زاهى حواس فى حوار مع تليفزيون اليوم السابع: حتشبسوت كانت تخينة ورمسيس كان بتاع ستات.. الصعايدة صورة طبق الأصل من الفراعنة.. ولو كنت ملك لتزوجت أم خوفو وزوجته.. إخناتون لم يكن شاذا وأجدادنا لم يتعاطوا الأفيون

- خليجى عرض عليا 100 ألف دولار مقابل الزئبق الأحمر
- بخاف من تعابين مقابر الفراعنة.. ووقع على راسي حجر وزنه 25 كيلو عند كليوبترا
- ساحر قطع رقبة "وزة" قدام الملك خوفو ولحمها تانى
- لعنة الفراعنة زى دعوة "يارب لو حد عمل فيا حاجة ربنا ياخده"
-وبرازيلية مرت بالكرنك "خلفت" وإحنا شعب ملوش مثيل
- في الكرنك جعران بيخطوا عليه علشان يحملوا ودا اعتقاد خاطئ
حوار مطول أجراه تليفزيون اليوم السابع مع العالم الكبير الدكتور زاهى حواس عالم المصريات، وزير الآثار الأسبق، كشف خلاله العديد من أسرار الفراعنة، والأسرار المتعلقة بلعنة الفراعنة وكذلك حقيقة وجود الزئبق الأحمر من عدمه.
وقال حواس في الحوار الذي أعده محمد محسوب، وقدمته نسرين فؤاد، حقيقة الزئبق الأحمر، قائلًا إنه بدعة، وليس له أى أساس من الصحة إطلاقًا، حيث اخترعها بعض "الفهلاوية" ليضحكوا بها على الناس.
وأضاف "حواس"، خلال حواره على تليفزيون "اليوم السابع": "البعض يقول أنه لو جبت أي مومياء ملكية وفتحت حلقها هتبقى غنى، وهذا كلام.. وفى القرن الماضى تم الكشف عن تابوت لمومياء وعثر على سائل من أدوات التحنيط وضع فى زجاجة ووضعها ضمن أدوات التحنيط في المتحف، وزعم البعض أنه الزئبق الأحمر، وهذا ليس صحيح، ولكن هذا الاعتقاد هو من أنقذ المتحف المصرى في 2011 من السرقة لأن كل الناس كان في تفكيرهم الزئبق الأحمر".
وأشار حواس، إلى أن بعض الأمراء السعوديين طلب منه الزئبق الأحمر، موضحًا :"أمير سعودى قالى، إن والدته مريضة ولا علاج لها، وأحد الشيوخ أخبره أن دوائه عند زاهى حواس، وقلت له أنا راجل بتاع آثار وبس.. فرد وقال معايا شنطة فيها 100 ألف دولار، لو جبتلى نقطة صغيرة من زجاجة زئبق أحمر سأعطيك 100 ألف دولار، فقلت له أنسى مفيش حاجة اسمها زئبق أحمر، والناس هتنصب عليك وخد فلوسك ومع السلامة".
وكشف حواس، عن أغرب المواقف التي تعرض لها خلال المشاركة فى أعمال البحث عن الآثار، حيث قال "حواس"، النهاردة نزلت بير داخل حوالى 15 متر تحت الأرض وفى البير مجموعة توابيت ضخمة هنعلن عنها فى يناير القادم"، متابعاً: أنا مبخفش غير فى مقابر الفراعنة غير من التعابين".
وتابع: مرة كنت بحفر وقع فى كشف متعلق بالملكة كليوبترا وقع على رأسى حجر وزنه 25 كيلو جرام عمل خرم فى مقلة العين، مشيراً إلى أن هناك موقفا آخر تعرض له وتأثر به أثناء وجود فى عملية حفر فى صحراء مصر.
وكشف حواس حقيقة وجود لعنة الفراعنة قائلاً: المصرى القديم لما ساب نصوص اللعنة على مقبرته وقال إللي هيمس المقبرة بتاعتى هتاكله التماسيح وفرس النهر كان مجرد تخويف.
