بالصور..بعد ارتفاع أسعار الذهب تضارب آراء البنات والأهالى بالغربية حول إلغاء الشبكة.. انقسامات بين مؤيد ومعارض.. ربات البيوت: وقف حال.. فتاة: هدية العريس لا يمكن استغنى عنها.. و"صايغ": الإقبال قل

بعد ارتفاع أسعار الذهب شهدت الصاغة بالغربية، حالة أشبه بالركود بعدما كانت كسوق الخضار، خاصة فى أيام الجمعة والأحد والخميس، وصاغة طنطا تحديدًا كان يأتيها الناس من كل صوب وحدب والقرى والعزب لشراء الشبكة ودبل الخطوبة بأرقام خيالية وخرافية بدءا من 10 آلاف جنيه ووصولا لأكثر من 100 ألف جنيه.

وبعد تدشين حملات إلغاء الذهب من الزواج والبحث عن بدائل مثل الفضة والذهب الصينى، قام "اليوم السابع" بعمل استطلاع رأى بين طالبات الجامعة المقبلات على الزواج وبعضهن مخطوبات، وبين أولياء الأمور وربات المنازل والأمهات وتجار الذهب لمعرفة رأيهم من حملة إلغاء الشبكة، فظهر تباين فى الآراء وفرق شاسع فى وجهات النظر ليبقى الذهب والشبكة هما محور الحديث فى بيوت المصريين خاصة من عندهم أولاد فى مقتبل الزواج ."الدبل" بديل عن الشبكة والاكتفاء بها مطلب شعبى
وقالت أمنية سليم طالبة بجامعة من قرية شبرا قاص بمركز السنطة محافظة الغربية "أنا مع قرار إلغاء الشبكة، خاصة أن العريس يضطر لبيعها بعد الزواج مباشرة لقضاء ديونه ويتعرض لخسارة فارق المصنعية"، مشيرة إلى أن هناك أشياءً أيضًا فى جهاز العروسة يجب التغاضى عنها مثل كماليات النيش من باب التخفيف على أولياء الأمور.
وقالت نهال جمال الدين أنا ضد الشبكة والكلام ده أصلا ومع مبدأ المشاركة والتساوى بين الطرفين، وشاركتها تقى السيد الشرقاوى طالبة بجامعة طنطا ومقيمة بمدينة طنطا فى الرأى، وقالت "أنا مع فكرة إلغاء الذهب حال عدم استطاعة العريس، أما إذا كان مقتدرا فلا مانع من ذلك كهدية للعروسة".
وقالت منار محمد رمضان 20 سنة طالبة فى الجامعة "أنا مع فكرة إلغاء الذهب، لأنه لا يدوم فى الحياة الزوجية، بينما الود والمحبة والبساطة تدوم وأنفع فى الحياة الأسرية".
هدية العريس للعروسة لا يمكن الاستغناء عنها
واختلفت سارة عبد المنعم سالم- 22 سنة من طنطا فى الرأى السابق، وقالت "أنا ضد فكرة إلغاء الذهب لأن دى هدية من العريس للعروسة حتى لو مش معاه فلوس ممكن يجيبلها على أد مقدرته ووالد العروسة بيهديها بردو مش هو بس، لأن دلا حاجة بتفرح البنت هى مش هتتجوز كل سنة عشان نلغى الشبكة والذهب وطالبت الحكومة بالعمل على رجوع أسعار الذهب لمتوسطها الطبيعى".
مروة: لست مع إلغاء الشبكة ولست مع المغالاة فى التكلفة كل حسب استطاعته
وهناك رأى ثالث غير موافق على إلغاء الشبكة وغير راضٍ عن غلائها والتكلف فى ثمنها، وقالت مروة الموافى طلب الرسول من أحد الصحابة أن يلتمس خاتماً من حديد حينما لن يجد ما يقدمه لزوجته إذا الهدية مطلوبة وإلا كان عفا عنه، وقالت نصًا "أنا ضد إلغاء الشبكة بشكل عام لأنها فيها مكرمة للنساء وكل على حد استطاعته وإمكانياته".
أشجان: مصدر أمان
وقالت أشجان محمد نعيم "أنا ضد الحملة نفسها من باب أنها هتعمم إن مفيش شبكة وده غلط لأكتر من سبب لأن فعلا الشبكة مصدر أمان للست فى وقت مجتمعنا فيه محتاج يتعلم معنى الأمان، خاصة رجالته ولو هنتقارن بالأجانب فإحنا مش زيهم لأكتر من سبب".
وقالت نصا أنا نفسى مش هجيب شبكة ونفسى كل بنت يبقى ده تفكيرها بس بمزاجها مش يبقى فرض إن ملهاش شبكة لا يبقى ليها وهى اللى تقول مش عايزاها، وأتمنى شروط الزواج تقل وتبقى بسيطة بس مش بالإجبار نفسى من جوه كل بنت وولد هى اللى تبقى عايزه ده ويشتروا اللى على أدهم .
وقالت هبة مصطفى "الشبكة بمفهومها المعروف هى إهانة للبنت، كونها هدية من خطيبها ومفيش حد يحط شروط على الهدايا، وكل عريس حسب استطاعته فى هديته كما طالبت بإلغاء التكلف فى العفش والجهاز.
ربات البيوت: خراب بيوت ووقف حال
وقالت جمالات سعيد ربة منزل "اللى بيحصل ده خراب بيوت وتبذير ووقف حال للبنات والولاد كمان، البساطة حلوة، هو مين من الشباب معاه ثمن الشبكة حاليًا غير الوارثين من أهلهم، وقالت هناك حرب فى أسعار الشبكة بين الأسر، خاصة فى القرى، والعروسة الحلوة يعملوا عليها مزاد وكل عريس يقدم شبكة أعلى من التانى ويوافقوا على أغلاهم سعرا ده حرام اللى بيحصل ده، كفاية قوى دبلتين وربنا بيبارك فى اللى مهرها قليل".
وقالت فاطمة السيد محمود ابنى اتقدم لبنت بيحبها أهلها طلبوا 100 جرام ذهب هنجيب منين كرامته خدته وساب البلد وسافر كرها فى المغالاة فى المهور، وأهو بيعافر فى بلاد الغربة منهم لله اللى كانوا السبب .
تجار الذهب: البيع مستمر لكن الكميات قلت
ومن جانبه قال وديع مينا تاجر ذهب "إن غلاء الأسعار لم يمنع حركة البيع والشراء فهى مستمرة يوميا بشكل طبيعى والأفراح يومية لكن كميات الذهب قلت كان هناك عريس يشترى بالمائة جرام حاليا معظم الناس تكتفى بالدبل بشكل مبدئى".
وأكد حامد محمد أن غلاء الأسعار قلل عمليات الشراء فقط بينما زادت عمليات البيع وكل مواطن مدخر ذهب يطرحه للبيع حاليا حتى يستفيد من فارق الأسعار .

بعد ارتفاع أسعار الذهب تضارب آراء البنات... by youm7

أمنية سليم
منار محمد
سارة سالم
مروة الموافى
نهال جمال الدين
أشجان محمد نعيم
هبه مصطفى
أحد محلات الذهب
محلات الذهب