النور ولاّد وضلوع القلب ... عباد الله .................. ساجدين لله وشموع القلب... القايده ف كل زوايا الروح .................... بتشعّ حياه وأنا داير بارمح في الملكوت ................... وأضحك ويّاه سوّاح في بلاد ما فيهاش إلاّه يتهجاني سوّاح في بلاد مش رافضاني...ومش قابلاني سوّاح في بلاد مش عايزاني أتبسّم للناس سوّاح في بلاد تماثيلها حديد وقلوبها نحاس النور ولاّد والليل قرطاس مليان مواضيع وعباد بتغطي ف ضهر عباد وكلاب بتبيع وخريف... بيعضّ شواشي ربيع وسط الساحه أنا داير بارمح في الملكوت علي حسّ دعاوي الفلاحه فرحان بالأرض الفوّاحه اللي بتفرط خير فرحان بالضحكه اللي بترقص وسط المواتير فرحان بالطير اللي بيتسبّح في البناوير فرحان بالدعوه اللي بتطلع من قلب كبير مليان بالضيّ أنا داير بارمح في الملكوت وأنا كائن حيّ والكون بيدوس... ع الضلع النيّ بكل قواه وضلوع القلب ...عباد الله .................. ساجدين لله وأنا داير باضحك تحت سماه وباطوف وأسعَي وبالفّ كما النحله الفتّاشه وأدُور وسط الأرض الواسعه وباهاتي ف وسط إخواتي التسعه بعلو الصوت والخير مفروط والقلب اللي بيرسم أوجاع ... للناس مربوط والأرض الطاهره بتطرح توت وبتجْمَع توت وقلوب الخلق المشتاقه ما هيش خايفه الموت والليل فنجان مغلي ومظبوط علي قد الراس والواحد ماشي ومتحصّن زمن شر الوسواس الخنّاسس اللي مالوش قلب من شر ولاد الكلب الدّون من شر الحاسد والمعجون بالخوف والغِلّ من شر دماغ مش لاقيه الضِلّ ف أرض الضِلّ من شر وشوش بتحب الذل من المخاليق - من غير تعليق ذ الواحد ماشي ومتحصّن من شر الضيق من شر الضحكه اللي بتطلع ما تبلّش ريق من شر الحقد اللي بينْخُر في صديق هلاّس من شر الإحساس الفاضي... ...اللي مالوش ترباس من شر الحُرّاس والكنّاس وكلاب القصر الواحد ماشي ومتحصّن وبيفرح... لمّا بيستمتع بنشيد النصر علي المناكيد وبيفرح... لمّا بيدبح خوفه من الأوجاع في نهار العيد وبيفرح... لمّا بيسمع صرخة قلب جديد بتشُقّ الصمت بتشُقّ قيود الليل بسلاح وبيفرح... لمّا يشم هدوم الزرعه المرويّه بعرق الفلاح وبيفرح.. لمّا إيديه بتبوس تفاح الصبر برقّة شوق الواحد..... لازم يفرح لمّا يشمّ نشوق الفرح لمّا يدوس علي جرح الدنيا... الساكن بين ضلعينه بقوّه لما يخُشّ بيوت النوّه ويطلع سَبْع لمّا كلاب الرَبْع الخاينه تخاف من صوته لازم يفرح... لمّا حيطان العمر تعلّي بيوته ليمّة فوق لازم يفرح... لمّا يفوق ع الضيّ الطالل من جوّاه لازم يفرح لمّا يلاقي ضلوع القلب .. .عباد الله ................ ساجدين لله