حلم

يمكن يكون حلمى نجمة وضحكة

ممكن أكون حلم بيجرى على قوس قزح

ممكن أكون غيمة ومطر

بس ده فى الحلم

وأنا تعبت من الأحلام

وعاوزة أرجع أنا

تعبت من التوهة والحرمان

تعبت من غدر وحكايات الأوهام

تعبت من محاولات النسيان

يوم بعد يوم

ماسكة خيط من الصبر وخيط من النسيان

وبغزل توب مالوش ألوان

مستنية أشوف نهايته حلوة

ولا مش هيبان

يمكن يستر ليالى البرد والحيرة والكتمان

يمكن ياخدنى لبحر بعيد وأرض من نور تحضن حزن

وتعيشنى فى أمان


يمكن أنام بين كف القمر ويحضنى كمان وكمان

يمكن أغنى فى ليالى السهر وأتوه

بين شفايف حبيبي اللى كان

يمكن أداوى جرحى وأعيش وسط فرح منسى

يحاوطنى بالحنان

يمكن أرسم جرحى على الحجر وعلى البيبان

لكن يا صاحبى أنت اللى هتعيش وحدانى

محروم من الضحكة وحتى السكات

هتعيش بقلب مليان غيوم

وبحكاوى الغدر والهموم

يا عينى على الجدع لما الأيام

هتخليه سواح فى بحر الندم

وقلبى طول عمره دليلى

ولا يوم سابنى لوحدى وخلانى عدم

عينى على الضحكة لما تتحول لبكا

وعلى اللهفة لما تتحول لحجر

شعر - رنا هاشم