وقال "حواس"، إنه لا وجو للعنة الفراعنة، مضيفاً : المصري القديم بدأ في السحر منذ القدم لكن لا يمكن أن يستمر سحر لأكثر 3 آلاف سنة، مضيفاً أن سحرة فرعون كانوا ملمين بالسحر على أعلى مستوى.
وتابع: كان عندنا ساحر جابه الملك خوفو وقاله قولنا على كنز الإله تحتب إله الحكمة فقاله الكنز دا مش هتاخده في إيد ملك تاني وملك أسرة تانية، متابعاً : الملك خوفو سأل الملك دا سمعت إنك بتقدر ترجع الإيد لو اتقطعت مكانها تاني.. ورد عليه الساخر :أه .. فجابوا للساحر وزة قطع رقبتها ورجها الساحر لمكانها تانى".
وقال العالم الكبير، إن لعنة الفراعنة ما هى إلا كذبة، مضيفاً : دى زى دعوة "يارب لو حد عمل فيا حاجة ربنا ياخده"، مضيفاً : أى مومياء إذا تم دفنها وغلق الغرفة عليها لمدة 3 آلاف سنة، فإن المومياء تخرج منها حراثيم غير مرئية تقرص المكتشف فيموت.
وتابع : كان زمان علماء الآثار على عجالة بالكشف لكن دلوقتي لما بنكتشف مقبرة بنسيبها لما الهوا الفاسد بيخرج والهوا النضيف بيدخل.
وقال حواس عالم المصريات، إن الآثار المصرية معروفة في كل مكان حول العالم ولا يوجد أى تقصير فى التسويق لها، مضيفاً: لو سألت أى طفل صغير فى العالم عن مصر هيقولك "الأهرامات" و"توت عنخ آمون" والمومياوات .
وتابع : الناس عرفتني خارج مصر من الأفلام عن الحضارة المصرية ولازم نعمل برامج تليفزيونية عن الحضارات والتاريخ المصرى سواء برامج للصغار أو الكبار علشان الأطفال يطلعوا عاشقين لبلادهم وحضارتهم ويعرفوا تاريخ البلد.
وقال حواس: عملت أشعة مقطعية بفريق مصرى كامل على كامل الممياوات إللي هتتنقل من المتحف المصرى لمتحف الحضارة وأثبتت أن الملكة حتشبسوت كانت تخينة وبدينة.
وأضاف، أنا مبقولش كلام من دماغى والأشعة اللى عملها الدكتور أشرف سليم ومعاه الدكتور هانى عبدالرحمن أثبتت إنها كانت تخينة.
وتابع: رمسيس التالت كان بتاع ستات وعندنا منظر فى المقصورة الأمامية فى معبد مدينة أبو إللى بناها رمسيس التالت وهو بيداعب الفتيات وكان بيجيب فتيات مصريات وأجنبيات وأسيويات قاعد بيلاعبهم وبيشرب".
في سياق متصل قال: مش عارف الناس بتزعل من إلي بقوله ليه، بس رمسيس التالت فى بداية حياته كان راجل عظيم لكن بعد تقدمه للسن الوضع اتغير لدرجة إن مراته وإبن زوجته التانية علموا عليه مؤامرة علشان يقتلوه".
وكشف، أن المومياوات التي ستنقل من المتحف المصري لمتحف الحضارة ستنقل بطريقة حضارية جداً، مضيفاً : أجمل شيء في النقل أنه سيقابل هذه المومياوات في الطريق الرئيس عبدالفتاح السيسي ومقابلة الرئيس لها إشارة بأن مصر بتحمي أثارها وبتصونها وبلد عظيمة.
وأكد حواس، على أن المتحف المصري لن يفقد أهميته بنقل الآثار إلى المتحف المكبير ومتحف الحضارة مؤكداً أن المتحف الصري لازال يحوي آثار كثيرة متابعاً: مفيش سايح بيجي مصر مش بيروح المتحف المصرى ولازم يروح غصب عنه بعد تطويره وتطوير المنطقة المحيطة به.
وأكد، على أن متحف الحضارة من أهم المشروعات الحالية، متابعاً بقول شكراً للرئيس على التطويرات والاهتمام بالسياحة، مشددا على أن الرئيس يأخذ مصر للارتقاء بها للقرن ال21.
