طائر الحرية

بافرد جناحى فى الفضا
واشدو برضا
لما الندى يلمع على ورق الشجر
يغسل قلوب زى الحجر
يمنح جماله للورود
ينضح براءة على الخدود
لما كلام الحر يكمل بالخلود
وقت الصمود
ما تهزهوش لحظة خطر
يوم ما البشر
كل البشر تاخد نصيبها فى الوجود
تونس يا خضرا
شقى بصوتك المدى
هبوا شبابك لما رددتى الندا
كانوا الفدا
وكانوا لنشيدك لما غنيتى الصدى
بكرة ابتدا
بنور شهيدك لما بالروح افتدى
حريته وسكته بعناده وسط الظلم والشوك والردى
يوم ما ارتدى صبره وعزيمتهو بتاريخك اهتدى ***
لحظة ميلادك يا وطن
لحظة زمن
نعلن ميلادك فى العلن
بعد المخاض المر والخوف والمحن
بعد الفساد والظلم والسوس والعفن
و لا بد من دفع الثمن
لا بد من دم الشهيد
ولابد من النار والحديد
تولع تقيد
تكبر تزيد تصبح رماد
لاجل الولاد ما يقلعوا توب العبيد
ويعيشوا حرية وطن
من غير جراح من غير شجن
و لا بد من دفع الثمن
لا بد من دفع الثمن