يوميات صيدلى فى الأرياف.. مبروك الصيدلية

أهلا بيكو
عاملين ايه؟
شوفوا
النهاردة الحلقة الأولى فى مسلسل يومياتى اللى أنا بعيشها فى صيدليتى فى الأرياف ومش أى ارياف.. دى كفر سندوس البهوايه.. بلد العجايب.
أنا قاعد دلوقتى فى الصيدلية على الكرسى بتاعى المرييح ورا الكاونتر بتاع الصيدلية والريحة جنان ما اقوللكوش.
دوا وخشب ودهانات.. لا والراجل الاستورجى كان بيجامل ومزودها حبتين وحاجة ايه.. تخللى جيوبك الانفية تشتاا اا اا آتشو ... الحمد لله
فجأة دخل أول شخص فى تاريخ الصيدلية
راجل كبير فى السن نوعا ما، فى حدود النص التانى من الخمسينات كدة لابس جلابية بلدى لونها رمادى غامق وطاقية شبيكة بيضا وشنبه فى وشه مدى شويتين كدة على شنب إعلامى شهير، وهو قصير شوية ومليان حبة كدة ومعاه شاب طويل شوية وابيضانى ورفيع والناموس تقريبا كان بايت على وشه طول الليل أمبارح،، يمكن مكنش لاقى مكان يبات فيه غير هنا، لابس تى شيرت مقلم بالعرض مدخله جوة البنطلون الأسمر الأسبانى وشعره لونه بنى بس مسرحه زى تسريحة مصطفى قمر فى كليباته القديمة.
- سلامو عليكو.. ازيك يا ضاكتور؟
- الحمد لله والله يا حاج .اؤمر يا حاج .
- الأمر لله يا ضاكتور.. ما يؤمرش عليك ظالم أبدا.. مبرووك الصيدلية يا ضاكتور
- الله يبارك فيك يا حاج
- انت بقا من انهى بلد؟ ؟
- انا يا حاج من البندر.. ليه هو فى فيه حاجة؟
- لا والله يا ضاكتور دة مجرد سؤال بس.. محسوبك الحاج خليل..
- اهلا حاج خليل.. أؤمر
- ههههههههه انا بس جاى اشوفك واتعرف عليك واسالك لو محتاج حاجة كدة ولا كدة.. انا هنا الكل فى الكل فى البلد دى.. يعنى لو محتاج اى حاجة قوللى بس وانا اعملها لك.. حد مضايقك ولا حد مزعلك ولا اى حاجة ، محتاج كيت او كيت قوللى بس
- اها.. إن شاء الله فرصة سعيدة يا حاج خليل وان شاء الله لو عاوز كيت هبقا اقوللك
- بقوللك ايه يا ضاكتور.. الا انت اسمك ايه؟
- هاشم يا حاج
- عاشت الاسامى يا سى هاشم.. انا قاصدك فى حاجة كدة
- اؤمر
- الواد ابن اختى " سليمان " لسه مخلص الدابلون وعاوزك تشغله معاك فى الصيدلية.. دة واد حرك وسلكاوى اووى وهيساعدك..
- بس انا مش عاوز معايا حد يا حاج خليل
- اهييييييييه ليه كدة بس يا ضاكتور.. انت بتكسفنى ولا ايه فى اول طلب؟
- يا سيدى الموضوع مالوش دعوة بالكسوف ولا حاجة انا فعلا مش عاوز حد معايا
- لا يا ضاكتور لا.. ما تخلينيش ازعل بقا.. دة الواد دة انت هتنبسط منه اوى دة حمار شغل.. ينظف لك الصيدلية ولا يمسح لك الرفوف ولا يجيبلك غدا.. شئ من دة على شئ من دة . قلت ايه؟
- ما انا قلت يا حاج انت بس اللى مش مركز
- طب اسمع يا ضاكتور شغل الواد معاك وانا مش هخليك ملاحق على زباين الصيدلية ، ولا اقوللك ما تشغلوش بس ما تزعلش بقا
- انت بتهددنى ولا ايه يا حاج
- لا سمح الله يا ضاكتور.. تهديد ايه بس؟
- امال ايه؟
- اسمع بس يا ضاكتور.. ضاكتور الصحة اللى هو الضاكتور حفناوى يبقا ابن عمى شقيق.. لزم يعنى ويتمنى يخدمنى ، انا هوصيه عليك وهخليه يبعتلك زباين و شوف انت بقا يا ضاكتور هاشم مش هتلاحق زى ما قولتلك
- حبيب قلبى يا سليمان.. خش يا بابا.. نقى اى حاجة ونظفها ، ، حبيب قلبى
- ايوة كدة.. دة الواد هيعجبك خالص
- خلاص بقا يا حاج.. هو انا هتجوزه؟ ماشى انا نفذت الاتفاق بتاعى ورينى انت بقا هتعمل ايه
- اطمن يا ضاكتور ..استأجز انا بقا.. مبروووووك الصيدلية يا ضاكتور.. سلامو عليكو