لا يا عم سعد

لا ياعم سعد

مع حفظ اللقب طبعا للثورى العظيم سعد باشا زغلول
بس فى كلمة انا زعلان منه فيها
هى كلمة مفيش فايدة
هو الراجل ملوش ذنب
بس احنا بقى بقت الكلمة دى زى ما بيقولوا جزء من ثقافتنا
كل ما حد يكون مقصر فى حاجة وطبيعى ان اللى بيقصر الناتج بتاعه بيبقى وحش
لا احنا بقى فلسفتنا غير كدة
احنا عايزين كل حاجة تجيلنا وباقل مجهود
ف يطلع يقولك اية
لا ياعم على راى سعد زغلول
مفيش فايدة
ويطلع واحد يقولك
على سبيل الدعاية والسخرية
لو نيلك يا مصر صلصلة
مش هيكفى الكوسة اللى فيكى
بينى وبينكم
الراجل اللى فى الاخر دة عندة حق شويتين
بصراحة الكوسة كتير وغالية كمان
عشان الواحد يعمل شوية كوسة مكلفة جدا
انا قصدى طبعا الكوسة بتاعت المحشى عشان محدش يفهمنى غلط
اة فى كوسة ومحسوبية وفى ولاد البطة البيضا وفى ولاد البطة السودا
انا مختلفتش معاكوا
بس ربنا لما خلقنا
خلق فينا الايمان ان مفيش اى فى الكون
تقدر تتحكم فينا غير قوته هو سبحانة وتعالى
لكن احنا بنعترف وبنقعد فرحانين وكأننا وصلنا لحقيقة هتغير مجرى العلم
ان فى قوة اخرى بتتحكم فى حياتنا غير ربنا
عارف ان اى حد وصل للفقرة دى هيقول استغفر الله العظيم
لا وممكن يشتمنى كمان
بس هو بعد ما هيشتمنى
هيفضل مؤمن برضة بوجود القوة المتخكمة فيه
اللى غير القوة الالهية
واللى احان بنطلق عليها بعض الاسماء الجديدة
عشان يبقى الموضوع شيك وشكلة كويس بالنسبة لينا
بنسميها كوسة او محسوبية مش فارقه
المهم ان احنا بكدة بنؤمن بوجود قوة اخرى غير القوة الالهية
مش عايز اجنح بالتفكير واقول ان دة نوع من انواع الشرك
بس لو عايزين الحق فكروا وشوفوا تفكيركوا هيوصلكوا لفين
ربنا خلقنا وعندنا كل حاجة
كل الادوات اللى تخلينا نبقى جديرين بالمهمة اللى احنا قبلنا نشيلها
لكن مش مهم يكون عندك الادوات
الاهم تعرف ازاى تستخدمها
طب انا عايز اسالكوا سؤال
هل حد عارف اصلا اية اداوته
طب حد عارفها وبيعرف يستخدمها ازاى
انا مش عايزكوا تجاوبونى انا اسالوا نفسكوا
وحاولوا تدوروا ع الاجابة
ولما توصلوا للاجابة انا متاكد ان حياتكوا هتتغير كتير
حتى مفاهيمكوا هتتغير
وهتبقوا مؤمنين بنفسكوا
لان دة بداية الطريق للايمان الصحيح بربنا وساعتها هتبطل تقول
كوسة او محسوبية
هتبدا تقول انا قادر بمساعدة ربنا
انى اعمل وانى اكون فاعل
وميكونش مكانك فى الجملة مكان المفعول
وفى نهاية الكلام
عرفتوا بقى ان لسة فى فايدة
ولا لسة مؤمنين بالكوسة
حاولوا برضة تجاوبوا نفسكوا ع السؤال دة