أحمد مكى يعلن تأييده لثورة 25 يناير بأغنية راب

ظهر أخيراً الفنان أحمد مكى ليعبر عن موقفه من ثورة 25 يناير بوضوح، حيث اشتهر مكى بمساندته للشارع المصرى والناس البسيطة وإيمانه بالعدالة الاجتماعية.
خرج مكى الآن ليعبر عن رأيه الشخصى وقناعاته بأغنية راب من كلمات ولحن وتوزيع شادى السعيد، وشاركه فى الغناء محمد محسن وتقول كلمات الأغنية:
كرامة المصرى تسوى عنده كتير
نفسه يرجع كرامته والفساد يطير
شهر يناير يوم 25
أعظم تاريخ ثورة مصرية ع مر السنين
شباب رفع راس لفوق مش لابس طوق
عايز حقوقه الشرعية طلبها بكل ذوق
خدلك لفة فى ميدان التحرير
هتلاقى وشك ابتسم قلبك قرب يطير
شباب فهم معنى الوحدة اتحد عمل تغيير
قيمة المصرى النهارده بعد الثورة أكبر بكتير
متخافيش يا بلادى فى عز المحنة اتحامى فينا
إحنا ولادك رجالة نحطك فوق روسنا وعنينا
جدى وجد جدى استشهدوا فيكى وبيحموكى
مش ممكن أحفادهم يجو فى يوم ينسوكى ويرموكى
واقفين زى الأسود إيد واحدة لجل يحرروكى
فى منهم اللى استشهدوا وبدمهم فدوكى
شكراً لكل شاب قال رأيه من غير ما يخاف
راجل من ضهر راجل خلى العالم بص وشاف
طول ما فى فرقة وفتنه هتضيع الحقوق
شوف أول ما اتحدنا أيد واحدة بقينا أسود
مسيحى مسلم مثقف أمى غنى وفقير ضموا كل هتافهم فوق بعضه اتحول زائير
حتى لو محققناش كل المطالب بردة كسبنا كفاية إن العالم كله عرف مين إحنا
ما هى الرجولة والأخلاق متبنش غير وقت المحنة
كل البيوت بقت بيت واحد والله فرحنا
مش عايز ذل وظلم وإهانة عايز تقدير
بلده عنده زى عرضة يخاف عليها يغير
كرامه المصرى تسوى عنده كتير
نفسه يرجع كرامته والفساد يطير
بيطالب بالتغيير أيوه عايز تغيير
صابر أيوه لكن لو انفجرت هكون سلاح خطير
لو نزلت ميدان التحرير هتلاقى دولة صغيرة جوه الدولة دولة.. لو حد فيها خبط فيك هيقولك أسف.. ولو حد عايز يعدى هيقولك بعد إذنك.. ولو حد عايز يشوف بطاقتك هيقولك معلش إحنا مضطرين.. تسمع كتير فيها كلمة حاسب علشان البنات تعدى مفيش فيها معاكسة أو تحرش.. لما المسيحة بيصلى المسلم بيحمى ضهره.. ولما المسلم بيصلى المسيحة بيحمى ضهره.. هى دى مصر اللى إحنا عايزنها.