سعر الشهيد

قدروه بالعافية كام ملطوش
أما الجريح والمصاب عايزين يقولوا مالوش
وتكرم (العريان) وقال ياخد كمان سبعين
من إمتى كان الضنى تنفع مكانه قروش ؟؟؟
.......
دا الدم اللى نزف معندكوش منه
ولو تتقلوه دهب دا مش عوض عنه
دا لولاه ما كنتم ولا كانت كراسيكم
وخاب فى كل الدقون والمسلمين ظنه
.......
لولا الشهيد كان زمانكم فى الجحور لابدين
وكان زمان الغجر فوق قلبكم راكبين
وكان زمان (الكتاتنى) بيك ورا القضبان
ولما مات الشهيد كان (الكتاتنى) سجين
.......
خيبتوا عشمى وأنا جدى من الإخوان
وهرب فى يتنا (النديم) من الخديوى زمان
ورحت عند اللجان واديت لكم صوتى
بكره هاروح اسحبه وانزل على الميدان
.......
مكنش عشمى اشوف على روح شبابنا مزاد
اللى لولاه كان زمان مطرحكم القواد
و( عز ) افندى اللى لسه مصانعه شغاله
مكسبها ساعه يزيد عن دية الأولاد
.......
خيبتوا ظنى وخيبتوا العشم فيكم
لولا الأدب فى الكلام أنا كنت أهجيكم
واهجى رئيس الوزارة واخلى الشعب يكرشكم
ونجيب شباب الميدان يملى كراسيكم
.......
و(أكرم الشاعر) أبو (مصعب) قولولوا بكام
تدفع فى (مصعب) ويرجعلك معافى تمام ؟
والله كان يفتديه بكل أمواله
وأديكوا شوفتم دموعه حقيقة مش بكلام
.......
وبكى (الكتاتنى) وبكينا للجريح (مصع)
ودعينا له بالشفا ومعدش يوم يتعب
ايش حال بقى اللى ابنهم تحت التراب مدفون
ونفسهم الأجل من فرقته يقرب