صباح الخير عليكو محدثكم من وراء كاونتر الصيدلية.. دكتور هاشم النهاردة عاوز أقوللكو إن شغل الصيدلة فى المدينة حمادة والشغل فى الأرياف حمادة تانى خااالص أول روشتة دخلت عليا كانت إمبارح مبدئيا كدة الروشتة مكتوب عليها اسم الدكتور... ودة الطبيعى، بس اللى مش طبيعى ان يكون الدكتور متخصصا فى كل الحاجات اللى هو كاتبها دى " باطنة وأطفال وحميات وجراحة ونسا" كل دة يا دكتور..؟ ليه؟ انا فى حياتى ما شفت كدة صرفت الروشتة طبعا بس الموضوع ما عداش كدة وما ينفعش يعدى قررت انى اروح ازور الراجل دة فى عيادته واتعرف عليه اسمه على الروشتة دكتور زغلول ماشى يا دكتور زغلول انا جاى - يا سليمان... خللى بالك انا رايح مشوار نص ساعة وجاى - اخللى بالى ازاى يا دكتور؟ - ان شاء الله يا سليمان شطبى من النقابة هيكون على ايديك.. استرها يااا رب المهم اخدت بعضى ورحت العيادة بتاعة الدكتور زغلول فى بيته فى الشارع اللى ورانا، البيت ده بيت قديم جدا وريحة العفن بتاع الحيطان اللى اكلتها الرطوبة ضاربه فى بير السلم مخلياه اييييه، انا لو اعرف كدة كنت جبت كمامة ولبستها وانا طالع العيادة بس انا الحمد لله انقذت نفسى من الإغماءة اللى كانت هتجيلى وقفلت مناخيرى لغاية ما طلعت له فوق فى العيادة.. عيادة بسم الله ما شاء الله ترش فيها الملح ما ينزلش على الأرض من كتر الحالات واضح أن الدكتور زغلول متسيط أوى. حاولت اتحايل على الناس بس يسيبونى أخش جوة للتمرجى علشان أكلمه بس الحمد لله عرفت أخش العيادة بالجنب كدة بس برضه مع شوية حركات بهلوانية لغاية ما وصلت لمساعد الدكتور. الراجل قاعد ورا المكتب بسم الله ما شاء الله حاجة كدة طول بعرض.. عامل زى ما يكون قاعد على ديسك مدرسة مش مكتب.. دة اكيد فتوة يا جماعة مش تمرجى ولابس قميص مقلم بالطول وبنطلون قماش ورجله جوة شبشب ابيض طبى وطالعة من تحت المكتب للشكل بس مش أكتر - مساء الخير - أهلا أهلا أهلا مساء النور يا باشا،، الكشف عشين جنيه يا باشا، أهلا أهلا أهلا الراجل اتكلم وانا حسيت أن البيت هيتهد علينا دلوقتى.. ما شاء الله واضح أن الراجل دة حكاية - شوف يا عم اااا - هلال يا باشا - عاشت الأسامى يا عم هلال،، أنا دكتور هاشم صاحب الصيدلية اللى فى الشارع اللى وراكو - يا أهلا وسهلا يا أهلا وسهلا اتفضل يا باشا،، شاى ولا ساقع؟ - لا يا عم هلال تسلم متشكر،، انا بس قاصدك فى حاجة كدة - اؤمر يا غالى يا ابن الغاليين - شوف،، انا عاوز اخش اقابل الدكتور زغلول.. كلمتين كدة ومش هعطله - يا نهار أبيض.. دة احنا زارنا النبى يا باشا.. هو الدكتور بيعمل عملية دلوقتى.. تعال يا باشا اتفضل ندخل له سوا - عملية..؟ وندخل له؟ ؟ هنا؟ ؟ - أيوة يا باشا،، اتفضل اتفضل بينى وبينكو انا قلقت.. عمليه ايه اللى بيعملها الراجل دة فى وسط العيادة بالشكل دة.. الواحد بيشوف العجب فى دنيته. المهم مشيت ورا عم هلال بالظبط زى ما يكون توكتوك ماشى ورا عربية نقل كبيرة لا شايف يمين ولا شمال ولا قدام لغاية ما دخلنى اوضة متطرفه كدة فى اخر الشقة والباب اتفتح ولقيت العجب العجاب اربع شخصيات الأولى: الدكتور زغلول قاعد على كرسى معدن ولابس بالطو أبيض على قميص وبنطلون وشبشب ابيض طبى.. هو واضح ان دة اليونيفورم بتاع العيادة لانه مطقم هو والتمرجى بتاعه وادامه تروللى نايمة عليه الشخصية التانية اللى هى طفلة فى حدود ال 10 سنين وتحت تأثير البنج ودماغها عند ايدين الدكتور زغلول وفاتحة بقها والدكتور بيشيل لها اللوز وعند رجلها واقفة الشخصية التالتة اللى هى غالبا امها،، ست كبيرة فى السن وبتعيط، الشخصية الرابعة واحد قاعد على جنب مالوش دعوة بحاجة و بيقرأ فى الجرنال.. دة يا جماعة دكتور التخدير انا شفت المنظر دة وما بقتش عارف اتكلم ايه د؟ معقول. هى دى اوضة العمليات اى حد يدخل كدة ولا فيه تعقيم ولا حاجة عم هلال: الدكتور باسم عاوزك يا دكتور زغلول انا: هاشم يا حاج د زغلول: أهلا دكتور هاشم اتفضل اتفضل انا: اتفضل فين. هنا؟ د زغلول: ايوة ايوة شد كرسى واقعد يا نهاااار... ايه اللى بيحصل دة؟ أنا فى حلم ولا علم؟ ليه كدة؟ الحوار اللى دار بينى وبين دكتور زغلول كان على مستوى عالى اوى من ال... .. ان شاء الله هقوللكو عليه فى الحلقة الجاية بقا دمتم بخير سلامو عليكو
