أنا لسّه فاكر عَلْقة الواجب قصيدة ل: سعيد حامد شحاتة

أنا متّهم بالعشق
أنا متّهم بالخوف
أنا متهم م الأمر بالمعروف
إن الوليد نازل ونفسه يشوف
وإن القمر بات ع الطريق مكشوف
وإن الملايكه اللى اشتالونى ألوف
وإن الكشوف ما فيهاش مكان للعد
أنا متّهم والتهمه مش ع القد
يا دموعى لحظة ما النهار يحتدّ
علمنى قلبك أغنى للعشاق
وعرفت أقف وأصرخ وأحب بجد
وعرفت أموت وأضحك وأقوم وأشتد
وعرفت معنى الامتلاك والكدّ
وعرفت أكون المدّ فوق السّد
وعرفت أبوس إيدك وأنام شبعان
وقريت معانى الورد من ع الخد
وعرفت مين اللى اتخلق إنسان
وإزاى فى عشقك أحن لك وأرتد
يا كلمه بين الكف والسندان
رمح الحصان فى الغربه لمّا اتهد
رجع الحصان بعد السفر بردان
كسّر بيبان الأرض مالقاش حدّ
علمنى قلبك أغنى ع الصلبان
وعرفت أقف على سكتك وأتمدّ
*****
أنا متهم بالعشق
أنا متهم بالخوف
أنا متهم بالردّ ع المألوف
يا أم الوجع شباك على ضلوعي
شايفك وشايف فى انعدام الشّوف
يا شراع لبوحى ورايه لطلوعى
شايفك وداير أحج وأجرى وأطوف
يا ضحكه دافيه مشبّعه جوعى
أنا متهم جوا العبايه الصوف
أنا متّهم بالضحك فى سبوعي
أنا متهم بإرادتى وبطوعى
أنا متهم بصراخى ودموعي
أنا متهم رغم الكلام بالخوف
*****
أنا متهم بالعشق
أنا متهم بالانتماء للطين
يا راشقه روحك رشْق جوايا
يا ساكنه قلبى وعايشه فى الضلعين
ضحكة عيونك للغريب آيه
فرحة عيونك للغريب شطّين
لمسة كفوفك توت وضلايه
همسة كفوفك للنسيم وِرْدين
أنا مش بريء من فرحة الدّايه
أنا متهم بالورد والياسمين
أنا متهم بعيونك الصافيين
بملامحك الدافيه
بسكوت ملامحى وضحكتى الصافيه
يا قصيده حافيه بتفتح الأوجاع
أنا متهم والتهمه مش بيّاع
أنا متهم والتهمه مش ظالم
وسيوف عداكى بتنصر الأتباع
وقلوب عداكى بتقتل الحالم
أنا متهم والتهمه ناسى جياع
أنا متهم والتهمه سيف تالم
يا قصيده وضفيرتين ونيل وشراع
يمكن مسالم بس مش سالم
أنا متهم والتهمه مش ظالم ومش سرّاق
أنا متهم
والتهمه بالتأكيد ماهيش ترياق
وأنا متهم
تاهت خطاوى القلب فى الأنفاق
وحشانى جامد والسكات يقتل
وحشانى جامد والكلام حرّاق
يا ضحكة العشّاق على الحاجب
ماشى بدعاكى وداير أتعاجب
- مش كاتب الواجب ولا مذاكر-
لسّانى فاكر علْقة الواجب
وحشانى رغم الغربه والحاجب وطوق الناس
وحشانى رغم ضآلة الإحساس
وحشانى رغم بلادة الترباس على الآله
شلتينى يامه ولسّه شياله
شلتينى والسيّاله واحة خير
أنا طيرك الواقف على الشباك
وأنا فرحتك فى مواكب التحرير
وانا كلمتك وسط الملايكه هناك
وانا صرختك لحظة سكوت الغير
يا بهجة النوافير فى أوصالى
ضحكت لى خالتى وفرّحت خالى
رقص الهلالى ف موكب الترحال
وقف الطريق واتمرّد الخيّال
هزّ الهلال الضى جوّاكي
مولود وروحك لسّه ضمّاني
مولود وروحى ف شالها ضمّاكي
يا راسمه قلبى ف صدر خلاني
مولود كإن الفرحه ولداكى
نزل الخلاص شايلك وشايلاني
ويايا روحك واللا أنا معاكى
أنا متّهم والتهمه مجاني
أنا متهم بالضحك فى حشاكي
*****
أنا متهم بالخوف
أنا متهم بالعشق
أنا متهم بمحبتى لطيني
أنا متهم والتهمه تكفيني
مصلوب ومحمى بروح محبيني
ساكت ونفسى أتهجى تكويني
يا مهاجره فيّا ونايمه فى حضيني
لحسوا العسل بالمعلقه الصيني
يا سارقه قلبى وساكنه ضلعيني
ضمينى بشويش وانتى مش وياى
وان غبت عنك برضه ضمينى
الغربه موت والفرقه قتّاله
وانا نفسى أقف وأصرخ وحشتينى
سمّينى عاشق،
سمّى روحى شراع
سمّى وبوسينى
وسمّى وارقينى
وخدينى للأحلام وضمّيني
واسقينى من زمزم دعاكى الرزق
أنا مش بريء من أى شيء يا أمّه
أنا متّهم
والتهمه مفطوم عِشْق