موال النيل

يا ليل يا عين يا ليل على النيل
ومين رصده؟
يا ليل يا عين يا ليل على النيل
ومين حسده؟
يا ليل وع المواويل
بيبكى النيل على حظه
ياليل ونوح الناى وكوب الشاى
رايح جاى على شطه
يا نيل يا حب كبير
وقلب بشيل عطش أرضه
يا نيل يا أب جميل
واخد ولاده فى حضنه
يا نيل يا باشا بتروى العطاشى
وواخد على خاطره
يا نيل يا ساقى أرضنا الطيبة
بالطمى والميه
اسمك فى قلوب ولادك
أحمد وهانم وهنية
ييجى الغريب يزورك
يقعد وكأنه بين أهله
على شطك وفى الميَة يتفسحوا العشاق
على خدك وع الواقف وع الجالس
يوزعوا الأشواق
وأنا وحبيبتى مشينا وإيدها فى إيديا
شوفنا وشوشنا بتضحك فى عينيك الحلوين
المتكحلين بالخضرة ورموش السهرانين
على صفحتك نسمة تنادى كل الدنيا
على ضفتك زفة صحت عينيك النعسانين
يا حبيبى يا نيل الحزن باين فى عينيك
بيقول كتير ليا:
يصح تشربوا منى وترموا مخلفات فيا؟
دا عمر دا لم حصل أيام البيوت الطين!
معلش يا نيل جينالك من ربعميت ميل
نسهر معاك لقينا نفسنا فى مووايل
لونك ليه مخطوف ومتغير؟
دمك ليه محروق ليه بس متحير؟
دمعتى سالت عليك يا حبيبى وعنيا
يا خسارة يا نيل على ابنك اللى كتير هانك
وحرمك من حنانه وطمى فيضانك
ورمى مخلفات ياما ياما فى الميه
القمحة حزنانة على حظها الأغبر
والقطن والبامية وكوز الدرة الأخضر
يا ميت خسارة ع المية فى القلة
الطمى كان فيها وكان طعمها فلة
موالك يا نيل كبير محتاج بحور حبر
يا نيل يا روح الروح والقلب والنية
صبرت كتيرعلينا وفاض بيك الصبر
يا نيل يا حب كبير للشعب من ربه
واللى يمس النيل حنضربه فى قلبه
خلونا أحباب ومش أغراب على دربه
دا روحه وروحنا وحبه فى مصبه
والميه جارية وداريه بحضننا جنبه