السلام عليكم أخباركو إيه يا جماعة ؟ بصوا.. بعد الموضوع اللى حصل فى الحلقة اللى فاتت وبعد ما اتفقا أنا وعهد على موضوع الفلايرات دة، بدأنا فعلًا نطبع الفلايرات ونوزع منها فى الصيدلية وبالفعل لاقينا استحسانا كبيرا من ناس كتير بالرغم برضوا أن ناس وقفت ضدنا.. بس فعلا بعد فترة الوعى حقيقى زاد والحالات بتاعة الختان قلت كتير أووى عن الأول. دلوقتى فات سنة من بعد ما فتحت الصيدلية والحمد لله الأمور تمام والدنيا مظبوطة كتير عن الأول والحالة ماشية كويس بواجه دلوقتى مشكلة بقا مع الاكسباير الاكسباير دة بقا يعنى أن الدوا يخلص تاريخ صلاحيته وطبعا ما ينفعش خالص إنى أبيع منه ولا حتى أحطه على الرف علشان التفتيش الصيدلى اللى ممكن ييجى من المديرية فى أى وقت ولو لقى اكسباير على الرف ح يعملى مشكلة بس أظرف موقف شفته بخصوص الأدوية اللى تواريخها مقربة.. الموقف اللى ح أحكيلكو عليه دلوقتى دخل عليا مرة واحد من يومين كدة عنده برد وعاوز دوا يخلصه من الأعراض، طلعت له دوا من رف جنبى كنت انا عاملة للأدوية اللى تواريخها مقربة علشان إيدى تروح عليها دايما الراجل بص فى العلبة كدة وقعد يقلب فيها يمين وشمال وورا وأدام لغاية ما قرأ التاريخ بتاع الصلاحية ولقا فاضل على انتهائها شهرين وبقالها سنتين من تاريخ الإنتاج. قاللى - عدم اللامؤاخذة يا ضاكتور.. الدوا دة مش طازة.. دة من زمان أوى.. أنا عاوز حاجة لسه طالعه من المكنة ههههههه طازة ؟ ومكنة ؟ يا حزنى ياانى دى بالفلاحى يعنى فاضللى شوية وأشق هدومى - يا حاج والله كله زى بعضه , المهم بس ما يكونش تاريخ العلبة عدى خلاص و شوية من يهديك على شوية من يرضيك وحاجات من دى وبرضو مفيش فايدة أعمل إيه بس طبعا صرفت له علبة تانية من اللى تواريخها بعيدة.. طازة يعنى ههههههه ولسه طالعة من المكنة طب أنا عاوز أتصرف فى حكاية الاكسباير دة لأن الشركات عادة ما ييرضوش يقبلو مرتجعات الأدوية دى إلا بشروط مجحفة الحقيقة علشان كدة قررت إنى أتصل بتاجر اكسباير علشان ييجى يشيل شوية الأدوية اللى باظت عندى و فعلا اتفقنا على ميعاد ييجى فيه النهاردة الإثنين بالليل الراجل فعلا جه الصيدلية إسمه خالد دخل الصيدلية وكنت أنا وعهد وسليمان فى الصيدلية خالد : مساء الخير يا د هاشم أنا : أهلا أستاذ خالد , اتفضل اتفضل , يا سليمان..اعمل لنا اتنين شاى خالد قعد جوة معايا وسليمان عمل اتنين شاى وجابهم لنا على المكتب وطلبت من سليمان يخش يجيب الكرتونة اللى فيها الادوية الاكسباير علشان نفرزهم انا وخالد علشان نشوف ح يحصل إيه سليمان جاب الكرتونة فعلا وبدأنا الفرز أنا وخالد و احنا بنفرز دخلت الصيدلية واحدة ست مش كبيرة فى حدود ال 30 سنة كدة وسليمان وقف لها علشان يشوف هى عاوزة إيه.. قالت له : لا معلش أنا عاوزة الدكتورة عهد قامت لها وقالت لها اتفضلى.. أى خدمة ؟ الست قربت عليها ووشوشتها كل دة وأنا عينى عليها مش مركز دلوقتى مع خالد خالص خالد : شوف يا دكتور هاشم.. الأصناف دى مش كلها ح أعرف آخدها لان فيها حاجات تمشى وحاجات ما تمشيش أنا : إنت ح تاخد على خصم كام خالد : 15 % أنا : نعم ؟ هو فيه خصم بالشكل دة ؟ خالد ما هو يا دكتور إنت عارف بقا الاكسباير دة مشكلة كل دة وأنا عينى على الست اللى واقفة تتكلم مع عهد بصوت واطى وبدأت أسمع الست : هو إنتى فى كلية إيه ؟ عهد : أنا خلصت طب بشرى الست : طب كويس.. ربنا يباركلك.. إنتى مش متجوزة... مش كدة ؟ خالد : قلت إيه يا دكتور هاشم أنا : إيه ؟ قلت إيه فى إيه ؟ خالد : فى الخصم يا دكتور أنا : شوف إذا كنت ح تاخد الاكسباير يبقا على 25 % وتشيله كله مكنش وح تختار يبقا اللى ح تاخدة ح يبقا ب 35 % قلت إنت ايه ؟ الست : طب وماله دة أنا أخويا ح يعملك اللى إنتى عاوزاه كله.. دة لسه راجع من أطاليا ومتريش أوى وح يعملك عيادة وصيدلية وكل اللى نفسك فيه بس إنتى تؤمرى بس ومش مشكلة خطيبك إبقى إرميله دبلته دة أنا أخويا ح يغرقك دهب.. ألا قوليلى.. هو بابا ساكن فين ؟ أنا : فيه حاجة يا دكتورة ؟ عهد وشها إحمر أووى رحت قايم ومستأذن من خالد ورحت على الكاونتر أنا : أيوة يا مدام اؤمرى الست : لا مش عاوزة حاجة دة كان موضوع مداماتى كدة بينى وبين الدكتورة وراحت سايبانا وماشية وخرجت برة الصيدلية بصيت لعهد راحت منفجرة من الضحك وقالتلى - الست دى عندها اخ لسة راجع من إيطاليا وبتقول إنه شافنى كذا مرة هنا فى الصيدلية وكان باعت أخته دى علشان يشوف ظروفى إيه وعاوز يتقدم لى.. إيه رأيك يا هاشم ؟ أتكل على اللة وأوافق ؟ - و الله أنا شايف إنك تتكلى على الله وتروحى علشان شكلك كدة ح أنكد عليكى - بهزر والله بهزر... بس شوف.. انا الناس بتجرى ورايا إزاى ؟... إنت بقا حد عبرك ؟ ولا قاللك إنت فين ؟ علشان تعرف بس أن أنا نفسى حلوة - عادى ولا يهمنى.. أنا لسه البت بتاعة السمك اللى جت مرتين هنا علشان نشترى منها طلعت عليا إشاعة إنى بحبها وعاوز اتجوزها هههههههههههههه - نعم ؟ البت بتاعة السمك ؟ طب لما تيجى - شفتى إنتى عقلك صغير إزاى ؟ بتغيرى من بتاعة السمك ؟ ما حصلش على فكرة أنا بغيظك بس - هههههههههههه كدة ؟ ماشى طب ياللا خلص مع الراجل علشان توصلنى البيت - ماشي رجعت تانى لخالد - هاااا قلت إيه يا عم خالد ؟ - و الله أنا اتصلت بكام واحد كدة يا دكتور بس برضو 35 كتير نخليها 25 وأشيل كله.. ما يجراش حاجة - ماشى اتفقنا.. شيل.. و بكدة الحمد لله خلصت من الأدوية الاكسباير اللى عندى وعلى رأى المثل.. الخسارة القريبة ولا المكسب البعيد اشوفكو بقا فى الحلقة الجاية قال بابا ساكن فين قال.. أنا ناقص ؟ ياللا دمتم بخير سلامو عليكو
