«ماذا لو » قصيدة للشاعرة منى جلال

( ماذا لو عَادَ مُعتذرًا) ؟!
ومد إيديه وقال لي سماح
وقال أرجوكي سامحيني
انا في البعد مش مرتاح
صاحبني الحزن في غيابك
وبعد الفرحة في وجودك
حياتي اتبدلت لنواح
وقال لي بجد انا غلطان
وقال ندمان
على اللي كان وقال آسف
وقال لي البعد مش هين
وكان يشبه حزام ناسف
وقال من تاني سامحيني
وقال لي كمان وحشتيني
في بعدك مت 100 مره
بإيدي مسكت سكيني
وقال حقك على راسي
وقال لي فاكرني مش ناسي
في بعدك كنت متغرب
يا وطني وصحبتي وناسي
وباس راسي وباس إيدي
وقال لي لو تسامحيني
هيبقى اليوم ده يوم عيدي
وتفتكروا هارد بإيه ؟!
أكيد يعني هارحب بيه
وهاغفر كل ذلاته وهارجع ليه
ومش هارضى بإني أشوف
للحظة دمعته في عينيه
راح افتح له بإيديا الباب
حبيبي وعاد لي بعد غياب
وهانسى انه بعد عني
ومش هاسمح بأي عتاب
وهاعتب ليه ؟!
وانا اصلا ماليش غيره ..
ما صدقت ان انا ألاقيه .
ياريته بس تاني يعود
ويبقى له في حياتي وجود
راح انسى الماضي بألامه
وهاسمع تاني لكلامه
واهد ما بيننا أي سدود
وهاستناه يدق الباب ..
وهافرش له طريقي ورود
ولو غلطان وايه يعني !
زمان قالوا الغلط مردود .
ومين فينا مالوش غلطات ؟!
مالوش شطحات
حياتنا كلها مطبات
وانا مسامحاه عشان شارياه
عشان عشقاه
وهانساله اللي عدى وفات .
ولا للماضي اجيب سيره
وآيه يعني اللي يجبرني
واسلم نفسي للحيره
ده أول حب في حياتي
وشعري وهو أبياتي
لآخر عمري هاخلص له
ما هو الماضي والآتي
هافكر نفسي بحنانه
وغيرته عليا وجنانه
وضمة إيده لما باخاف ..
ونظرة عينه وأمانه
هاعشم نفسي مايسبنيش
ولا تاني يروح مايجيش
ماكنتش عايشة في بعاده
ولا من غيره هاقدر اعيش .