قرن الخروب

الخدعة وشوش
وعشوش دبابير
ودباير خيط .. بتغوص في البير
وخيوط عناكيب
وشطوط مناكيب
ورجال ماتغيب "ع" البال لحظة
وولاد مراكيب
يامراكبي أصابني ألم واعر
وإيديا تعب روحها التجديف
أنا صاحب بيت
لاغريب ولا ضيف
ياحاذفني "ف" وقت انا لما بااضيف
ولا سايب حتي لبكرة رغيف
سبحانه في ملكوته وخلقه
سبحانه "ف" خلقه وملكوته
نطق الخرسان بعد سكوته
والحي يموت
والميت صحاه من موته
دخل الصياد جوه الشبكه
والصيد بقي حر طليق داير
وطليق مأسور واقف حاير
وفاتحلك فاه
واللي انت بتكره يوم وشه
تحتاج لقفاه
سبحانه العاطي مايسألشي
ولغيره العبد مايسألشي
والكدب مالوش رجلين شايلاه
أرزاق ومذاق ..
حنضل حلقي
وانا جنب رصيف ضايع ملقي
مش لاقي عصاي علشان ماالقي
والسحرة كتار.. ومانيش موسي
يامداين قلبي المهروسة
عضم الحيين غاص في السوسة
والغرقي علي شطوطك كتروا
هكسوسك في الأرض انتشروا
لا رجعلك حق اللي اتأسروا
ولا حق الشهدا اللي انتصروا
طول ما المساخيط عما تماطل
واتخلط العاطل بالباطل
واتخلط الحابل بالنابل
والجهل بيعمل ميت حائل
حائل معدول
حائل مائل
يارهيب ياابن اللعيب طائل
ومجيب علي كل سؤال سائل
سائل زحلوق
سائل لخازوق
سائل في المجري وفي المسقي
ساء التصريف
ملزوق العمر بميت لزقة
يا آلام أيامي المخلوفة
أيام أحلامي المخطوفة
حلمي الممنوع نفسي أشوفه
ياوشوش بانت كانت خانت
بالزيف مدهونة ومكشوفة
عماله بتفتتي وتتمطع
"ع " الفته بتبرك تتربع
ميت أنجر تشفط ولاتشبع
ووشوشها كتير
أساتيذ تغيير
تلاقيها وشوش صافية خجولة
"وف" لحظة تصير يائسة ملولة
تقلب علي طول تبقي الغولة
في الزنقة بتعمل مشلولة
الخير "ع" السير جاي يتمرجح
الخير بالكومة وبالزوفة
السهم اللي مايقتل يجرح
ياوشوش بتبوش غير مألوفة
ياوشوش مجهولة ومجهولة
راحوا الثوار شربة مية
ودماهم لساها طرية
وإيدين الغدر المعروفة
مخفية وقال مش معروفة
مهزوز الكرسي اللي بيحكم
وبيغري نفوس وبيتهكم
بيدوس ويدوس وبيتحكم
بيصول ويجول
مع عرض وطول
يصبر وينول بعدين يعكم
والعكمة مصارعات وملاكمة
باللين بالقاضية وبالحكمة
في النور بيجوز أو في الضلمة
رقص الحكماء ولا ميت عالمة
ياشعوب ملعوب في جيوب توبها
قرن الخروب لون مكتوبها
دا ذنب قديم
ولاذل مقيم
الضل بيهرب من ناسه
والشمس بتقفل ابوابها .