يوميات صيدلى فى الأرياف.. روحنى شكرا

- أهلا عهد
- ................
- اتفضلى..خشى اقعدى على المكتب جوة
- ..........
لا يا جماعة ما تفهموش غلط... عهد مش فاقدة النطق ولا حاجة.. عهد والله بتتكلم وزى الفل.. بس هى مخزنة الكلام دلوقتى وبتتكلم فى سرها مع اللى عمال يوسوس لها فى ودانها
- يا سليمان.. هات علبة الكريم اللى موجودة فوق على اليمين اللى نصها أحمر ونصها أبيض
سليمان جاب علبة الكريم وأديتها للمريضة ووصفتلها طريقة الاستعمال وخرجت برة الصيدلية
- أهلا عهد. ؟ عاملة إيه ؟ إيه المفاجأة الجميلة دى ؟
- أهلا بيك انت
- أزيك ؟ طب كنتى قولى وأنا أجيبك بالعربية بدل ما تيجى فى المواصلات
- .....
- طب إيه رأيك فى الصيدلية
- الصيدلية حلوة وزباينها باين عليهم حلوين برضو ؟
- عهد... إيه ؟
- إيه.. إيه ؟ أنا شفتك بتمسك أيديها
- نعم ؟ والله ما حصل ؟ انتى بتشوفى حاجات ما بتحصلش ولا إيه ؟
- انت كمان بتستعمانى ؟
- ايه يا عهد ؟ ما حصلش حاجة... دى مريضة زيها زى أى حد بيخش الصيدلية وبعدين افرضى حتى انى مسكت ايديها ولو أن دة ما حصلش.. إيه هو أنا مش المفروض اشوف طبيعة المرض إيه ؟ يعنى انتى لو بتكشفى على مريض ح اعمل معاكى كدة؟
- انا دكتورة. وحالفة القسم
- يعنى أنا اللى كهربائى سيارات.. ما أنا دكتور برضو
على فكرة عهد لسه متخرجة من كلية الطب من شهرين بس وبعدها خطبتها على طول.. أنا حاولت اخطبها قبل ما تخلص الكلية بس والدها ماكانش راضى أبدًا والسبب أنه بيقول إنى ح اشغلها عن المذاكرة، أنا عاوز أقول له بس.. والله يا عم الحاج دة الفيس بوك بيشغلها اكتر منى
يعنى لو خليتنى أخطبها وفصلت النت عندكو فى البيت كان هيبقا ارحم
- بقولك إيه يا هاشم.. روحنى
- طب دة كلام دة ؟ دة احنا حتى لسه ما قعدناش مع بعض شوية..
- لا كفاية كدة
- يا بنتى اقعدى شوية ,, افرجك حتى على الصيدلية
- لا مش عاوزة دلوقتى.. أن شاء الله المرة الجاية.. أنا عاوزة اروح علشان أنا ضغطى مش مظبوط
- طب اقيس لك الضغط ؟ دة أنا عندى جهاز ضغط ديجيتال والله وجميل وبيدى القراية مظبوطة
- انا مش عارفة انت جايب الروقان دة منين.. روحنى يا هاشم
طبعا حرصا على المظهر العام أنا قبلت انى اروح عهد لبيتها
عهد ممكن تعمل فضيحة... انتو ما تعرفوهاش.. لما بتتعصب بتقفل عينيها وتفتح بقها على الآخر وبعد ما تخلص زعيق تفقد الذاكرة وتقوللك " أنا معملتش كدة ولا قلتش كدة "
خرجنا من الصيدلية قابلنى وانا خارج عم هلال
فاكرينه ؟
دة التمرجى اللى شغال عند الدكتور زغلول
- ازيك يا دكتور ؟
- الحمد لله عامل انت إيه يا عم هلال ؟
- الحمد لله.. الدكتور زغلول بيقوللك ادينى علبة كريم شعر بالمظ من اللى هى صفيح مش بلاستك وفرشة سنان وتلات علب زيت من بتاع اوكا واورتيجا واكتبهم عندك لغاية ما يقابلك أن شاء الله
- يا سليمان.. ادى لعمك هلال اللى هو عاوزه واكتب لى فى ورقة الحاجات اللى اخدها. ياللا يا عهد
ركبت العربية أنا وعهد
عهد طول الوقت باصة فى الشارع زى ما يكون رايحة المطار ومسافرة أمريكا ومصر ح توحشها
- عهد
- ........
- عهد
- ..........
- الوووووووووووو
- عاوز إيه ؟
- لا ولا حاجة.. سلامتك.. انتى مش ح تفكى بقا
- لا مش ح افك
- ليه ؟؟ مش معاكى فكة ؟ هههههههههه
- بايخااا... بقولك... أنا عاوزة آجى اشتغل معاك
- نعم ؟
- ايه فيه إيه ؟
- لا مفيش
- امتا اجى اشتغل معاك
- عادى فى اى وقت.. بس ليه
- من غير ليه.... من يوم السبت الجاى أنا معاك فى الصيدلية وخلاص
دى بقت فل خالص
علشان عهد شافت فى الصيدلية واحدة ست.. ح تيجى تشتغل فى الصيدلية
هو حد قال لها انى فاتح الصيدلية رجالى فقط ولا حتى اولادى وبناتى
دى هتبقا أيام ايييه... يا منجى من المهالك يا رب
ربنا يسترها
بينى وبينكو أنا قبلت بالموضوع دة لانى افتكرت أن القعدة جنب الدكتور حفناوى مش ح تبقى ظريفة خاالص
واهو عهد برضه تشوف الأدوية وتعرف تتعامل مع الناس فى البيع والشرا وانا عارف انها هتزهق بسرعة
- طب يا عهد بالنسبة للرسالة اللى انتى شغالة عليها
- انا اعرف اوفق بين كل حاجة
- اوكى ماشى... أهلا بيكى يا عهد فى كفر سندوس البهواية
وصلت عهد لغاية البيت ورجعت تانى الصيدلية
الحمد لله عدى اليوم على خير وكل واحد روح بيته ولسه سليم زى مانا
ياللا اشوفكم بقا فى الحلقة الجاية
دمتم بخير
سلامو عليكو