ثلاث قصائد منسية لنجيب سرور

علي العتبة
واقف علي الناصية
علي ناصية العتبة..
ببص للميدان
والراديو عمال يقول أخبار عن الميدان
وراديو تاني.. بيقرأ ف سورة العقبة..
تاني يا سيدنا..
امانة تاني.. وما أدراك ما العقبة
والناس ولا الطوفان
زاحفين علي الميدان
وسمعت صوت اعرفه
بيقول قفلنا الخليج..
وبيجري زي الميج
ما بين رصيف ورصيف
اهرام.. مسا.. اخبار..
أخبار.. مسا.. اهرام..
الصوت ده صوت عدنان..
بياع جرايد فلسطيني بقاله زمان
واقف علي العتبة..
والكل عارفين حكايته
وانا كمان عارف..
بالاختصار له أخت..
ويجوز مالوشي اخوات..
وكل شيء جايز..
من بعد دير ياسين..
يامدبحة في الدير..
دلوقتي راوية فين !
لو عايشة راوية دلوقتي يادير ياسين ..
تكون يادوبك عروسة.. داخله ع العشرين..
ياعروسة من غير زفاف..
امتي الزفاف أمتي؟!
عدنان ساعات كان بيقعد ايده علي خده..
العين بصيره ياعيني بس مابيده
طب يعمل ايه عدنان..؟
يحلم.. ويحلم .. ويحلم..
عشرين سنة بيحلم..
وساعات يهمه الشوق..
يغني من قلبه..
سنعود يا أختاه..
عدنان علي العتبة..
والراديو عمال يقول أخبار عن الميدان..
وراديو تاني بيقرأ في سورة العقبة..
أمانة تاني.. وما أدراك ما العقبة..
نحن قوم طيبون
-1-
نحن قوم طيبون
أننا ابناء أرض طيبة
رحبة الصدر لكل الطيبين
أدخلوها بسلام آمنين
ياجميع الأصدقاء
ولكم فيها السلام
والمحبة
والأخاء
واحذروا يا من بها قد تطمعون
أنها أرض أبية
لم يلد غير الأباه
انها تكره اقدام الغزاة
والطغاة
ربما تصبر للجور ، وتمهل
لا لتهمل
انما ترخي له الحبل لكي يشنق نفسه
-2-
قالوا بأن الذل ألقي رحله منذ القدم
في أرض مصر وأنها لم تنتفض يوماً لضيم
فليسألوا التاريخ كيف النيل يلقف كل شيء
فرعون والكهان.. حتي الآلهة
وليسألوا الفرس العتاه
وليسألوا الرومان والترك الطغاه
ما بالنا نلقي السؤال الي بعيد
فليسألوا عنا رشيد
أو بورسعيد
النيل كالتمساح رسماً في الخريطة
ما تلك من صدف الطبيعة
-3-
ما البطولة
أهي أن تفعل ما ليس بوسعك؟
تلك حيلة
أهي ان تفعل ما يعجز غيرك؟
تلك جرعة!
أهي أن تفعل يحسب قلبك
في عداد المستحيل؟
تلك صدفة
فالبطولة
هي أن تذكر ارضك
هي أن تذكر شعبك
ثم أن تنكر نفسك
حين تفعل اي شيء
ياليل.. يا ليل.. ياعين
يا ليل ياليل ياعين
يا للي الملاحم في امجادك تطول ما تطول
ها يكفي ايه والا ايه موالي انا الاخصر
ياصانع الثورة يامخللي تاريخنا يقول
المعجزات في مشيئتك أمر لو تؤمر
ياليل يا ليل ياعين
قدامنا سكة سفر رايحة لتل ابيب
شايفها خطوة بخطوة والسفر ده قريب
ياسلام علي الراية يوم النصر بترفرف
وتقول يا أرض العرب ما عادش فيكي غريب
يا ليل يا ليل ياعين
بص في خريطة بلدنا وقول ياليل ياعين
تبارك اللي خلق نيلنا وله فرعين
والبحر الأحمر وله خليجين ولا الفكين
شوف حكمة الخالق القادر وقول عجبي
البحر والنيل يا عالم زي تمساحين!
ياليل يا ليل ياعين
وليسألوا عنا لرعاة
يا ليل ياليل ياعين
حاسب علي الارض.. حاسب وانت بتدوسها
لو تنطق الارض كنت توطي وتبوسها
انا مرة وطيت وخدت حفان وقلت تراب
لقيت بدال الترب في ايدي الف كتاب
وقريت حكاية بلدنا في كل رملاية
دا كل حباية.. في ترابنا لها حكاية
حاسب علي الأرض .. حاسب.. آه يا حبة العين
شوف جيشنا زي الأسد واقف بيحرسها
ياليل ياليل.. ياعين !

