احمد عفيفي يكتب : تلات تلاتات يا « سارقني » تلات تيام !!

عسل الدكتور محمد مرسي رئيسنا ودمه زي السكر والمربة .. قال ايه ياسيدي الناس اللي سرقونا لو عايزين يتطهروا من سرقاتهم ويتوبوا لربنا ويردوا حق الشعب الغلبان قام ايه فتح لهم حساب على البنك رقمه " 333 " .. فرصة العمر للناس الوسخة عشان تنضف على ايد رئيسنا .. لأ والحساب ايه ؟ .. سهل اوي .. " 333 " يعني لا يلخبط حد ولا فيه ارقام مكلكعة ولا حاجة .. واذا حصل يعني والراجل الحرامي نسيه يفتكر اغنية محمد قنديل المشهورة ..

تلات سلامات ياواحشني تلات تيام .. يعني اهو .. محدش عنده حجة .. رقم حساب على انغام اغنية جميلة وعذبة تخلي اللي عمره ما حب يحب اول واحدة يقابلها .. ويسرح بقى مع الاغنية .. ومفيش مانع نكتب على ايصال الايداع للمودع الحرامي ابن الحرامية من كلمات الاغنية برضه : بعادك ياجميل طول وده اول بعاد بيطول .. تلات تيام ياروح قلبي وانا جنبي حسود وعزول .. عشان لو يعرف حرامي زيه يستعجله على تطهير نفسه ويحط فلوسه كلها في تلات سلامات .. قصدي 333 .

فعلا ياجماعة الرئيس مرسي ده لئيم وبيفكر صح .. عايز يشجع اللي سرقونا ويردوا غنايمهم ، فاختار لهم رقم لذيذ وده خفيف .. بحيث يحط فلوسه وهو بيغني .. ومفيش مانع برضه يذيعوا في البنك اغنية شادية : ياسارقني وقلبك خالي ومسهر عيني ليالي .. كل اللي اعرفهم خدوا حقهم .. عقبالي معاك عقبالي .. ياسارقني ياسارقني .. ياسارقني وقلبك خالي.

بالطريقة الفنية العبقرية دي حنضمن ان كل الحرامية ولاد الكلب حيرجعوا لنا فلوسنا ويادار مادخلك شر .. ونلم بقى كام مليون لمشروع النهضة .. ده غير الكام مليار اللي شحتناهم من صندوق النقد على كام مليون من تركيا والصين وليلتنا حتبقى نجف بإذن الله ونجني ثمار ما شحتناها بعد 100 سنة.

... بالذمة ده كلام ناس عاقلين .. طيب انا حرامي وابن جزمة قديمة ومحدش يعرفني اقوم اروح ع البنك واحط الفلوس واقول للي مايعرفش : انا حرامي وسمعت كلام الريس مرسي وجي اطهر نفسي .. ده اسهل عليه مليون مرة يروح " يطّاهر " تاني ويجيب بفلوسه اللي يغنوا له : يا ام المطاهر رش الملح سبع مرات .. في مقامه الطاهر خشي وايدي سبع شمعات .. يا عريس يا " حرامي " .. علقة تفوت ولا حد يموت .. لابس ومغير وحتشرب مرقة كتكوت .. ده المثل بيقول لو اللي بيتكلم مجنون يبقى المستمع عاقل .. يعني انت ياسيادة الريس سايب الحرامية الكبار اللي في السجن دلوقتي واللي الفقير فيهم على قلبه مش اقل من 4 مليار .

وجي على اللي محدش يعرفهم وتقول لهم هاتوا فلوسكم وطهّروا نفسكم .. طيب ماتجيب الاول الفلوس من الناس اللي تحت ايدينا .. واللي مش عايز يقول فلوسه فين .. نديله حقنة شرجية بمسحوق الغسيل تايد زي ما الشرطة بتعمل مع الثوار الرجالة .. ساعتها حيجيب فلوسه وفلوس اهله ويقول لنا كان مخبيها فين .. وسايبها تلف من بنك لبنك ويداريها في فلوس ناس تانية .. مش كده اسهل الف مرة من اللي منعرفهمش وبمنتهى البساطة والسذاجة عايزينهم يعلنوا عن نفسهم انهم حرامية.
مش بقولك انت راجل عسل .. وبتهزر .. بقى ياراجل تقولهم : الله غفور رحيم وعفى الله عما سلف .. وبعدها بدقيقة تقول الفاسد اللي حيقع تحت ايدي مش حارحمه .. الحقيني يامه .. الريس مرسي بيبرق عينيه ويخوفني .. عشان اتوب وارجع الفلوس المسروقة وبعد ماربنا يتوب عليا يقوم سي مرسي عاكشني واروح في ابو نكلة .
ياعم الريس اوزن كلامك كويس .. ان شالله يارب توزنه عند بتاع الجبنة والحلاوة مش على ميزان ذهب .. واعرف انت بتقول ايه وعايز ايه .. وبعدين ياعم الريس مرسي بلاش الارتجال في الخطب الاسبوعية بتاعتك .. خلي واحد فاهم يكتب لك الكلمتين اللي حتضحك بيهم علينا .. انت رئيس جمهورية مش خطيب مسجد .. ومفيهاش حاجة على فكرة لمّا واحد يكتب لك .. عبد الناصر اللي هو عبد الناصر كان هيكل هو اللي بيكتب له .. والسادات اللي هو السادات كان موسي صبري هو اللي بيكتب له .

فشوف لك واحد ناصح بيعرف يزوّق الكلام ويوضبه .. ومادام كل جمعة لك خطبة في حتة .. فخير الكلام ماقل ودل .. حترغي كتير في الفاضية والمليانة حتغلط والناس تضحك عليك .. حتجيب المفيد وم الاخر يمكن نسمع لك .. انما اسهال الخطب اللي عندك ده مالوش حل غير انك تاخد له " سد الحنك " .. حتة عجينة بالسكر كانت امي زمان بتعملها .. ناكلها من هنا ونقعد يومين مش عارفين نفتح بقنا .. عشان كده اسمه " سد الحنك ".

وبعدين تعالى وقل لي اخرتها ايه في حكاية صلاة الجمعة كل اسبوع في مكان .. وايه حكاية البوابات الالكترونية على باب المسجد .. انا داخل جامع ولا مطار القاهرة .. وتفتيش ولغوصة في الخلق لمّا حتخليهم يكرهوا صلاة الجمعة ويصلوها ضهر في بيتهم .. وبعدين ايه حكاية الحرس اللي معاك .. انت واقف تصلي وهما واقفين زنهار يحرسوك بشكل يموّت م الضحك .. طب تصدق بقى ان ذنبهم في رقبتك لانك حرمتهم من الصلاة - يمكن حتى ع النبي في سرهم - عشان عينيهم تفضل مفنجلة .. لحد ماتسلم وتقوم وتدعي ربنا انه يغفرك لك .. والمصلين اللي وراك يدعو هما كمان ربنا ان تكون دي اخر مرة تصلي فيها عندهم!!