بعد الفراق.. عملت إيه أول مرة تشوف حبيبك بعد الانفصال؟

سؤال يبدو بسيطًا ولكنه كان مفتاحًا على جراح لا تنتهى لمستخدمى موقع التواصل الاجتماعى "فيسبوك" حين طرحت إحدى الصفحات الاجتماعية عليهم سؤالاً حول المرة الأولى التى قابلوا فيها حبيبهم بعد الانفصال، وتوالت القصص لهذه اللحظة التى يتخوفها الكثير من العشاق مهما طال الوقت قبل أن يحدث هذا اللقاء الأشد قسوة عليهم.
ومن بين القصص المأساوية التى يرويها أصحابها بالدموع، حاول البعض أن يغلف قصته المحزنة بالقليل من السخرية لعلهم يتخطون هذا الموقف الصعب وإليك أغرب المواقف لأصحاب القصص الغرامية بعد الانفصال..
سمى بنته على اسمى.. بس مش زى ما انت فاكر
حكت إحدى الفتيات "انا لسه شايفه اللى كان حبيبى امبارح بعد ما سبنا بعض خمس سنين.. هو ماشاء الله اتجوز وسمى بنته على اسمى، وأنا أول حاجة جت فى بالى إنه سماها كده مش حبًا فيا، لأ عشان يشتم فيها براحته".
"موقعة الدبدوب"
حكى آخر "أول مره اشوف اللى كنت مرتبط بيها بعد ما فركشنا كانت فى الفالانتاين. ... لقيت واحد حاضنها فى الشارع وجايبلها دبدوب رحت شديته من ايدها وقلتلها قصاد الدبدوب اللى مرجعتيهوش.. واتخانقت مع الواد لحد ما قالها رجعيله دبدوبه وهاتى دبدوبي. ... وروحت هى من غير دبدوب يا اااااااه من ست سنين وكنت مسميها موقعه الدبدوب".
"فرصة ثانية"
وحكى زوج "أم بنتى شفتها بعد انفصلنا مبقتش عارف اتلم على نفسى وعاوز اجرى عليها واخدها فى حضنى ومبقتش عارف اعمل إيه وجالى حالة هستريا انها لسة مراتى ولزم اخدها فى حضنى ياعنى لزم اخدها فى حضنى رحت عندها وبصيت ليها ومن غير ولا كلمة حضنا بعض اووى وندمت اوووووى انى فرطت فيها وبعدتها عنى ودلوقتى بنحاول نرجع لبعض ربنا يهدى الكبار ادعووولى".
"محصلش حاجة"
ببساطة حكت فتاة أخرى "شفته فى وفاة خالى بس عادى اتصرفنا كقرايب مش مفركشين و حضرت شبكته وفرحه وحاليا بقعد مع مراته كل ما اروح لتيتا وبحبها جدا علشان هى انسانه تتحب وطيبه أوى ربنا يباركلهم يارب ويرزقهم الذريه الصالحة".
"من غير كلام"
"شوفته بعد طلاقنا ب 10 ايام ... كنت فى فرح اختى و هو اخو العريس قعدت اضحك قدام اهله وكنت عادى بس لفيت ورا الكوشه وانفجرت فى العياط لانه حب 7 سنين ارتباط و 3 خطوبه و سنتين جواز..ولسه بلف لقيته واقف ورايا بيعيط".