محمد فتحى عبد الغفار – تصوير ماهر اسكندر مفيش بشر أو سائل محروم عدى عليها وطلب أكل وهو مش معاه إلا وأطعمته، بتحب كل الناس خاصة الأطفال اللى اتحرمت منهم، عطفها وحنيتها مع الحيوان يضرب بيه المثل، هبه عدس فتاة من أبناء منطقة السبتيه الشهيرة بتجارة الحديد والصنيعية والسواقين، نشات في تلك المنطقة وذاع صيتها بعد أن عملت على عربة لبيع طبق الكشرى والعدس، فلم تجد تاجر أو صنايعى يتذوق طبقها إلا ويقف يضرب لها ألفين تعظيم سلام، بنت من أبناء مصر الجدعان اللى معروفة في منطقتها باسم "هبه عدس".
تخرج يوميا من الساعة 3 صباحا قبل شروق الشمس وقبل آذان الفجر لتسعى على أكل عيشها، فهى أخت ل 9 هي أكبرهم، وضعتها الظروف أن تحمل على كاهلها عبء مصاريف أشقائها وأمها وزوجات أبيها، لتنزل إلى الشارع وسط هذا الكم من الرجال لتلبس عبائتهم وتتعامل معهم يوميا، ولكى تتجنب مضايقاتهم ارتدت الجميلة ذات الوجه الحسن ملابس الرجال .
ويسلط برنامج "فتحى شو"، الضوء على أشهر بائعة عدس في مصر، هبه نصر، والتي قالت والدموع تملئ عينها، "انا ربنا مكرمنيش بالخلقة وقالى الدكتور انى مفيش أمل، كان نفسى في ولد أو بنت أخدهم في حضنى لانى انا أصلا في الدنيا عايشة لوحدى بس انا كويسة وراضية وعمرى ما بصيت في عيشة حد والحمد لله راضية باللى مكتوب والمقسوم، واتجوزت مرة واحدة ومش هتجوز تانى بعد ما إطلقت وانا كنت الزوجة التانية".
وتابعت، "انا نزلت الشارع وانا عندى 14 سنة بقالى 25 سنة على العربية ديه، بنزل في الشتا الشغل من الساعة 3.30 فجرا عشان ألحق أعلم العدس، وكمان بنزل في الصيف الساعة 5.30 بعد الفجر عشان ألحق اجهز الاكل للصنيعية والتجار، انا بعمل عدس جميل جدا جدا جدا، عشان كده بيقولوا عليا هبة عدس وكل الناس تعرفنى".
واستكملت، "الشباب والكبار كلهم في المنطقة بيحبونى وفى أي مشكلة بيقفوا في ضهرى، الشارع بيقسى شوية لما تنزل وتشيل انابيب وميه مغليه وتجر عربيات غصب عنك هتنشف مش بايدك، والدى اتجوز 3 وسابنا ومنعرفش عنه حاجة ولا حتى زوجاته التانيين يعرفوا عنه حاجة ومخلف من كل واحدة احنا كلنا 9 اخوات، انا الكبيرة وبقف مع اخواتى واجواز والدى".
وأوضحت، "بتعامل مع الناس على معاملتهم، الوحش انا وحشة معاه والحلو أنا حلوة معاه، في الأول لما نزلت وكنت بدى حد علبة الشكرى ويلمس ايدى من تحت مكنتش بقدر أتكلم معاه، بس بعد كده الشارع بيبغير وبيقسى واتخانقت قبل كده مع واحد وانا شغاله مسكت السكينة وعورته ومن ساعتها مشوفتوش تانى، حب الناس ليا اكبر حماية".
واردفت، "اى حد معهوش فلوس وجعان انا مبتأخرش عنه ده رزق وخير كبير وفى اليوم ده لما باقى اعد فلوس اخر اليوم بلاقيها كترت وفيها بركة، انا طول ما انا بصحتى انا مش محتاجة حاجة كل يوم رزقى ربنا يبيعتهولى وبزيادة كمان، ور طبق الكشرى والعدس بتوعى هي بسم الله وديه كفيلة بأى طعم، بيبقى عليا كتير لما بعمل العدس وبخلص في ساعتين بس لانه وجبة حلوة مع البصل والعيش المحمص والطماطم المخللة والمسيحيين هما زباينى الأكتر لانه بيكون موسم الصيام بتاعهم".
ونوهت، "مليش صاحبة بنت ومعرفش أصاحب بنات وبمعرفش اتعامل معاهم ومليش في الخروجات مخرجتش من منطقتى من زمن ومعرفش اتخانق مع واحدة ولا اشتمها، بس ممكن اتخانق مع راجل واضربه كمان، انا بضحك وبهزر ومعنديش جنيه لحد وبشتغل وبكسب وبصحتى وديه نعمة من عند ربنا في ناس معاها ومش عارفة تعمل اللى انا بعمله مش قادرين يشيلوا اللى انا بشيله ولا يعرفوا يعملوا الجهد أو المجهود اللى بعمله ولا يقدروا ينزلوا من فجرية ربنا، اه تعبت نفسيا لما عرفت انى مليش في الخلفة بس عملت توازن لحاجات كتير في حياتى عرفت انى واخدة حقى في الدنيا وزيادة الحمد لله واخدة الستر من ربنا واخدة حب الناس واخدة الصحة ربنا مدى كل واحد حقه الحمد لله ".
ملكة العدس السبتيه بنت مصر العدس الأصفر سوق العصر العدس بجبه العدس بالشعريه الكشرى هبه الكشرى المصرى الكشرى الأصفر الكشري المصري الأصلي بنات مصر بنات مصر القاهرة السبتيه سوق العصر سوق السبتيه قصة مؤثرة قصة واقعية قصص وعبر قصص واقعية حقيقية قصص وروايات قصص نجاح
