السيسي: كان سهلًا عدم زيادة الأسعار الآن للحفاظ على شعبيتي.. ولكن وقتها أكون خائنا لأمانة إنقاذ الوطن

قال الرئيس عبد الفتاح السيسي إن نصر حرب 6 أكتوبر العاشر من رمضان عام 1973 لم يحققه الجيش وحده فقط ولا القرار المهم والخطير بخوض الحرب من جانب الرئيس الراحل أنور السادات، ولكن شارك في صناعة هذا النصر الشعب المصري كله.
وأكد في كلمة وجهها للأمة، اليوم الإثنين، بمناسبة العاشر من رمضان أن الشعب عانى وتحمل هزيمة 1967 وتحمل بعدها استعداد لحرب أكتوبر ودفع بأبنائه في صفوف الجيش حتى استطاع الجيش بناء نفسه وتحقق الانتصار بعد 6 سنوات من الهزيمة.
وأوضح أنه يستدعي حالة نصر أكتوبر ومؤازرة الشعب للجيش من أجل ربطها حاليا بما حدث من تحريك للاسعار وزيادتها أخيرًا ورفع الدعم عن بعض السلع.
وأضاف: "حينما حملتوني بالأمانة قلتوا لي إنكم هتشتغلوا معايا.. وهتتحملوا معايا.. ولن أستطيع وحدي ولا أنا ولا أي رئيس غيري أو أي حكومة أن تحقق شيئا وحدها.. ولكن بالشعب يستطيع أي شخص تحقيق المستحيل".
وأوضح: أنا كنت صادق معاكم وكنت أمين معاكم.. وقلت إننا هنحتاج سنتين من العمل الجاد وهنتخذ إجراءات صعبة لأننا هنواجه فعلا حالة الفقر اللي بقالها سنين طويلة ضاغطة علينا كلنا.. ومش مخليانا نفكر في مستقبل جاد لينا ولا لأبنائنا.
واستطرد قائلا: أنا بقول هذا الكلام بمناسبة تحريك الأسعار لمواجهة فاتورة الدعم.. اسمعوني كويس.. شوفوا إحنا كنا رايحين فين.. وأنا لما بتكلم عن الدعم والموازنة هدفي إنكم تكونوا شركاء معايا.. عايز البياع المتجول وسواق الميكروباص والنقل يكونوا شركاء معايا.. ليس هذا دور الدولة وحدها بل إحنا مع بعض لأن الخطر علينا كلنا.
وأكد: القرار بيقول إنه ما يتاخدش دلوقتي..الناس بتحبك خليها تفضل تحبك.. حافظ على شعبيتك.. انت ليس لك ظهير سياسي ولا حزب.. لكن أنا قلت أنا ليا ربنا والمصريين.. وانتوا يا مصريين لازم تفرقوا وتعرفوا هل أنا باعمل عشانكم كلكم.. وبعمل عشان الحاضر والمستقبل ولا لأسباب أخرى؟
واستطرد: "بالنسبة للتوقيت والحسابات السياسية كان الأفضل ألا يتم اتخاذ هذا القرار دلوقتي.. لكن الخطر كبير قوي ومكانش ينفع أحط اعتبارات الشعبية وحب الناس وأفضل نفسي على مصلحة البلد.. لأنكم استدعيتوني لإنقاذ وطن.. والخطر كان كبير ودعم الطاقة كان بيكلفنا شهريا 5 مليار جنيه وفي نفس الوقت الدين على البلد بيزيد ولو انا ما اخدتش القرارات دي دلوقتي يبقى أنا غير أمين ولا أعرف الله.. ولو خفت يبقى أنا خنت الأمانة اللي حملتوني بيها".