وقال، إنه يشعر دائماً أنه يعيش مع الفراعنة بسبب العمل المستمر في هذا المجال متابعاً : حياتي كلها فراعنة في فراعنة، مضيفاً : لو رجعت بنفسي 4600 نفسي أبقي الملك خوفو لأني درست كل شيء عنه وأعرفه كويس.
وحول من الملكة التي سيتزوجها إذا كان في عصر الفراعنة قال: أنا من عشاق أم خوفو الملكة "حتت حرس" وزوجته لإنهم حلوين.
وتحدث عن علاقة مقابر الفراعنة والإنجاب قائلاً: مرة وأنا بنقب على آثار فى الصحرا لقيت شاب صغير جاي بيقولى أنا متجوز من 5 سنين ومبخلفش وعايز أعدى على المقبرة، قولتله شوف إنت مثقف لكني هعمل إللي إنت عايزه، جبت شيخ الغفر قولتله خليه يخطى على المقبرة خليته خطى.. وبعدها بسنة لقيته جايب علبة شيكولاتة ليا وبقولى مراتى خلفت.
وتابع : فى الكرنك جعران بيخطوا عليه علشان يحملوا ودا اعتقاد خاطئ ، وبرازيلي قالي إن مراته عدت على "جعران" الكرنك خلفت.
وتحدث العالم الكبير عن أوجه الشبه بين المصري حالياً وجده الفرعوني قائلاً : كل المصريين شبه الفراعنة وبالذات الصعايدة لو شوفنا الصعايدة دلوقتي هنلاقيهم صورة طبق الأصل.
وأضاف "حواس"،: التليفزيون هو إللي غير حياتنا لكن إحنا مصريين وبنختلف عن أي ناس في الدينا إحنا شعب فريد وملشو مثيل في العالم علشان كدا ربنا حمي مصر.
وتحدث زاهي حواس عن من يتعاملون مع السياح قائلا : وجودهم مهم لكن هناك إللي بيستغل السياح وياريت دا ينتهي، وفيه ناس بانين عمارات 6 أدوار قدام الهرم ودا غلط".
وكشف العالم الكبير حقيقة ما نشرته العديد من الصحف الغربية في الفترة الأخيرة حول أن إخناتون كان ملكاً شاذاً.
وقال "حواس": لو بوست واحد صاحبى فى أمريكا هيقولوا عليا شاذ، لما شافوا "إخناتون" بيقبل حد من ولاده قالوا إنه شاذ لكن الثقافة المصرية غير كدا.
وأضاف: أن ظهوره تمثايله بشكل إنثوى ليه له علاقة بإخناتون نفسه، لأن إخناتون يمثل الذى الإله آتون على الأرض ويمثل المرأة والرجل.
وحول نظرية عدم وجود إخناتون وأن نفرتيتي وإخناتون شخص واحد قال: من يقول ذلك ليس له علاقة بالعلم مضيفاً إحنا بندرس الكلام دا وفيه ناس تطلع تقولك إن الفراعنة كانوا يهود أو الفراعنة كانوا بيدخنوا أفيون أو الهرم بتاعهم كان بيولد كهربا ودا كلام غير صحيح تماماً.
زاهي حواس
حوار زاهي حواس
الفراعنة
تليفزيون اليوم السابع
الملكة كليوبترا
الموضوعات المتعلقة
تليفزيون اليوم السابع يلقى الضوء على مفاجأة مرعبة ب"الزاوية الحمراء".. جثة فتاة سبب انسداد بالوعة صرف.. الجثة فى العقد الثانى من العمر.. ورجال المباحث يبدأون تحرياتهم ل"فك شفرة اللغز المذهل".. فيديو
الأحد، 13 ديسمبر 2020 11:16 م
محمد شبانة يكشف موقف العين الإماراتى من بيع كودجو للأهلى فى تليفزيون اليوم السابع
الأحد، 13 ديسمبر 2020 03:03 م
أمريكا تبدأ أكبر حملة تطعيم فى التاريخ.. فى نشرة تليفزيون اليوم السابع
الأحد، 13 ديسمبر 2020 02:40 م