تحيا الحكومة

الله أكبر، ربنا ينصر الحكومة اللى مش حرمانا من حاجة، أخيراً ظهرت العلاوة، بعد شد وجذب، وكام يا معلم؟ % 5 بحالهم، والله الواحد مش عارف يجيب إيه بيها؟
أقولك أنا، أشترى بيها أكياس بلاستيك بس من النوع التقيل علشان تحط فيها جثث الخنازير اللى مرمية فى شوارع البساتين، أصل الحكومة لما دبحت الخنازير، وقعت من العربية اللى كانت شايلاها، ولا أقولك اتبرع بالعلاوة وبكده نقدر نستغنى عن المعونة بتاعة اللى ما يتسموش، بلاش ياعم، عارف قناوى؟ يا أخى بقولك قناوى بتاع الحزب الدستورى، أيوه ده بقه اللى افتكر فجأة وبعد حاجة وعشرين سنة، إن النظام فاشل وكمان بيتصف بالجمود. كنت فين يا قناوى من زمان، وياترى إيه اللى غير رأيك كده? هو -بالمناسبة- حزبك اتحرك ولا لسه جامد، عايزين نحس بحزبك شوية يا أخ قناوى ومعاك بقية الأحزاب اللى ما بتتحركشى إلا لما تطلب الدعم بتاع صحف الأحزاب!!.
شوية اهتمام بينا يا جماعة، هو مفيش إلا الوطنى ولا إيه؟ على الأقل الوطنى بيدينا علاوة وكمان % 5، ياريت تتعلموا العطاء السخى ده، هو مفيش حد بيحمد ربنا ولا إيه؟. الحمد لله، واللى مش عاجباه العلاوة ياخد غيرها من الأزمة العالمية اللى مصر مش هتتأثر بيها إلا حبة صغيرين!. أنا باقترح نتبرع بالعلاوة الجامدة دى للأحزاب اللى ما بتعملش حاجة يمكن لما يشوفوا فلوس العلاوة يقدروا يعملوا.
ياما أنت كريم يارب، الصحف الغربية اكتشفت أن مصر بحكومتها وإعلامها عايزين يعملوا فتنة! ليه علشان موضوع ذبح الخنازير!!!! شوف إزاى، أمّال لو كان البابا بياكلها ولا رفض ذبحها كنتوا عملتوا إيه، والله الفتنة من عنكم انتوا، بس ده بعيد عن ودانكو.. أنا شايف نتبرع بالعلاوة للغرب الحاقد علينا ده علشان يصححوا مفاهيمهم عننا، ويصحصحوا شوية، بدل موضوع الفتنة اللى بقه قديم ومالوش طعم، ما البلد مليانة يا أخواننا أشمعنى الفتنة؟ ده فيه حاجات تانى والله تودى فى داهية، بلاش الموضوع ده العبوا غيرها، ياريت نلم بقه الخنازير المدبوحة فى الشوارع دى، شكلنا وحش قوى، والله العظيم ما هتلاقوا مستشفيات تحطونا فيها، وانتوا كمان هتكونوا معانا طبعا، مفيش هنا مارينا، ده كلنا مع بعض ولا إيه؟.