نشطاء بالدقهلية يدعون لإضراب عن ركوب التاكسى 27 سبتمبر

ولمدة ثلاثة أيام لمكافحة استغلال السائقين..

دعا عدد من النشطاء السياسيين بالدقهلية إلى تنظيم إضراب عن ركوب التاكسى فى المنصورة، ابتداء من الخميس 27/9 سبتمبر وحتى 30 /9، لمكافحه استغلال السائقين وجشعهم، وقاموا بتدشين صفحة على موقع التواصل الاجتماعى "فيس بوك"، بعنوان "إضراب عن ركوب التاكسى فى المنصورة ابتداء من الخميس 27/9 سبتمبر وحتى 30 /9 لمكافحه الاستغلال".
وجاء فى الدعوة: "دلوقتى التاكسى أقل حاجه بقى ب5 جنيهات، يا حلاوة، يعنى أنا لو باخد مصروف 10 جنيهات مثلا فى اليوم أركب بيهم، بدل ما أجيب بيهم حاجة تنفعنى، دا غير بقى أن الأجرة بتوصل ل10 و15 جنيها، بدل ما كانت الأجرة جنيه واثنين جنيه وخلينها 3 جنيه، وقولنا مش مشكلة، ولكننا دلوقتى بقينا بنبوس أيد السواق عشان يوصلنا، وبيعاملنا كإننا حيوانات شغالين عنده، الله يرحم أيام بابا حسنى كان التاكسى بيشبرق نفسوا بالجنيه".
وأضافوا فى الدعوة: "والمصيبة الكبيرة سواقين الميكروباص كانت الأجرة 30 قرشا وبعدين 35 قرشا، وبردوا كانوا يخدوا ال 50 قرشا، ويقولك مش معايا فكة عشان الباقى، وكنا نقول مش مشكلة، وفى الآخر الأجرة الرسمية أصبحت 50 قرشا، وبردوا قولنا ماشى، دلوقتى الأجرة بمزاجهم وبتوصل ل2 جنيه، وكمان ينزلنا حسب ما هو عايز، عشان كده لازم نعمل إضراب مش هقول الأيام كلها بس يوم عن التاكسيات ويوم عن الميكروباصات عشان هيا مش هتيجى إلا كده، وهنشوف هتيجى بفايدة ولا لا.. خلينا إيجابيين ونشارك فى الإضراب عشان نمنع الاستغلال اللى بيحصل ده عشان بجد كده كتير.. أمشى على رجليك أو اركب ميكروباص فى اليوم ده أو متنزلش اليوم ده لو مش وراك حاجة ضرورى لازم المقاطعة للحد من الاستغلال خد بالك هى مش هتيجى إلا بكده".