على الدّكة

على الدِّكة .. وفود ووفود
بترحل بس يوم هتعود
عشان بينها وصال وعهود
بتحفظها ومالها حدود
عشان خاطر عينيها السود
على الدِّكة .... تلاقى حبيب
على الدِّكة ... نغم ونحيب
على الدِّكة تلاقى غريب
عن الدنيا ومنها قريب
على الدِّكة ....أبويا الحاج بيربّع
يمد الرجل فوق الرجل وتوسّع ...
لحد ما تحضنه هيه
ملوش غيرها
مفيش مرة كده هجرها وغضبت
أو فى يوم قالت يبات بره
على الدكة ....
حرامى كبير
وشيخ بيعلموه التكبير
وعاطل من زمان شايل
شهادة فيه كام تقدير
وعاجز كان أسير وسبوه
وراسم للمعاش طوابير
وطفل صغير
خدوه بيعلموه التضليل
وبنت حليوه مالها عريس
وخايفة موت من التعنيس
بتغوى واد لكن فى الجيش
بتستناه .......
وليه ميجيش ؟
وع الدكه ....
هناك ع الحرف مِدارى
بتاع ورنيش
يزيف كل شيء باللون
يغير لون يبدل لون
عشان تمشى الحياة ... وتهون
على الدكة ....
بتاع كورة
وواحد فى القانون مشهور
وكام دبور
بيخرج م الضلام للنور
وميت إعلامى كان مغمور
يقرر مين يكون فيهم
طلع خسران
ومين منصور
على الدكة ...
صليب وهلال
بمليون حال
ساعات الشوق بيخطفهم
ويقلب فى النهاية قتال
وصاحبك كل يوم يكدب
يقولك حالنا عال العال
ودافن راسه فى الرملة
بيهرب من جواب وسؤال
بيحلف إن ع الدكة
مفيش فتنة ..
دا لعب عيال
على الدكة ...
مسافر والسفر هدّه
وليل البعد طال وياه
وعاد ملهوف على بلده
وكان بدّه
تعود البسمة على خده
صبح مش لاقى فيها مكان
لا ليه ولا حد من بعده
كلوها المحسوبين ورموه
مابين قربه وبين بعده
وع الدكة...
شهودها عيان
وعن صاحبك بقو عميان
على الدكة مفيش توريث
مفيش تطفيش مفيش عصيان
على الدكة الجميع منصان
على الدكة الجميع عارف
بأنه فى الأساس إنسان
على الدكة مفيش إضراب
وع الدكة الجميع أحباب
على الدكه الجميع منساب
يقول الآه بلا أسباب
يقول الآه ومن غير خوف
مفيش للدكة دى أنياب
. على الدكة تلاقى ناس
مهياش ناس
لكن عايشة كده وخلاص
يغازلها رغيف العيش
يرقصها جنيه بقشيش
متعرفشِ عن الدكة ولا حاجة
ولا للدكة محتاجة
غير المأوى
تخاف من نومه السكه
وكل أملها فى الدنيا
تنام ليلها متحلمشى
لا ب امبارح ولا بكره
ويوم ما تموت ما تتسبشى
فى وسط طريق
وتنهشها كلاب الليل
ما يبقى منها ولا حته
أملها تترمى الجتّة
وتتكفن بتوب الصبر
وتمدد على الدكة
على الدِّكة
يوماتى أكيد هتتعلم
وتتكلم
وتظلمها ...وتتظلّم
وتوجعها وتصدعها
وتملاها جروح وآلام
وقبل ما تيجى فايتها
عليها أكيد هتتندم
وع الدكة
جابولنا غفير
عجوز وضرير
وبعد يومين بقالها وزير
وقالوا بصير
وقالوا كمان
مفيش تنكيل
محدش يمنعك
م القول وم التعبير
ويعنى الدِّكة لو سمعت
هتعمل أيه ؟! مفيش تغيييييير
مهو ع الدكة ألف حصار
وعسكر فوق على الأسوار
وكام سمسار
وصاحبها بعت إخطار
تلاه ألفين بيان وقرار
يكلبشها ميتين مسمار
وتتحرم على القاعدين
وعلى المارين
وع الزوار.