مادد لك إيدي يا ( ناعسه ) ..!!

يا ناعسه فوق جدار الليل
ونعسانه
وشاربه كاس ملاه الويل
ومليانه ..
أسي وجراح
بادوّر فين زمانك راح
وسبتيني علي شط الغرام تايه
ألف الكون وانا واقف
علي صبري
عيوني في المدي بتدور
وبتدوّر علي طيفك
يرد لقلبي دقاته ..
ورناته اللي انطفي فيها
شعوري بفرح
يرد الروح لأوصالي
يداوي آلام ..
وأوجاع كات عشيقة الجرح
وآه في عيوني سبّاحه
وسحاحه دموع شلال
بلاد الليل في كل مكان ..
وحراسه حجر صوّان
قلوب راسيه ..
ومرتاحه في وادي الرعب
فزاعه
وقافلين كل باب للنور
وانا المعصوبه أشواقي
عيوني نجمتين تايهين
أكون بره البيبان واقف
ومتشعتف علي بصّه
أحوّطها لقلبي حجاب
أعيش بيه الشروق في عيونك
الخضره
في قلب زمان مانيش عارف
حدود حلمه
ولا شطوط الغرام في هواه
غرامك طفل من نجمه في قلبي وليد
برئ من كل شئ خاطف حاجات الغير
في إيده سلسبيل ناوي
ما يحرمشي قلوب عطشت
ولا يفرحشي في الأحزان
حليب قلبه ع الفطره
مادد لك إيده يا ( ناعسه )
فمدّي الإيد ....
مفيش بينا حدود وسدود
برغم الغربه والمسافات
برغم ديابة السكه
وحراس الغريم الليل
ورغم السجن والقضبان
وقطّاع الطريق ..
أبداً ..
ما يمنعنيش أكون في عيونك
النني
تكوني جوه قلبي الروح
وموتي له بيبان شتي ..
لبعث جديد
فمدّي الإيد ....
حصاني من عيون الفجر
مستني ..
في كل مكان
بيصهل تسمعه الأزمان
وانا عاشقك ومعشوقك
أكون فوق صهوته فارس لأحلامك
وعصفور وقت ماتحني ..
علي غصن الغرام مسحور
فاحنِّي وصبي في كاسي حنين قلبك
وهشي طيورك الجارحه
يبان طيفك
تلاقي يومي جاي يمحي
زمان جرحك
ويفتح لك بيبان فرحك
ويفرش لك غرامه طبيب
وإوعي يا (ناعسه ) لو سمحت
ظروف صبحك ..
يكون طالل ومستني
جواب قلبك
ترديه للسجون مقهور
مُتاح نبقي علي مرسي الحياه
موال
فخطي فوق جدار الليل ..
تلاقيني
مادد لك إيدي بالأحلام
فمدّي الأيد .