مصر العظيمة

رغم الدموع ورغم القيود شمسك هتفضل ماليه الوجود
يمكن دى لحظة فيها خريف دبلان الورق وبتبكى الورود
كلامك وصمتك كله معانى وصبرك عزيمتك ماليها حدود
عزيزة قوية يا رمز السلام نارك بتحرق قلب الحقود
تاريخك ودورك عايش وصاحى وبهمة ولادك تعدى السدود
ولادك فداكى يضحوا عشانك ولما تنادى تلاقى الردود
بنحبك مهما قسيتى علينا دا قلبك يا أمى علينا ودود
قلوبنا بتعشق وتهوى ترابك ونيلك ودمى فصيلة شهود
بنحبك حقيقى فى حرك وبردك دا عشق ومحبة وبينا عهود
لوغيمة فى لحظة عدت علينا شمسك بسرعة ترجع تعود
فكرك تأمل يجدد نشاطك ونجمك طريقه مجد وصعود
مكانتك هتفضل رغم الجميع هازمة الأعادى وكايدة الحسود
جذورك قوية مهما الرياح حاولت تهزك تزيدى صمود
كنت ولسه باقية عظيمة يا تاج العروبة عرين الأسود
صاينك وحافظك ربى وراعيكى كاتب لشعبك ونيلك خلود