ياليل يا ليل ياعين
عجبي علي الام طالعه ورا ابنها تزغرط
وتقول له يا ابني ندرتك ندر للميدان
عجبي وكانت زمان الام بتعيط
والابن رايح علي الميدان والا اللومان
ياليل يا ليل ياعين
يا ليل يا ليل ياعين
انا مش خرع زي ايدن.. قالها ريسنا..
عيني عليه باردة.. باردة ياعيون صهيون
يارب تديله طولة العمر ريسنا
علشان ما يفضل كده علي قلبها لطالون
ياليل ياليل ياعين.

ياليل ياليل ياعين
صبرنا ياما.. وياما صبرنا ياصهيون
وقلنا نصبر وبرضو الصبر له آخر
عشرين سنة والسنة مرت ولابمليون
لحد ما الصبر قال للصبر أنا كافر
ياليل يا ليل ياعين

ياليل ياليل ياعين
الله علي الجيش وهو عافق العقبة
يا إسرائيل .. لما حط الفلة في الرقبة
طب ما انتي زي القزازة اقفلها تقتلها
وقالها ربي.. وما ادراك ما العقبة
ياليل ياليل ياعين

ياليل يا ليلي ياعين
واقف وجنبي الكويتي ماسك المدفع
وجنب منه السوداني بيحشي في البندق.
وجنبه سوري وجزايري واردني مجدع
وعراقي.. الله يا وحدة شعب في الخندق
ياليل ياليل ياعين

يا ليل يا ليل ياعين
أنا شفت ناصر هنا... في الجبهة زي السبع
وافق بيخطب وقال ياما قال وقوله أمر
بينا وبينك معاد وقريب يا بير السبع
وبكره أرض المعاد تبقي معاد للقبر
ياليل يا ليل ياعين.

ياليل يا ليل ياعين
الله أكبر يا اكبر ضربة في المليان
الله أكبر عليكي يا ضربة العقبة
شريان وقمنا وقفلنا فتحة الشريان
دي قطمة الوسط ولاقطمة الرقبة
ياليل يا ليل ياعين
ياليل ياليل ياعين
ياسلاحي ياما اشتكيت ياسلاحي طول الصبر
واقولك أصبر تقوللي خلاص ما فاض الصبر
أن الأوان ياللا بينا.. ياللا ع الميدان
خلي التراب تحتهم .. تحت الصهاينة جمر
ياليلي يا ليل يا عين
يا ليل ياليل ياعين
يا شعب يامعجزة .. قوللي حكايتك قول
تجد ساعة الهزار يبقي خفيف الدم
ونجد للجد ساعة.. تبقي مش معقول
والقاك ما تبخل علي بلادك بروح ولادم
يا ليل يا ليل ياعين
يا ليل يا ليل ياعين
البحر دا مقبرة.. والبر شبر قبر
يا نازل البحر ولا البر خد بالك
ياما جيوشي فكرت قبلك تسجد مصر
ياعم سام سجدتها مصر.. عقبالك
يا ليل يا ليل ياعين
يا ليلي يا ليل ياعين
أنا علي الخط خط النار وشايف دار
وايدي فوق الزناد والقلب قايد نار
بينا ياداري عدو.. بيني وبينه نار
والعودة تحرم علي قبل أحد النار
يا ليل يا ليل ياعين
يا ليلي يا ليل ياعين
الجبهة مش بس جيش بسلاحه بيقاتل
الجبهة تبدأ هنا .. تبدأ من الداخل
في البيت وفي الغيط وفي المصنع وفي المكتب
انتاج وانتاج.. مافيش كسلان ولاعاطل
يا ليل يا ليل ياعين
يا ليل يا ليل ياعين
شاور يا ناصر تلاقي الكل قال شبيك
نادي يا ناصر تلاقي الكل قال لبيك
طب بس جرب وقولها سداح يا تل ابيب
نجيب ضلفها علينا النعمة بين ايديك
يا ليل يا ليل ياعين
من مجلة المسرح
يونيه 7691