انضباط الشارع أولا

من منا لا يقابله تصرفات غير أخلاقية على الطريق العام أو تصرف غير لائق من سائقى الميكروباص واستغلالهم المواطنين والتحكم فى أسعار المواصلات وتقسيم خطوط السير بشكل مستفز يدل على انعدام الشرعية أو منظر مستفز من ركن السيارات صف ثانى أو الباعة الجائلين واحتلالهم الأرصفة والشوارع العامة أو رؤية بعض الشباب يشربون مخدرات فى الشوارع الجانبية وانتشار المعاكسات والمضايقات للفتيات وكسر الإشارات وسير السيارات عكس الطريق إيه الفوضى دى؟ للدرجة دى بقت الأحداث دى تمر علينا كدا كل يوم فين الداخلية؟ محدش عارف طب حد يقولى إية وظيفة الداخلية كلكوا حتقولوا تحقيق الأمن العام طب الأمن العام ده بيتحقق فين؟ أكيد الشارع طب فين هوا الإحساس بالأمن طالما بنشوف كل الأحداث دى كل يوم وأمتى الوضع حيتغير تخيلوا لو بقى فيه قانون فى الشارع والكل بيلتزم والشوارع نظيفة وأجرة المواصلات محددة وكل سائق ملتزم بخط سيره ومفيش باعة جائلين، تخيلوا سعتها بلدنا حتبقى عاملة إزاى..طبعا حتقولوا الداخلية وراها مشاغل تانية كتير غير ضبط الشارع، حقولك ماشى، بس بالنسبة للمواطن البسيط إيه هو معيار إحساسه بالأمن إللى هو بيشوفه وملموس قدامه؟ أكيد الشارع إللى بيمشى فيه كل يوم والموضوع صدقونى بكل بساطة هو ضبط الشارع أولا يعنى إيه؟ يعنى الالتزام بأخلاق وآداب الطريق ومحاسبة كل من خالف القانون طب لو الشارع المصرى بقا مثالى تفتكروا ممكن نشوف فوضى تانى وتخيلوا تأثير ده على نفسية المواطن وعلى شغله واقتصادنا سعتها حيبقى عامل إزاى أنا متهيألى إن هيا دى الثورة بجد إللى المفروض نعملها ثورة على أنفسنا ثورة بالالتزام بالقوانين والآداب العامة أنا بزعل أوى لما ألاقى واحد ابن ناس وشكله محترم، وألاقيه ماشى عكسى ياريت ضميرنا يصحى الفترة الجاية حتى لو كان فى سلبيات نحاول نصلحها ومنقولش مهو كله بيعمل كدا لأن الفساد بينتشر بالسلبية لما كل واحد يعمل زى ما الناس بتعمل ومفيش محاسبة حتبقى فوضى وأناشد وزارة الداخلية إحكام سيطرتها على الشارع المصرى وتبقى أكثر حزما مع سائقى الميكروباص ووضع نظام صارم لتسيير المركبات فى مصر بكافة أنواعها حتى لا يتم تكرار استغلالهم للمواطنين فى ظل الزحام الشديد أو أن يقوموا بتقسيم خطوط السير بدون أى رقابة عليهم صدقونى تحقيق الأمن العام بالنسبة للمواطن البسيط هو باختصار تحقيق انضباط الشارع المصرى.