بالصور... سائقو مصر يصفون حالهم على سياراتهم

عبارات غريبة وحكم عجيبة يكتبها السائقون فى مصر على سياراتهم، خاصة النقل والميكروباص، وأحيانا الملاكى تعبر عن أفكارهم وآرائهم وحالهم، فى ظاهرة تكاد تنفرد بها مصر... وفى جولة للسيارات فى مصر تتنوع العبارات المكتوبة خلف السيارات ما بين الدينية والأمثال الشعبية وحكم المصريين... وأشهرها يقينى بالله يقينى، مستورة، يا رب سترك ورضاك، سولار وربك الستار ....سيبها لله، الحلوة لما تدلع تخلى الإسفلت يولع، الأجرة لو سمحت، الوقوف متكرر، سوقوا بالراحة يا بهايم أصل سواق العربية نايم، لو كنت دارى بحالى كنت بكيت بدالى ...
وأكثر ما يخشاه السائقون فى مصر الخوف من الحسد، لذا تكثر على سياراتهم الآيات القرآنية التى تستعيذ من الحسد، كالمعوذتين والملصقات الخاصة بالحسد مثل الكف والعين، وتتجلى حكم المصرين وأمثالهم فى التصدى لعين الحسود، وصرفه عن النظر لسيارتهم مثل من العين يا رب سلم، عضة أسد ولا نظرة حسد، يا ناس يا شر كفاية قر، ما تبصليش يا عبيط الحلوة بالتقسيط، ما تبصليش يا جبان أنا جايبها بدهب المدام، ما تبحلقش كده يا لوح دى جت بطلوع الروووح، دى مش دبابة دى مال غلابة، طلبت من ربنا إدانى وعين الناس مش سيبانى، الحلوة مش ورث دى جاية بطلوع الضرس، الحلوة دى من حلوان وصاحبها راجل غلبان، ما تبصليش بعين رضية بص للى اندفع فيه، متبصليش بعين رضية دنا طلع عين أمى فى السعودية، عيون الناس قراره وعيون الرب ستارة، الحاسد ربنا يعينه، الحلوة خوخة جت بعد دوخة، دى قصة كفاح مش جاية على المرتاح، سيبونى أسدد ديونى، ما تبصليش بأيامه دا أنا بجرى على يتامى، لا افتخار ولا غنى دى من ربنا، للبيع عشان ترتاحوا، الحلوة من اليابان وصاحبها واحد غلبان، الحلوة من دمياط وعليها أقساط، لا تتعجب إنها إرادة الله...
وتتجلى خفة دم المصريين فى عبارات غريبة لا تعرف الهدف منها مثل، إن عيشت هزلكو وإن مت ربنا يسهلكو، تركب معايا أسليك تنزل أولع فيك، خدى بالك من الواد... أنا نازل يا سعاد، جبنا المازدا وجيبنا الزيت وهى عليها خراب البيت، بكره ترجع ريما من عند خالتها فى مارينا، إيسوزو النوزو كوانونزو، دلعها فى الغيارات وريحها على المطبات، الحلو حلو ولو صحى من النوم، سولار فى التانك ولا مليون فى البنك، لا تقولى بطاطس ولا بتنجان الحلوة جاية من اليابان، مفيش معلم غيرك يا معلم، إحنا صحيح صغيرين لكن فى السوق معلمين ..
من حق التقيل يتدلع، شوفوا الجديد يا بلد التقليد، لو كان الجرى بالرتب كان زمانى لواء، سولار فى التنك ولا دولار فى البنك، سلام يا بلد الكلام، اجرى جرى الوحوش أوتوبيس 710 ما تلحقوش، ربنا يحميكى من الميكانيكى، اللى يخاف من العفريت يعمل عبيط، ما حدش فاهم حاجة، المضطر يركب التاكسى، " تعمل حسابى أقدرك تهزر معايا أعورك"، عدى واجرى على آخرك وعند الكمين الرادار هايقابلك، اللى يحصلنى يكسرنى، العجوز دة رياضى والدكر يمشى قصادى، الحلوة مخطوبة.. بس أكلتها الرطوبة، إمشى على جنب لحسن السواق جاى، حلوة ومتلمعة وعلى السكة متشخلعة، مركز صيانة كريازى وكريازك وكريازنا كلنا ت: 122.
أما العبارات الحكيمة والتى تخرج من القلب بعد تجربة مريرة تصل للقلب وتجد نفسك ترد على سائقها فى داخلك قائلا: "صدقت"، وأشهرها لما كنت عصفور أكلونى ولما بقيت أسد صاحبونى، ما فيش صاحب يتصاحب، عتاب الندل اجتنابه، اللى أمه تدعيله أحسن من اللى أمه تديله الرجولة مواقف والندالة دروس، لو كان الرزق بالجرى ما كانش حد حصلنى، يا سلام لو الناس تبطل كلام، عشقت السفر من ظلم البشر، " كل واحد عاجبه عقله، يا بركة دعاكى يا مه...
والبعض الآخر من السائقين يفضل الإعلان عن نفسه بكتابه اسمه أو شركته، فتجد مثلا البرنس محمود... صعب تنسانى، شركه البطة المرتاحة للسفر والسياحة، كما استغلت معارض السيارات هذه الظاهرة ووقعت اسم المعرض على كل سيارة تخرج من عندها، وظهرت الملصقات الروشة للسيارات الملاكى عليها شفايف، قلوب، VIP... وتختلف عبارات المصريين على سياراتهم باختلاف الحدث، ففى أعقاب أزمة الرسوم المسيئة للرسول الكريم، رفضها البعض كاتبا على سيارته أو معلق ملصقات عليها فداك أبى وأمى يا رسول الله ، إلا رسول الله، لا إله إلا الله محمد رسول الله ... وفى أثناء مباريات التأهيل لكأس العالم أو مباريات مصر فى المباريات الدولة تجد جميع أنواع السيارات وقد اكتست بالعلم المصرى، وأحيانا يعبر السائق عن موقفه السياسى مثل عبارة "الله وهب مصر 3 ... النيل والأهرامات ومبارك، أو رأى آخر يقول لو لم أكن مصرياً، يبقى قشطة أوى.