معناه اني انسان وحش ومستحقش فرصة تانية ومستحقش أشوف بنتي محدش يقولي ما انتا مبسوط واتجوزت تاني أنا فعلا الحمدلله زي الفل ومبسوط اني اخدت فرصة تانية ربنا يكرمني فيها واكون انسان أفضل واستمتعت ب حق ربنا سبحانه وتعالى والمجتمع اداهوني اني اتجوز تاني بعد انفصالي رسميا بأكتر من سنة بس مش معنى كده اني ارمي طفلي مع أمه ومطلوب مني انساه
محدش يقولي ما انتا كنت بتشوفها
انا فعلا مع بداية الانفصال كنت بشوفها ساعات قليلة في الأسبوع بس مع اي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين ووسط شروط كتير منها متتصورش معاها وتنزل ليها صور - متوديهاش عند اهلك - تيجي عيد الميلاد لوحدك دون باباك أو ماماتك
حسيت في الوقت ده اني لازم استخدم التعاقد اللي بيني وبينها اللي بيقول اني اخد البنت يوم في الاسبوع ولكن القانون اداني حق الرؤية الطبيعي الغير انساني لطفل
فضلت 5 شهور في مساومات اني معملش تنفيذ لحكم الرؤية حفاظا على البنت ولكن ماماتها صممت وبعد التنفيذ كان مهانة ومذلة للطفلة وليا بعدها مبقتش أروح وبعت انذار رسمي ليها بكده ومازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي ومناسب محدش يقولي ما انتا ما بتصرفش عليها ومبهدل ماماتها في المحاكم
برغم ان مش ده الموضوع بس الحمدلله الفلوس اللي الام طلبتها كنفقة ومصاريف بتوصل كل أول شهر دون أي محاكم من أول يوم حصل بينا انفصال رسمي دون محكمة بعقد اتفاق بينا ولو حصل دخول محاكم في اول الخلاف ف الام اللي بدأته وده بالتواريخ مش بالكلام
موضوع ان في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير ومع ذلك قولت انا عندي استعداد لأي زيادة غير منطقية بس نقعد ونتناقش
محدش يقولي روح شوفها عند جدتها عشان انا مش هاعرف يبقي في علاقة طيبة بيني وبين بنتي وانا قاعد معاها ساعة عند جدتها وهما قاعدين جنبي وقعدتي تبقى كلها مذلة ومهانة.
محدش يقولي انتا بتتظاهر انك عايز تشوف بنتك لكن انت مش فارق معاك الابهات هنا اللي هيحسو قد ايه دي حاجة مؤلمة وانا مش محتاج اعمل ده وطول الوقت طلبت من اي حد قريب منهم ان احنا ننزل ونقعد ونوصل لحل وسط انا مش طالب فيه غير اني اخد بنتي يوم في الاسبوع اخرجها وارجعها
انا نفسي احس بحضن بنتي بقالي اكتر من سنة ومقعدش اتكلم في مشاكل حصلت من سنين.
واختتم حديثه قائلًا،:" أنا أوحش رجل في العالم بس حقي اخد فرصة عشان تكون في علاقة كويسة بيني وبين بنتي حسبي الله ونعم الوكيل
شكرا للأستاذ شعبان سعيد المحامي وربنا يكملها بخير شكرا ميريهان زوجتي انك مستحملة كل ده وفي ضهري ومؤمنة بيا".