أكتب اليوم من شرم الشيخ كم هى بلد جميله جدا سبحان الخلاق وبحكم عملى فى مجال الطيران دائما أدخل بتصريح عملى فى مطار شرم الشيخ ولكن هل تتخيلوا لو لم أكن أعمل فى هذه المدينه وفكرت أن أذهب بغرض السياحه مثلا ماذا سوف يحدث عندما أذهب هناك وهل ستستمر وجهه نظرى عن شرم الشيخ انها مدينه هادئه وجميله تعالوا نشوف ايه اللى حصل مع محمد لما حب يزور شرم الشيخ قرر محمد خلال أجازته انه يزور شرم الشيخ وافتكر صاحبه محمود اللى بيشتغل هناك وكلمه واتفقوا على ميعاد يستناه محمود هناك فيه ويقضى محمد يومين يتفرج على المناظر الطبيعيه والبحر وال-------- وفعلا حجز تذكره الذهاب وفى الميعاد كان عند الأتوبيس منتظر يتحرك وطلع الأتوبيس الى شرم الشيخ ولكن ايه اللى شافه محمد خلال الطريق من القاهره الى شرم - ياه معقول أنا رايح شرم يارب تكون الرحله جامده زى ما سمعت عنها الأتوبيس كويس والطريق جديدالواحد بقاله ساعتين لما أنام شويه عقبال ما نوصل. وبعد ما قرر محمد انه ينام سمع السواق بيقول يا جماعه فيه لجنه ياريت كله ينزل ويخرج شنطه عشان تتفتش - ايه ده هنتفتش جوه بلدنا عموما تلاقي فيه بلاغ ولا حاجه. ونزل محمد وخرج شنطته واذ بيه يجد عسكرى معاه كلب بيشمشم كل شنطه طبعا هو اتقرف من الكلب بس قال - مش مشكله كله عشانك يا مصر. خلص التفتيش وكله طلع مكانه وبعد ما كان محمد قرر ينام وقلقوه قرر ينام بقى لسا الطريق طويل وأثناء نومه فجأه لقى واحد بيخبط على كتفه وبيقوله بطاقتك يا أستاذ أستغرب محمد - اتفضل البطاقه تمام. انت بتشتغل فين - أنا لسا طالب. ورايح شرم ليه - رايح أجازه. هتقعد كتير - يومين ان شاء الله. توصل بالسلامه - شكرا. قرر محمد انه ما ينامش وقال - طب مانيش نايم لما أشوف أخرتها مع الناس دى. حتى وصل الى شرم الشيخ وقابل صاحبه اللى كان مستنيه هناك وراح معاه البيت وقعدوا اتكلموا شويه بعدين صاحبه قاله انا هاسيبك بقى عشان رايح الشغل وانت نام شويه ريح من الطريق ولو حبيت تخرج متروحش بعيد عشان ميحصلش مشاكل وقلق ونام محمد ولما صحى كان صاحبه لسا مرجعش من الشغل دخل المطبخ وأكل بعدين قرر يخرج اتصل بصاحبه لكن صاحبه اعتذر عشان شغله وقاله انه هيرجع متأخر وقال له اركب تاكسى وخليه يوديك مارينا (خليج نعمه) فيه هناك كافيهات ومحلات اتفرج عقبال ما نروح بكره البحر خرج محمد ووقف تاكسى وراح مارينا سأل السواق على الحساب قاله 30 جنيه !!! قاله محمد - ازاى طريق المفروض 10 جنيه عايز تاخد 30 . رد عليه السواق جينا لرغى المصريين بقى يا بيه انا باخد من السايح 20 دولار وعشان انت مصرى قلتلك 30 بس اتضايق محمد وقاله - هما 20 جنيه وحسبى الله ونعم الوكيل ولو اتكلمت تانى يبقى نروح للقسم وهو يحكم بينا. أخد السواق الفلوس وقال أدى اللى بيجى من المصريين آخر مره أركبكم خليكوا فى الميكروباصات قال محمد فى نفسه - أهلا هى غاليه أوى كده. واتمشى فى مارينا وده كان تعليقه - يا نهار ابيض هوا الجو حار وأنا مش حاسس ايه البنات المستهبله دى معقول مصر مليانه ديسكوهات وخمارات بالشكل ده مش معقوله وايه ده كمان أفعال فاضحه فى الطريق العام. وبعد ما أتفرج على المنطقه أختار كافيه شكله هادىء يقعد يريح فيه وساله (الجارسون) تطلب ايه حضرتك - هاتلنا واحده فيروز اشمعنا أنا هاقعد لوحدى هههههههه. ناس رايحه وناس جايه ومحمد قاعد مع فيروز بعد فتره قرر محمد يحاسب ويمشى وقال يركب ميكروباص أوفر من التاكسى ركب الميكروباص ودفع الأجره وفجأه وقفتهم لجنه فى الشارع وقال لهم أمين الشرطه كله يطلع البطايق يا بشوات وشاف بطاقه محمد وسأله انت بتعمل ايه فى شرم - أجازه. وقاعد فين - على الهضبه. طب انزل - ليه. انزل خلص يلا يا أسطى وطلعوه فى عربيه (البوكس) مع كذا واحد راح محمد القسم وفى الطريق كلم صاحبه ورد عليه بعد فتره وكان الحوار بينهم الحقنى يا محمود مالك يا محمد معلش كنت نايم - اصحى بسرعه أنا أخدونى فى كمين ورايح القسم دلوقتى. قسم ايه - قسم النبى حارسك شرم يا زفت خلص عليك وعلى شرم فى يوم واحد. طب أنا جاى دلوقتى ده كان رد محمود وفى القسم كان محمود مستنى محمد وفهم الظابط الموضوع بالظبط ووراه تصريح عمله فى شرم وروحوا مع بعض وكان محمود بيضحك ومحمد متغاظ منه - يا بارد ايه يضحك دلوقتى. شكلك كان رهيب - ايه ده يا محمود مش دى فى مصر برضه ولا أنا فى بلد تانيه. طبعا بلد تانيه يا ابنى البلد دى مش بلدنا احنا هنا خدامين الأجانب بس أنت شوفت بنفسك أنا مثلا شغال فى شرم وانت كنت دايما تقولى يا بختك وأنا اما فى الشغل اما على السرير نايم عشان أصحى أشتغل هى دى حياتى هنا ومعظم اللى بيشتغلوا هنا اللى يتفسح هنا اما أجنبى أو مصرى بس الناس اللى فوق فوق فهمت - يعنى ايه مينفعش أتنقل جوا بلدى. لا طبعا أنا لولا شغلى هنا مكنتش جيت اصلا وخلص بقى عشان ألحق أنام وبكره هارجع بادرى شويه نبقى نخرج - شكرا يا برنس أنا ألحق أكمل أجازتى فى بلدى مش طالبه اهانات تانى وشكرا كده يا شرم وأشوفك لما تنزل أجازه. يا ابنى بطل هبل - الهبل انى أكمل تانى الله أعلم ايه ممكن يحصل تانى. وبكده خلص يومنا النهارده شوفتوا اللى حصل مع محمد معقول عشان اتفسح لازم أخد معايا أوراق اثبات شخصيه وأتنين يضمنونى لما تيجى لجنه وأكون سارق قرشين عشان يسرقهم منى سواق تاكسى ولا مطعم شكله نظيف مالك يا مصر؟؟؟
