الشرطة ضربت خرطوش

مجلس شعب وقلنا كويس
هما يومين وبدأنا نهيس
الظاهر إن العيب فى الكرسى
أول ما يلمّس بيليس
الشرطة ضربت خرطوش
واختلفوا لأ .. ما ضربوش
قاله ما هو يا سعادة الريس
قاله الفارغ ده مغشوش
مصر بلدنا دى أحسن جيش
يضرب آه لكن بشويش
والثوار مش سلميين
والداخلية دى محترمين
والنشطاء الحقوقيين
عملا وخونه ومندسين
واللى بيحصل فى الميدان
شغل برادعى وأمريكان
والثوار الباقيين دول
والله بياخدو ترامادول
إيه الحلاوة دى !!
قول ياحج قول
ده أنا شكلى انتخبت الفلول
****
والإعلام عامل سبوبه
اركب يلا الثورة ركوبه
وبقت موضه وثبت كاميرا
والناس على أمرها مغلوبه
تشوف شهيد ع الس بى سى
ع الفراعين ماسك مولوتوف
مفقعله عين فى الأون تى فى
ع اليوتيوب كذاب بيشوف
واللى يقولك مات ومضحى
فى وسط غاز وغيوم ورطوبه
واللى يقولك لأ يستاهل
مهو ماسك للظابط طوبه
واللى عايشلى فى عالم تانى
عمال بيفتى وبيحلل
لا فارقة ثورة معاه ولا كانى
أهم حاجة الدورى يكمّل
****
والانفلات فى بلدنا أماره
والبلطجة عاوزلها وزارة
هيصو يا عالم يا مكبوته
الداخلية اديتكو إشارة
بتعاقبوا شعب وبتذلوه
بتذلوا أمه واللى جابوه
بتندموه على يوم ما أكلم
كأنه ثار لأمه ولأبوه
دى ناس ملحقتش بلدها
وكل خير فيها نهبتوه
قالت هنصبر ونكمل
يمكن ولادنا فى يوم يشفوه
****
ثورة دى ولا مهياش
قول ياعم ماتخدعناش
لا حميتوا شعب ولا ثورة
وحميتوا شوية أوباش
قول دى ستين سنة خربانه
نعمل حسابنا منستناش
ما منكو طفش اللى سايبها
ومعذبين اللى ماسبهاش
وبلاها حرقة دم ياعم
بلاها ثورة بطعم الدم
وشباب بيقعوا زى الورد
وتقولوا عادى واحنا نلم
ده شىء بيحصل كالعادة
والتعويضات جاهزة أهيه
وأوامرى للمصابين يتعالجوا
ومعاكو من ألف لميه
وفلوسكو حلوة ما شاء الله
ولا ليها أصلا ميزانية
عمال تبعزق وتبعتر
وتقولى فترة انتقالية